डल्ला परेको सिमेन्टले सडकमा ढलान
रामेछाप — रामेछापको धोबी–सैंपु सडक खण्डमा निर्माण व्यवसायीले डल्ला परेको काम नलाग्ने सिमेन्ट प्रयोग गरि ढलान गरेको खुलासा भएको छ ।
डिभिजन सडक कार्यालय खुर्कोटसँग ठेक्का सम्झौता गरेको दिनेश निर्माण सेवाले सडेर डल्ला परेको सिमेन्ट घनले फुटाएर प्रयोग गरेको वडा अध्यक्ष पदमवहादुर तामाङले बताए । ‘फाल्नु पर्ने सिमेन्टलाई फुटाएर प्रयोगमा ल्याएकाले मैले कामको अनुगमनका लागि आग्रह गरेको छु,’ लिखु तामाकोशी गाँउपालिका–२ सैपुका वडा अध्यक्ष तामाङले भने ।
सदरमुकाम देखि झण्डै ३० किलोमिटर पूर्वोत्तरमा पर्ने उक्त सडक खण्डमा निर्माण व्यवसायीले लापरवाही गरेको जानकारी सडक डिभिजन कार्यालय खुर्कोटमा समेत पुगेको छ । डिभिजन प्रमुख राकेश महर्जनले निर्माण व्यवसायीले गम्भीर त्रुटी गरेकोले उक्त कामको भुक्तानी रोकेर नयाँ काम गराउने बताए । कार्यस्थलमा प्राविधिक नभएको मौका छोपेर निर्माण व्यवसायीले उक्त कार्य गरेको महर्जनले वताए ।
निर्माण व्यवसायी तिलक माझीले केही बोरा डल्ला परेको सिमेन्ट प्रयोग भएको बताए । सैपुका जनक पौडेलले डल्ला परेको सिमेन्ट फुटाएर गिट्टीको रुपमा प्रयोग गर्न सल्लाह दिएकोले उक्त कार्य गरेको माझीले बताए । तर डल्ला फुटाएर गिट्टी नभै धुलो बनाएर सिमेन्टकै रुपमा प्रयोग गरेको दाबी तामाङकाे छ ।
अघिल्लो वर्ष धोवीदेखि सैपुतर्फ जाने सडक कालोपत्रेको काम समेत गुणस्तरहीन भएको गुनासो आएको थियो । गतवर्ष कालोपत्रे गरेको सडक धेरै स्थानमा भत्किसकेको छ ।
प्रकाशित : श्रावण २२, २०७५ ११:०८
