१९.१२°C काठमाडौं
काठमाडौंमा वायुको गुणस्तर: १४७

अभियुक्तसँग नाम मिल्दा प्रहरीको सास्ती

अवधेशकुमार झा

राजविराज — सप्तरीमा नामथर र ठेगाना मिल्दा अर्को व्यक्तिले गरेको अभियोगमा एक जना बारम्बार पक्राउ परेका छन् । सप्तरीको कञ्चनरूप नगरपालिका–५ का ५६ वर्षीय रामफल मुखियालाई अभियुक्तसँग नामथर मिलेकै कारण प्रहरीले दुई पटक पक्राउ गरेको हो ।

अभियुक्तसँग नाम मिल्दा प्रहरीको सास्ती

सोही स्थानका रामफल मुखिया नाम भएकै व्यक्तिलाई २०४२ कात्तिक १३ मा कैदीबन्दी भगाएको अभियोग छ । सप्तरी जिल्ला अदालतबाट जेल सजाय पाएका उनी हालसम्म फरार छन् । प्रहरीले फरार अभियुक्तलाई पक्राउ गर्ने अभियानको क्रममा अर्का रामफललाई पक्राउ गरेको हो ।

पछिल्लो समय यही चैत ४ मा पनि उनलाई प्रहरीले पक्राउ गरी हिरासतमा राखेको थियो । पछि निर्दोष साबित भएपछि रिहा गरेको छ । गत शनिबार घरबाट कञ्चनपुर बजारतर्फ आउने क्रममा प्रहरीको टोलीले रामफललाई पक्राउ गरेको हो । ‘तपाईंमाथि पुरानो मुद्दा छ भन्दै प्रहरीले हत्कडी लगाएर प्रहरी कार्यालय पुर्‍याए,’ रामफलले भने, ‘मैले कुनै अपराध गरेको छैनभन्दा पनि पत्याएनन् ।’ अभियुक्त अर्कै रामफल रहेको भन्दै कञ्चनरूपका नगरप्रमुख ललनप्रसाद गुप्ता पनि प्रहरी कार्यालय पुगे । तर उनलाई पनि प्रहरीले पत्याएन ।

रामफललाई भोलिपल्ट जिल्ला अदालतमा पेस गरियो तर तीनपुस्ते विवरण नमिलेको भन्दै रिहा गरियो । अभियुक्त रामफलका बुबाको नाम कलमा मुखिया मलाह हो भने निर्दोष रामफलको बुबाको नाम फिरंगी मलाह । जिल्ला अदालतका तहसिलदार दिनेश सुवेदीले मिसिलमा रहेको तीनपुस्ते विवरण अहिले पक्राउ गरिएका रामफलसँग नमिलेपछि उनलाई छोडिएको जानकारी दिए । रामफललाई २०७३ जेठ ४ मा पनि प्रहरीले पक्राउ गरेको थियो ।

अदालतले पुर्पक्षका लागि थुनामा पठाएपछि उनी ५ महिना २० दिन जेलमा परे । तत्कालीन पुनरावेदन अदालतमा बन्दी प्रत्यक्षीकरण रिट हालेपछि उनी निर्दोष साबित भए । त्यही वर्षको कात्तिक २४ मा उनी रिहा भएका थिए । त्यसपछि ०७४ को स्थानीय तहको निर्वाचनमा उनी वडा सदस्यमा निर्वाचित भएका थिए । ५ वर्ष उनी जनप्रतिनिधिको भूमिकामा काम गरेका उनलाई फेरि प्रहरीले पक्राउ गरेको हो । ‘प्रहरीले मलाई दुई पटक पक्राउ गरिसकेको छ,’ उनले भने, ‘मेरो के दोष छ र, यसरी पक्राउ गरेर बेइजत गरिन्छ ?’ अदालतको फैसला कार्यान्वयनको सूचीमा नाम रहेका कारण उनलाई नियन्त्रणमा लिएको इलाका प्रहरी कार्यालय कञ्चनपुरका डीएसपी दीपक रायले बताए । ‘फैसला कार्यान्वयन सूचीमा रामफल मुखिया नाम थियो, ठेगाना पनि मिल्यो । त्यो सूचीमा बुबाको नाम थिएन,’ डीएसपी रायले भने, ‘अदालतमा मिसिलमा उनी अर्कै मानिस भएको देखिएपछि रिहा गरियो ।’ कञ्चनरूपका नगरप्रमुख गुप्ताले निर्दोषलाई पटकपटक पक्राउ गर्नु उचित नभएको भन्दै प्रहरीले आगामी दिनमा ध्यान पुर्‍याउनुपर्ने बताए ।

प्रकाशित : चैत्र ८, २०७९ ०८:२३
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?