काठमाडौँ — मूर्ति चोरीको आरोपमा प्रहरीले एक जनालाई पक्राउ गरेको छ ।

काठमाडौं महानगरपालिका–१५ स्वयम्भू नयाँ बस्तीमा रहेको शिवशक्ति धाम मन्दिरबाट सत्य शक्तिदेवी लेखिएको ढुंगाको मूर्ति चोरी गरेको आरोपमा प्रहरीले दोलखा, भिमेश्वर घर भइ ढल्कु पोडेटोल बस्ने २८ वर्षीया तेस्रोलिंगी कुमारी तामाङलाई पक्राउ गरेको प्रहरीले जानकारी दिएको छ ।

उक्त मूर्ति गत माघ १६ मा चोरी भएको थियो । प्रहरी वृत्त स्वयम्भूले तामाङलाई मूर्तिसहित शुक्रबार पक्राउ गरेको हो । प्रहरीले तामाङको कोठाबाट शिवशक्ति धाम मन्दिरबाट चोरी भएको सत्य शक्ति देवी लेखिएको ढुंगाको मूर्ति १ थान, विभिन्न देवी देवताको आकृति भएको ढुंगाको मूर्ति २४ थान, धातुको मूर्ति २९ थान र धातुको त्रिशुल १ थान बरामद गरेको छ ।