चुरे संरक्षण अभियानका संयोजकले तोडे अनशन 

श्यामसुन्दर शशि

जनकपुर — चुरे तथा वन जंगल संरक्षण अभियानका संयोजक सुनील यादवले शनिबार बिहान अनशन तोडेका छन् । उनी ६ बुँदे मागसहित शुक्रबारदेखि अनशन बसेका  थिए । 

मधेस प्रदेशका मुख्यमन्त्री रामसरोज यादव, उद्योग,पर्यटन तथा वन मन्त्री सुनिता यादव र धनुषाका प्रमुख जिल्ला अधिकारी काशीराज दाहालसँगको वार्तापछि उनले अनशन तोडेका हुन् ।

आन्दोलनरत पक्ष र मधेश सरकारका तर्फबाट ५–५ जनाको वार्ता टोली गठन गर्ने र एक हप्तापछि दुवै पक्षबीच वार्ता हुने सहमतिसमेत भएको छ । ‘आफ्नो अधिकार क्षेत्रको माग प्रदेश सरकारले सम्बोधन गर्ने तथा बाँकी माग पूरा गराउन संघीय सरकारलाई लेखी पठाउने निर्णय भएको छ,’ संयोजक यादवले कान्तिपुरसँग भने ।

नेपालको संविधानको धारा ३७ अनुसार भूमिहीन तथा सुकुम्वासीको आवासको हक स्थापित गर्नु पर्ने, अभियानको वार्ताटोली र मधेश प्रदेश सरकारबीच यसअघि भएको सम्झौता कार्यान्वयन गर्नु पर्ने, अवैध क्रसर उद्योग बन्द गरी दिलीप महतोलाई पर्यावरणीय सहिद घोषणा गर्नुपर्ने, वैदेशिक रोजगारसम्बन्धी समस्या समाधान गर्नुपर्ने तथा स्थानीय तहको निर्वाचन गैरदलीय पद्धतिअनुसार गर्ने एवं दलितका लागि चक्रीय प्रणालीअनुसार आरक्षणको व्यवस्था लागू गर्नुपर्ने मागसहित अभियन्ताहरू फागुन ११ देखि जनकपुरको जनकचोकमा धर्ना बस्दै आएका थिए ।

धर्ना बसेको १ महिना ७ दिन बितिसक्दा पनि प्रदेश सरकारले वास्ता नगरेको भन्दै अभियानका संयोजक सुनील यादव शुक्रबार अपरान्हदेखि आमरण अनशनमा बसेका थिए । धनुषाका प्रमुख जिल्ला अधिकारी काशीराज दाहालको पहलमा मुख्यमन्त्रीसँग शनिबार वार्ता भएको थियो । मुख्यमन्त्री रामसरोज यादवले सम्झौता कार्यान्वयन हुने दाबी गरे ।

प्रकाशित : चैत्र १८, २०७९ १२:४१
प्रतिक्रिया
पठाउनुहोस्

मन्त्री छान्न नसकेका देउवाले बोलाए पार्टीको बैठक

कान्तिपुर संवाददाता

काठमाडौँ — मन्त्रीका आकांक्षी धेरै भएपछि व्यवस्थापन गर्न नसकेका नेपाली कांग्रेसका सभापति शेरबहादुर देउवाले केन्द्रीय कार्यसम्पादन समितिको बैठक बोलाएका छन् । कांग्रेससहितको गठबन्धन सरकारमा प्रधानमन्त्री पुष्पकमल दाहालले शुक्रबार मन्त्रिपरिषद् विस्तार गरे । तर कांग्रेसले मन्त्रीको नाम दिन नसकेका कारण अझै पनि मन्त्रिपरिषद्ले पूर्णता पाएको छैन ।

गठबन्धनमा कांग्रेसका भागमा ८ मन्त्रालय परेपनि शुक्रबार चार जनाले मात्रै जिम्मेवारी सम्हालेका छन् । कांग्रेसका भागमा परेका अन्य मन्त्रालय अझै पनि खाली छन् ।

पार्टीभित्र मन्त्रीका आकांक्षीको व्यवस्थापन गर्न नसक्दा र गुटगत रूपमा नेता शेखर कोइराला पक्षले सम्मानजनक ठाउँ नदिएको भन्दै नाम नदिएपछि सभापति देउवाले आफूनिकट चार नेतालाई मात्रै मन्त्री बनाएका हुन् ।

आइतबार बिहान १० बजेका लागि बोलाइएको बैठकमा मन्त्रिपरिषद् विस्तार, वैशाख १० मा हुने उपनिर्वाचन र सरकार सञ्चालनका विषयमा छलफल हुने नेताहरुले बताएका छन् ।

मुख्यसचिव कृष्णप्रसाद पौडेलले आइतबार बिहान १० बजे सानेपास्थित केन्द्रीय कार्यालयमा बस्ने गरी कार्यसम्पादन समितिको बैठक बोलाइएको जानकारी दिए । 'समसामयिक राजनीतिक विषयमा छलफल गर्ने भनिएको छ । त्यसैका लागि बैठक बोलाइएको हो,' उनले भने । यसअघि गत बिहीबारमात्रै पनि कार्यसम्पादन समितिको बैठक बसेको थियो ।

कांग्रेसबाट उपसभापति पूर्णबहादुर खड्का, प्रवक्ता प्रकाशशरण महत, केन्द्रीय सदस्यहरु रमेश रिजाल र सीता गुरुङ मन्त्री बनेका छन् । खड्का रक्षासहित उपप्रधानमन्त्री बनेका छन् भने महत अर्थ, रिजाल उद्योग र गुरुङले शहरी विकास मन्त्रालयको जिम्मेवारी पाएका छन् ।

देउवाले कांग्रेसले पाएका ८ मध्ये ६ मन्त्रालयमा आफूनिकटलाई पठाउने र २ वटा मन्त्रालयमात्रै कोइराला समूहलाई दिने तयारी गरेका थिए । तर कोइराला समूहले ३ मन्त्रालय नपाएसम्म मन्त्रीको नाम नदिने भनेपछि मन्त्रिपरिषद् विस्तार प्रभावित भएको थियो ।

प्रकाशित : चैत्र १८, २०७९ १२:४०
पूरा पढ्नुहोस्
प्रतिक्रिया
पठाउनुहोस्
×