नमुना बन्दै ठूलोगाँउ

कान्तिपुर संवाददाता

रसुवा — जिल्लाको ठूलोगाउँमा अहिले सिमेन्ट, इँटा, बालुवा र रडको प्रयोग गरेर नयाँ घर बनिसकेका छन् । यहाँका स्थानिय भूकम्पपछि गाउँलाई पुनर्निर्माण गरेर नमुना बनाउन जुटेका थिए । पुनर्निर्माणसँगै उत्तरगया गाउँपालिका ३ ठूलोगाउँ अहिले नमुना बनेको हो ।

भूकम्पमा परेर उक्त गाउँमा ५४ जनाको मृत्यु भएको थियो । गाउँका ९९ सय प्रतिशत घर पूर्णरूपमा क्षति भएका थिए । भूकम्प जानुभन्दा अगाडि गाउँमा ढुंगा र माटोले बनेका पुराना घर थिए । गुरुङ समुदायको बाहुल्य रहेको यो गाउँ सांस्कृतिक रूपमा धनी छ ।

२०७२ वैशाख १२ र २९ गतेको भूकम्प र त्यसपछिका पराकम्पले रसुवा जिल्लामा ठूलो धनजनको क्षति हुन पुग्यो । भूकम्पले धेरै भौतिक तथा मानवीय क्षति भएको गाउँमध्ये यो पनि एक हो ।
निजी आवास पुनर्निर्माण र गाउँलाई नमुना बनाउन नेपाल रेडक्रस सोसाइटी जिल्ला शाखा रसुवाले सहयोग गरेको शाखाका सभापति बाबुलाल तामाङले बताए । स्पेनिस तथा अमेरिकन रेडक्रसको आर्थिक सहयोगमा नमुना गाउँ बनाउने अभियानसहित उत्तरगया गाउँपालिका ३ ठूलोगाउँको पैरेटोलमा विभिन्न गतिविधि सञ्चालन गरिएको छ ।

गाउँ नमुना बनाउन रेलिङसहितको पक्की गोरेटो बाटो निर्माण भएको छ । गाउँलाई सफा राख्न ठाउँठाउँमा डस्टबिन राखिएका छन् । ३१ वटा घरमा भाँडा माझ्ने र सुकाउने ठाउँ निर्माण गरिएका छन् । त्यस्तै ३१ घरलाई नमुनाका रूपमा सुँगा कलर गरिएको छ । गोरेटो बाटोको दायाँबायाँ फूलका बिरुवा रोपिएको छ ।

गाउँमाझमा पक्की गोरेटो बाटो बनेपछि स्थानीयमा खुसी छाएको छ । आधुनिक गोरेटो बाटोले वृद्धवृद्धा, बालबालिका लगायतलाई हिँड्न सजिलो भएको छ । निजी आवास पुनर्निर्माण सम्पन्न गरेका उत्तरगया ३ठूलोगाउँका हरिबहादुर गुरुङले भने, ‘घरमा अब होमस्टे सञ्चालन गर्ने योजना बनाएको छु ।’

गोरेटो बाटोको दायाँबायाँ रोपिएका फूलका बिरुवाले गाउँलाई सुन्दर बनाएको छ । उक्त गाउँको पुच्छारदेखि सिरान टोलसम्म रेलिङसहित बनाइएको पक्की गोरेटो बाटोको लम्बाइ ५ सय ७५ मिटर छ । गाउँको सिरानमा प्रसिद्ध धार्मिक तीर्थस्थल भुमेस्थान रहेको छ ।

ठूलोगाउँलाई पर्यटन प्रवद्र्धन गर्न धार्मिक तीर्थस्थल भुमेस्थानसँग जोड्न आवश्यक रहेको वडाअध्यक्ष लालबहादुर तामाङले बताए । ‘पर्यटनका माध्यमबाट ठूलोगाउँलाई समृद्ध बनाउन नमुना बस्ती र भुमेस्थान कोसेढुंगा सावित हुन सक्छ,’ उनले भने ।

रेडक्रस सोसाइटी जिल्ला शाखा रसुवाले साविकको ठूलोगाउँका भूकम्प पीडितहरूलाई अनुदान उपलब्ध गराएर ३ सय ५९ वटा निजी आवास निर्माण भइसकेका छन् । ठूलोगाउँका भूकम्प पीडितहरूको निजी आवास निर्माण गर्न सरकारले दिने ३ लाख अनुदान रकम अमेरिकन रेडक्रसको आर्थिक सहयोगमा रसुवा रेडक्रसले उपलब्ध गराएको हो । ठूलोगाउँमा ४ सय ५५ जना लाभग्राही छन् । त्यसमध्ये ४ सय ४७ जना लाभग्राहीसँग अनुदान सम्झौता गरी पहिलो किस्ताबापत्को ५० हजार रुपैयाँ उपलब्ध गराइएको छ ।

दोस्रो किस्ता लिने लाभग्राहीहरूको संख्या ४ सय २२ छ । ३ सय ५९ जना लाभग्राहीले तेस्रो किस्ता पाइसकेका छन् । ८ जना लाभग्राही अनुदान सम्झौता गर्न नआएका रेडक्रसका सेल्टर अधिकृत सञ्जयकुमार साहले बताए ।

प्रकाशित : मंसिर १२, २०७५ ०८:४४
ADVERTISEMENT
ADVERTISEMENT
प्रतिक्रिया
पठाउनुहोस्

त्रिशूली अस्पतालमा चिकित्सक अभाव

कान्तिपुर संवाददाता

नुवाकोट — दरबन्दीअनुसार विशेषज्ञ चिकित्सकको अभावमा त्रिशूली अस्पतालको सेवा प्रभावित भएको छ । जटिल रोगका बिरामी काठमाडौं रिफर गर्न थालेको छ । ‘विशेषज्ञ डाक्टर छैनन्,’ निमित्त मेडिकल सुपरिटेन्डेन्ट देवकी खतिवडाले भनिन्, ‘जटिल खालका बिरामी आए काठमाडौं पठाउँछौँ ।’

अस्पतालमा मेडिकल सुपरिटेन्डेन्ट गरी १७ जना स्थायी मेडिकल चिकित्सकको दरबन्दी छ ।

बालरोग, जनरल फिजिसियन, गाइनोलोजिस्ट र हाडजोर्नी विशेषज्ञ भएका पनि बिदा र काजमा छन् । यो जिल्ला अस्पताल तीन जिल्ला रसुवा, धादिङ र नुवाकोटदेखिका बिरामी उपचार सेवा लिने आउने गर्छन् । यहाँ दैनिक २ सय बिरामीले उपचार सेवा लिने गरेका छन् । बिरामीको चापले २५ बेडको अस्पताल बढाएर ३७ बेडसम्म बिरामी राखिने गरिएको छ । राजधानी काठमाडाँैकोझैं यहाँ आउने चिकित्सकले बिरामीको उपचार सेवा गरेबापत् दुर्गमको जस्तो बढुवाको नम्बर पाउँदैनन् ।

‘अधिकांश चिकित्सक यहाँ आउन मान्दैनन्,’ निमित्त मेडिकल सुपरिटेन्डेन्ट खतिवडाले भनिन्, ‘यहाँ आउने डाक्टरलाई सुविधा छैन । पार्टटाइम काम गर्न क्लिनिकहरू छैन । यहाँ बस्नु र भ्यालीमा बस्नु कुनै फरक भएन ।’ अस्पताल काठमाडौंदेखि ७२ किमि दूरीमा पश्चिमोत्तर भागमा छ ।

विशषेज्ञ चिकित्सक नहुँदा अहिले बिरामीको चाप कम हुँदै गएको छ । स्थायी चिकित्सक नभएपछि अस्पताल व्यवस्थापन समितिले आएका बिरामीलाई जेनतेन उपचार दिलाउन कोसिस गरेको छ । लेखापाल नभएर जिल्ला कारागारबाट लेखापाल ल्याएर काम चलाएको छ ।

आइतबार जिल्ला अस्पतालले चिकित्सक नभएपछि स्वास्थ्य तथा जनसंख्या मन्त्रालयलाई विशेषज्ञ चिकित्सक पठाइदिन पत्र लेखेको छ । पत्रमा ‘५० बेडको क्षमताको अस्पताल भए पनि दरबन्दीअनुसार चिकित्सक तथा कर्मचारीहरू नहुनाले सेवा प्रवाहमा धेरै कठिनाइ भइरहेको’ उल्लेख छ ।

अस्पतालमा प्रसूति सेवा, अल्ट्रासाउन्ड सेवासमेत प्रभावित छ ।

प्रकाशित : मंसिर १२, २०७५ ०८:२९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT