राजविराज — सप्तरी जिल्लामा एक हप्तायता मात्रै दुईवटा हत्याका घटना भएका छन् । हनुमाननगर कंकालिनी नगरपालिका ४ मधवापुर र रुपनी गाउँपालिका १ रायपुरमा गरी दुईवटा हत्या भएको हो ।

सोमबार बिहान हनुमाननगर कंकालिनी नगरपालिका ४ मधवापुरस्थित खेतमा घाँटी रेटी हत्या गरिएको अवस्थामा एक शव फेला परेको छ ।

बिहान स्थानीयहरू निस्किँदा खेतमा टाउको काटिएको अवस्थामा शव देखेपछि उनीहरूले प्रहरीलाई खबर गरेका थिए । शव भेटिएको स्थानमा मदिरा र बियरका बोतलहरूसमेत देखिएको सप्तरीका प्रहरी प्रमुख एसपी नरेन्द्रकुमार कार्कीले बताए । हत्या गरिएका व्यक्तिको पहिचान भने अझै खुल्न सकेको छैन ।

यसअघि गत वैशाख ३१ गते रुपनी गाउँपालिका १ रायपुरस्थित राजाराम यादवको खेतमा शम्भुनाथ नगरपालिका २ खैरबनाका मो. लुकमानका छोरा २१ वर्षीय मो. तफेजुलको शव फेला परेको थियो ।

मधेश प्रदेश प्रहरी कार्यालय जनकपुरधामबाट तालिमप्राप्त कुकुर मगाएर अनुसन्धान सुरु गरिए पनि उक्त घटनाको कारणबारे अझै पनि प्रहरी अनभिज्ञ नै छ । रुपनीको घटनामा केही व्यक्तिलाई नियन्त्रणमा लिएर प्रहरीले अनुसन्धान गरिरहेको एसपी कार्कीले बताए ।