रौतहट — रौतहटको गरुडा नगरपालिकामा नगर प्रमुखविरुद्ध थालिएको अनसन तोडिएको छ । अर्को नगरपालिका वृन्दावनमा भने रिले अनसन जारी छ । पालिकाको विकास निर्माणलगायत गतिविधिबारे सूचना नदिएको भन्दै अनसन थालिएको थियो ।

गरुडामा स्थानीय दीपक यादवले अनियमितताको आरोप लगाई सूचनाको माग गर्दै अनसन बसेका थिए । उनलाई पालिकाका प्रमुख प्रशासकीय अधिकृत भूदेव झाले आइतबार अनशनस्थलमा कागजपत्र उपलब्ध गराएपछि अनशन तोडेका हुन् । नगरपालिका प्रमुख कन्थमणि जैसवालले अनियमितता गरेको र विभिन्न शीर्षकमा भएका खर्च, कामको सूचना माग्दा नदिएको यादवको आरोप थियो ।

शिक्षा क्षेत्रमा भएको खर्च र उपलब्धि, विद्युत्, इन्टरनेटमा भएको खर्च र उपलब्धि, कर्मचारी नियुक्ती, हाजिर रजिस्टर, तलब पेस्की विवरण, पदपूर्ति समितिको छनोट र प्रक्रियालगायत विवरण माग गर्दै यादव चैत ४ देखि अनशन बसेका थिए । ‘सबै सूचना पाएपछि अनशन तोडेको छु,’ उनले भने, ‘नगरवासीका लागि मेरो अनशन थियो ।’ उनी गत स्थानीय तह निर्वाचनमा नगर प्रमुख पदका उम्मेदवार थिए । यादवको समर्थनमा आएका युवाले शनिबार गौर–चन्द्रनिगाहपुर खण्ड अवरुद्ध गर्न खोज्दा झडपसमेत भएको थियो । स्थिति नियन्त्रणमा लिन प्रहरीले अश्रुग्याससमेत प्रहार गर्नुपरेको थियो ।

यसअघि यादव समूहबाट नगर प्रमुख जैसवालको घरमा ढुंगामुढा र दुर्व्यवहार भएको भन्दै इलाका प्रहरी कार्यालय गरुडाले उनलाई नियन्त्रणमा लिएर छाडेको थियो । नगर प्रमुख जैसवालले आफूले कुनै पनि अनियमितता नगरेको दाबी गरे । ‘मैले बेथिति हटाउने कामको सुरुवात गरेको हुँ । तर मलाई सहयोग गर्नुको साटो अपमान गर्ने काम भयो,’ उनले भने ।

वृन्दावनमा अनियमितता भएको भन्दै वडाध्यक्ष र दलका नेताले थालेको रिले–अनशन भने जारी छ । पालिका प्रमुख विनोद कुर्मीको गतिविधिबारे सूचना माग्दा नदिएको आरोप लगाउँदै वडा नम्बर २ का अध्यक्ष सिकिन्द्र राउत कुर्मी, ३ का अध्यक्ष हरिनारायण साह, ४ का अध्यक्ष श्यामनन्दन राय र ५ का अध्यक्ष फेकु दास रिले–अनशनमा छन् । उनीहरूसँगै नगरपालिकाका पूर्वनगर प्रमुख, एमाले, माओवादी, कांग्रेस, जसपा र आमजनता पार्टीका केन्द्र, प्रदेश र जिल्लाका नेता पनि बुधबारदेखि अनशनमा छन् ।