१७.१२°C काठमाडौं
काठमाडौंमा वायुको गुणस्तर: १६०

पर्सामा सट्टेबाजीको आरोपमा ४ पक्राउ 

शंकर आचार्य

पर्सा — पर्सा प्रहरीले क्रिकेटमा सट्टेबाजी गर्ने कार्यमा संलग्न रहेको आरोपमा ४ जनालाई पक्राउ गरेको छ । भारतमा जारी आईपीएल क्रिकेटमा सट्टेबाजीमा संलग्न रहेको आरोपमा पर्सा प्रहरीले १ भारतीय सहित ४ लाई वीरगन्जबाट पक्राउ गरेको हो ।

पर्सामा सट्टेबाजीको आरोपमा ४ पक्राउ 

वीरगन्ज महानगरपालिका–१५ स्थित सञ्जय श्रीवास्तवको घरमा अनलाइनमार्फत मुम्बई इन्डियन्सको विरुद्ध लखनउ सुपरजायन्ट्स टिमको खेलमा सट्टेबाजी गरिरहेको अवस्थामा जिल्ला प्रहरी कार्यालयबाट खटिएको प्रहरी टोलीले बुधबार उनीहरुलाई पक्राउ गरेको हो । पक्राउ पर्नेमा बारा कलैया उमनपा–४ का ३१ वर्षीय सरोज साह, सर्लाही रामनगर गाउँपालिका–६ का ३५ वर्षीय सन्तोषकुमार यादव, वीरगन्ज महानगरपालिका–२४ का ३४ वर्षीय धुरेन्द्रप्रसाद यादव र भारत उत्तर प्रदेश गोरखपुर देउरियाका ५२ वर्षीय मुन्ना भन्ने धर्मनाथप्रसाद जैसवाल छन् ।

घरको खानतलासी गर्दा सट्टेबाजीमा प्रयोग भएका मोबाइलहरू, ल्यापटप तथा नेपाली नगद ३ लाख ९० हजार ५ सय रुपैयाँ तथा भारु १५ हजार ७ सय ५० रुपैयाँसमेत बरामद भएको छ । खेलको प्रत्यक्ष प्रसारण हेर्न प्रयोग भएको आईडीया कम्पनीको २० इन्चको एलइडी टीभीसमेत फेला परेको थियो । पक्राउ परेका चारै जनालाई सट्टेबाजीसम्बन्धी कसुरमा बुधबार जिल्ला प्रशासन कार्यालयबाट म्याद थप गरी अनुसन्धान भइरहेको जिल्ला प्रहरी कार्यालयका प्रवक्ता डीएसपी दीपक गिरीले जानकारी दिए । उनले लामो तथा सूक्ष्म अनुसन्धान पछि यो गिरोहसम्म पुग्न सफलता मिलेको बताए ।

वीरगन्जमा लामो समयदेखि सट्टेबाज समूहले आईपीएल क्रिकेटको क्रममा सट्टेबाजी गरिरहेको जनगुनासो रहँदै आएको थियो । विगतमा भारतको आईपीएल तथा विश्वकप क्रिकेटको समयमा युवाहरुको समूहले सट्टेबाजीमा ठूलो रकम लगानी गरिरहेको चर्चा चल्ने गरेको थियो । आईपीएल वर्षेनि हुने र यसको क्रेज यस भेगका क्रिकेटप्रेमीहरुमा अत्यधिक रहेकाले सट्टेबाज समूहलाई आफ्नो व्यापार चलाउन सहज हुँदै आएको छ ।

कुन टिमले खेल जित्छ भन्नेदेखि कुन खेलाडीले कति रन बनाउँछन् वा विकेट लिनेछन् तथा कतिसम्म रन बन्ने छ जस्ता कुराको पूर्व अनुमानको आधारमा सट्टेबाजी गर्ने गरिएको छ ।

प्रकाशित : जेष्ठ १२, २०८० १६:०८
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?