दुई वर्षमा बने सय भवन

टीकाप्रसाद भट्ट

रामेछाप — ठेक्का पाएर पनि वर्षौंसम्म विकासका योजना अलपत्र पारेको आरोपमा ठूला निर्माण व्यवसायी कालोसूचीमा परेकै बेला रामेछापमा भने एकै निर्माण व्यवसायीले दुई वर्षमा सयवटा भवन निर्माण गरेको छ । 

रामेछापको गौरीशंकर माविको भवन । १५ महिनामा उक्त विद्यालयका लागि ७ वटा भवन निर्माण भए । खानी निर्माण सेवाले यो समेत रामेछापका १९ विद्यालयका १ सय भवन दुई वर्षमा पूरा गरेको छ ।  तस्बिर : टीकाप्रसाद/कान्तिपुर


जिल्लाका १९ विद्यालयका १ सयभन्दा बढी भवन पुनर्निर्माणको जिम्मा पाएको खानी निर्माण सेवाले दुई वर्षमा उक्त विद्यालयको काम सम्पन्न गरेको हो । भवन निर्माणले विद्यार्थीको पठनपाठन सहज भएको छ । ‘यति छिटो अवधिमा धेरै विद्यालय भवनको पुनर्निर्माण गरेकोमा खुसी लागेको छ,’ राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले मंगलबार रामेछापको गौरीशंकर मावि भवन हस्तान्तरण गर्दै भने ।


उक्त विद्यालयका ७ वटा भवन १५ महिनामा निर्माण पूरा भएका हुन् । निर्माण पूरा भएको उक्त विद्यालयमा पठनपाठन सुरु भइसकेको छ । यसअघि कष्टकर बाँसको चित्रामा बसेर पठनपाठन गर्दै आएका बालबालिकाले चिटिक्क परेको आधुनिक भवन पाएका हुन् । विद्यालय परिसरमा आयोजित हस्तान्तरण कार्यक्रममा पुगेका नेपालका लागि अमेरिकी राजदूत र्‍यान्डी वेरीले अमेरिकी नागरिक र सरकारले नेपालको पुनर्निर्माण कार्य गर्न पाएकोमा हर्ष व्यक्त गरे । उनले शिक्षा र स्वास्थ्यको क्षेत्रमा अमेरिकाको सहयोग भएको र त्यस्तो सहयोग निरन्तर हुने बताए । उनले नेपालमा २९ वटा संरचनाको पुनर्निर्माणमा अमेरिकी सहयोग जारी रहेको बताए । विभिन्न १९ वटा विद्यालयको काम गर्ने ठेक्का पाएको खानी निर्माण सेवाले अन्य निर्माण सेवासँगको सहकार्यमा विद्यालय भवन पुनर्निर्माण गरिरहेको छ ।


यसअघि जिल्लाका दर्जनौं विद्यालय व्यवस्थापन समितिलाई हस्तान्तरण गरिसकेको र केही हस्तान्तरणको तयारीमा रहेका निर्माण व्यवसायी रत्न गौतमले बताए । विद्यालयको क्षेत्रमा पुनर्निर्माणको कार्य ढिलो सुरु भए पनि छोटो अवधिमा नै उल्लेख्य प्रगति देखापरेको राष्ट्रिय पुनर्निर्माण प्राधिकरणअन्तर्गतको केन्द्रीय आयोजना कार्यान्वयन इकाई (शिक्षा) का आयोजना निर्देशक इमनारायण श्रेष्ठले बताए । उनले भूकम्पले ३१ जिल्लाका ७ हजार ९ सय २३ वटा विद्यालय पूर्ण रूपमा क्षति भएकोमा हालसम्म ४ हजार भवन पूरा भएका र २ हजार ५ सय भवन निर्माणाधीन अवस्थामा रहेको बताए । ठूला विद्यालय निर्माण व्यवसायीमार्फत, मझौला इकाईमार्फत र साना विद्यालय व्यवस्थापन समितिमार्फत पुनर्निर्माण गर्ने अभियान सञ्चालन गरेकोले थोरै अवधिमा धेरै उपलब्धि हुन सकेको उनले दाबी गरे ।

प्रकाशित : मंसिर १९, २०७५ ०८:२४
ADVERTISEMENT
प्रतिक्रिया
पठाउनुहोस्

फर्कियो आँखाको ज्योति

‘बल्ल छ्याङ्ग भयो’ ८० बर्ष कटेका भण्डारी फुरुङ्ग छन ।
टीकाप्रसाद भट्ट

रामेछाप — चार वर्षअघि दुवै आँखा बन्द भएका गेलुका खड्गवहादुर भण्डारी यतिखेर दंग छन् । दुई दिनअघि मन्थलीमा भएको आँखाको शल्यक्रिया शिविरबाट उनका दुवै आँखामा दृष्टि फर्किएको हो । ‘अन्धै भएर बित्ने भए भन्ने लागेको थियो, भगवान् रहेछन् फेरिी देख्न पाएँ,’ भण्डारीले खुसी हुँदै भने । 

रामेछापको मन्थलीमा आयोजित शिविरमा मोतिबिन्दुको शल्यक्रिया गरेपछि खुसी हुँदै ज्येष्ठ नागरिक । तस्बिर : टीकाप्रसाद/कान्तिपुर

आँखा धमिला भएका वर्षौंसम्म उनले सास्तीमै दिनचर्या बिताए । जब दुवै आँखा झ्याप्प बन्द भए सास्ती झनै थपियो ।

एकै थलोमा चार बर्ष बिताएका उनलाई रामेछाप आँखा केन्द्रका स्वास्थ्यकर्मीले फेला पारे र तिलगंगा प्रतिष्ठानले आयोजना गरेको शल्यक्रिया शिविरमा ल्याएर दुवै आँखामा लागेको मोतिबिन्दुको जालो फालिदिए । त्यसका लागि उनले पैसा पनि तिर्नु परेन । उनीजस्तै ४२ जना आँखा रोगीलाई रामेछाप सामुदायिक आँखा केन्द्रले २ हजारमा जुटाइदियो । त्यही शल्यक्रियाका लागि काठमाडौं जाँदा धेरै खर्च लाग्थ्यो ।

‘बल्ल छ्याङ्ग भयो,’ ८० वर्ष कटेका भण्डारी फुरुङ्ग छन् । उनका आँखा शरीरका अरू अंगभन्दा यौवन बनेका छन् । शरीर बूढो, आँखा तरुना । ‘आँखाको जस्तै अरू अंगको पनि उपचार भए सयौं वर्ष आयु थपिने रहेछ,’ भण्डारीले हौसिँदै भने, ‘आँखा उज्याला भए, शरीर बूढो भैदियो ।’

तिलगंगा आँखा प्रतिष्ठान र रामेछाप सामुदायिक आँखा केन्द्रले मन्थलीमा आयोजना गरेको दुईदिने शिविरमा १ सय ५३ जनाको मोतिबिन्दु र ७ जनाको अन्य रोगको शल्यक्रिया गरिएको थियो । शिविरमा आँखा परीक्षण गराउने थप २ सय जना थिए । शल्यक्रिया गर्नु नपर्ने बिरामीलाई चिकित्सकहरूले परामर्श र औषधि वितरण गरेका थिए । शिविरमा तामाकोसी सहकारी अस्पताल र तामाकोसी सेवा समितिले सहयोग गरेका थिए ।

बुढ्यौलीका कारण आँखामा लागेको जालो फालेपछि अधिकांश बिरामीले दृष्टि फर्किएको खुसी एकअर्कामा साटिरहेका थिए । आँखा बन्द भएको कारण परिवार र छिमेकीले गरेको व्यवहार सुनाउँदा केहीको आँखा रसाएको थियो । शल्यक्रिया गरेको भोलिपल्ट आँखाको पट्टी खोल्दा खुसीले गद्गद् नहुने कमै थिए । अर्काको साहरामा डोहोर्‍याएर शिविरमा आएकाहरू लौराको साहरामा बाटो पहिल्याउँदै घर फर्केका छन् ।

शिविरमा शल्यक्रिया गरिएका अधिकांश बिरामी जिल्ला सामुदायिक आँखा केन्द्र र तामाकोसी सहकारी अस्पतालले विभिन्न स्थानमा पुगेर गरेको स्वास्थ्य उपचार शिविरबाट छनोट गरिएको केन्द्रका प्रमुख वासुदेव अधिकारीले बताए । सहकारी अस्पताल र सामुदायिक आँखा केन्द्रले रामेछाप र आसपासका जिल्लामा पुगेर स्वास्थ्य शिविर सञ्चालन गर्दै आएका छन् ।

प्रकाशित : मंसिर १८, २०७५ ०७:४१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×