१७.१२°C काठमाडौं
काठमाडौंमा वायुको गुणस्तर: १५८

अनुमति नलिई निस्केका कैदी दुर्घटनामा

शिव पुरी

रौतहट — लागूऔषध कारोबारको आरोपमा अदालतबाट सजाय पाएर कारागारमा रहेका एक कैदी प्रहरीले बाहिर लैजाने क्रममा दुर्घटनामा परेका छन् । ती कैदीलाई कारागारमा कार्यरत एक प्रहरी नायब निरीक्षक (सई) ले होलीका बेला सुटुक्क बाहिर लगेका थिए ।

हाल घाइते कैदीको बारास्थित न्युरो अस्पतालमा उपचार भइरहेको छ । घटनापछि प्रशासनले छानबिन थालेको छ ।

बारा भटियानीका कैदी पवन यादवलाई रौतहट कारागारमा कार्यरत सई तेजीलाल यादवले गत फागुन २३ मा घर लैजाने क्रममा लौकाहानजिक मोटरसाइकल दुर्घटना भएको थियो । कैदी यादवको टाउकोमा चोट लागेको छ । उनको उपचार भइरहेको कारागारका जेलर शम्भु यादवले बताए । ‘सईले कैदीलाई सुटुक्क लगे । दुर्घटनापछि मात्र थाहा पाएँ,’ उनले भने, ‘यसमा मेरो कुनै दोष छैन ।’ सई तेजीलाललाई सामान्य मात्र चोटपटक लागेको छ । १३ वर्षअघि काठमाडौंमा पक्राउ परेका यादवलाई रौतहट जिल्ला अदालतबाट १५ वर्षको कैद सजाय र ५ लाख रुपैयाँ जरिवाना तोकिएको थियो । उनले झन्डै साढे १३ वर्ष जेल सजाय काटिसकेका छन् । उनी काठमाडौं, सिन्धुली हुँदै रौतहट कारागार आएको दुई वर्ष मात्र भएको जेलर यादवले बताए ।

कारागार स्रोतका अनुसार सई तेजीलाल होली मनाउन बारास्थित घर जाँदै थिए । सोही बेला कैदी पवनलाई उनले साथै लगे । पवन कैदी (चौकीदार) नाइके हुन् । उनलाई एक वर्षअघि मात्र कारागार प्रशासनले नाइके बनाएको थियो । नाइकेले अरू कैदीभन्दा केही सुविधा पाउँछन् । यसैको फाइदा उठाउँदै सई तेजीलालले उनलाई जिल्ला बाहिर लगेका हुन् । नाइकेको नजिक घर छ र परिवारमा कसैको मृत्यु भयो भने थोरै समय सुरक्षाकर्मीको साथ लागेर पठाइने गरिन्छ । तर, जिल्ला बाहिर जान पाउँदैनन् । घर जान लागेका नाइके पवनले कारागार प्रशासन र प्रमुख जिल्ला अधिकारी कसैको आदेश पाएका थिएनन् ।

प्रमुख जिल्ला अधिकारी धर्मेन्द्रकुमार मिश्रले कैदी पवन जिल्ला बाहिर गएको बेला दुर्घटनामा परेको पुष्टि गरे । उनले घटनाबारे छानबिन अघि बढेको बताए । प्रशासनले प्रशासकीय अधिकृत मनिभूषण साहको संयोजकत्वमा छानबिन टोली गठन गरेको छ । सई तेजीलाल हालसम्म निलम्बनमा परेका छैनन् । उनले जेलरको अनुमति लिएको होला भनी कैदी पवनलाई लगेको स्विकारे । जिल्ला प्रहरी कार्यालयका प्रवक्ता डीएसपी उमाशंकर यादवले सईसँग स्पष्टीकरण लिइएको र दोषी देखिए निलम्बन र कारबाही गर्ने बताए ।

प्रकाशित : चैत्र ५, २०७९ ०८:०७
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?