२० वर्षपछि कृष्णभीरमा पहिरो
कृष्णभीर (धादिङ) — पृथ्वीराजमार्ग दुई दशकपछि बुधबार दिनभर अवरुद्ध भयो । जोगीमाराको जुकेखोलामा दक्षिणतर्फबाट आएको हिलो लेदोका कारण राजमार्ग दिनभर अवरुद्ध भएको हो ।
ग्रामीण सडक निर्माणका क्रममा ढल व्यवस्थापन नगर्दा डोजरले खनेको रातोमाटो वर्षासँगै बगेर राजमार्गमा पुगेको हो । पहिरोले जोगीमारा कृष्णभीरमा गएको सामान्य पहिरोले पनि बुधबार ८ घण्टासम्म राजमार्ग अवरुद्ध भएपछि हजारौं यात्रुहरूले सास्ती भोग्न बाध्य भएका
छन् । २ सय मिटर माथिबाट आएको पहिरो र चिप्लो लेदोले राजमार्गमा सवारीसाधन गुड्न कठिनाइ भएको हो ।
राजमार्गबाट दक्षिण भेकका बस्तीमा सडक सञ्जाल जोड्न वातावरणीय प्रभाव मूल्यांकन नगरीकनै डोजर र स्काभेटर लगाउने क्रम बढेपछि पटकपटक राजमार्ग अवरुद्ध हुने गरेको हो । चितवन सिमाना मौवाखोलादेखि नौबिसेसम्मको ८० किलोमिटर दूरीमा दर्जनौं ग्रामीण सडकबाट बग्ने हिलो लेदोका कारण यसअघि पनि विभिन्न समयमा राजमार्ग अवरुद्ध हुँदै आएको थियो ।
कृष्णभीरमा यसअघि २०५५ साउनमा गएको पहिरोले २ साता राजमार्ग पूर्णरूपमा अवरुद्ध भएको थियो । उक्त पहिरोका कारण राजधानी भित्रने वा अन्यत्र जाने यात्रुहरूले वर्षांैसम्म निकै सास्ती बेहोरेका थिए । जापानी प्राविधिक संस्था जाइकाको सहयोगमा उक्त पहिरो बायोइन्जिनियरङिमार्फत हालसम्म रोकिएको बेनीघाट–९ का वडा अध्यक्ष सुरेश मल्लले बताए । उक्त पहिराले गरेको सवारी जाम यति प्रसिद्ध भयो कि कलाकारले गीति संग्रहसमेत निकाल्न भ्याए ।
बुधबार बिहान गएको पहिरो पुरानो स्थलभन्दा करिब ५० मिटर टाढा छ । कृष्णभीरबाट खटौटीतर्फ जाने ओरालोमा हिलो र लेदोमाटोले धेरै चिप्लो भएपछि आवागमननै रोक्नुपर्यो,
पहिरो पन्छाएर पनि ५० बोरा जति धानको भुस हालेर एकतर्फी सवारीसाधन सञ्चालन गर्नुपरेको गजुरीस्थित ट्राफिक इन्चार्ज हेमराज घिमिरेले बताए ।
जोगीमारा तेक्राङस्थित ४५ वर्षअघि उत्खनन् गर्न थालिएको हेटौंडा सिमेन्टको चुनढुंगाखानी पनि राजमार्ग अवरुद्धको कारण बनेको छ । खानीबाट आउने मसिनो लेदोले पनि बारम्बार राजमार्ग जाम गर्ने गरेको छ ।
‘उपकरण अभावमा अवरुद्ध राजमार्गमा यातायात सुचारु गर्न कठिनाइ हुने गरेको’ जिल्ला प्रहरी प्रमुख डम्बर विकले बताए ।
प्रकाशित : असार १४, २०७५ ०९:५१