वसन्ती दरबार बनेन

कान्तिपुर संवाददाता

नुवाकोट — नुवाकोट (कास)– ककनी गाउँपालिका ५ स्थित वसन्ती दरबार संरक्षण नहुँदा दिनानुदिन जीर्ण भई ढल्ने अवस्थामा पुगेको छ । दरबारको पूर्वी भागको गारो भूकम्प र वर्षात्ले लडिसकेको छ । छानाबाट पानी चुहिन थालेको छ । पश्चिम मोहडाको गारो पनि ढलेको छ ।

तीनतले दरबार उत्तर र दक्षिण मोहडाका ठूला थामले मात्र खडा छ । दरबारमा स्थानीयवासीले दाउरा राख्ने ठाउँ बनाएका छन् । दरबारअगाडि धुपीका रूख र सानो मन्दिर छ । तल र माथि गरेर दरबारमा आधा दर्जन कोठा छन् । भर्‍याङ लडेको छ । झिँगटीले छाना छाएको छ । ती लड्ने अवस्थामा छन् । अधिकांश बुट्टेदार झयालका खापामा सीमित हुन थालेका छन् । दरबारको पछाडि रिंङ्गे पालीहरू छन् ।

ती पालीहरूमा छाएका झिँगटी सबै खसेर बुट्टेदार थाम र निदाल मात्र छन् । ती पनि घामपानीले कुहिन थालेका छन् । पालीमुनि घाँस उम्रेर झाडी बनेको छ । पुराना ऐतिहासिक धरोहर जोगाउनुपर्ने स्थानीयको माग छ । वरिपरि बन्दै गएको ठूला होटलहरूले दरबारको सुन्दरतालाई छेकेको छ । समुद्री सतहदेखि १५ सय मिटर उचाइमा पर्ने यो दरबार काठमाडौंबाट २९ किमि दूरीमा पर्छ ।

प्रकाशित : आश्विन ३, २०७५ ०८:०३
प्रतिक्रिया
पठाउनुहोस्

चालकले चालक सुधार्दै

कान्तिपुर संवाददाता

काठमाडौँ — भीमेश्वर नगरभित्रका यातायात चालकहरूले पेसागत छवि सुधारको सन्देश दिन अभियान सुरु गरेका छन् । यातायात मजदुरहरूको यात्रुमाझ बिग्रँदो छविलाई सुधार्न उनीहरूले आफूले आफ्नै सुधारका लागि जनचेतना कार्यक्रम सञ्चालन थालेका छन् ।

नेपाल यातायात स्वतन्त्र मजदुर भीमेश्वर नगर कमिटीले ‘म जिम्मेवार यातायात मजदुर’ कार्यक्रम मंगलबारबाट लागू हुने गरी शुभारम्भ भएको घोषणा पनि गरे ।

उक्त कार्यक्रमअन्तर्गत मादक पदार्थ सेवन गरेर सवारीसाधन चलाएको छैन भन्ने सन्देश यात्रुलाई दिइनेछ । सवारी चलाउन अघि यात्रुलाई उक्त जानकारी दिइनेछ । ‘म मोबाइल फोन चलाउँदिनँ तपार्इंहरू ढुक्कले यात्रा गर्नुहोस्,’ यात्रा प्रारम्भ हुनुपूर्व यात्रुलाई यात्रामा कुनै व्यवधान नल्याइने जानकारी गराउने अभियान चालकहरूले ल्याएका छन् ।

उनीहरू पहिलो चरणमा महिला, बालबालिका अशक्त वृद्धवृद्धालाई सम्मान गर्न प्रतिबद्धता सार्वजनिक गरेका छन् । खलासी भन्दै बालश्रम प्रयोग नगर्ने वाचा गरेका छन् । तीव्र गतिमा सवारी चलाउँदिनँ, तोकिएको भन्दा बढी भाडा लिन्नँ, सबैसँग सभ्य भाषा प्रयोग गर्छु र ट्राफिक नियमको पालन गर्छु भन्ने प्रतिबद्धतासहितको स्टिकर पनि आ–आफ्नो सवारीसाधनमा टाँसेका छन् ।

नेपाल यातायात स्वतन्त्र मजदुर ३ नम्बर प्रदेशका सदस्य विष्णु थापाले भीमेश्वर नगरभित्रका चालकहरूले स्वस्फुर्त रूपमा उक्त अभियान सुरु गरेको बताए । पेसाप्रति जिम्मेवारी हुने र यात्रुमाझ असल छवि विकास गर्न नगरभित्रका सबै चालक एकमत भएका उनले बताए ।

उक्त अभियानअन्तर्गत हालसम्म दोलखामा सञ्चालन हुने साना तथा ठुला एक सय सवारीसाधनका चालकहरू सहभागी भइसकेका छन् । जिल्लाभरिको चालकको पेसागत चालनचलन सुधार्दै यात्रुमैत्री बनाउने कार्यक्रमको लक्ष्य छ ।

प्रकाशित : आश्विन ३, २०७५ ०८:०३
पूरा पढ्नुहोस्
प्रतिक्रिया
पठाउनुहोस्