हुलाकी सडकमा ठेकेदारको आलटाल

सडकको नबन्दा यहाँका स्थानीय वर्षौंदेखि धूलोको मार खेप्न बाध्य छन् । कुल ४२ किलोमिटरको हुलाकी सडक पाँच वर्षभित्र कालोपत्र गर्नेगरी २०७३ सालमा तीनवटा प्याकेजमा ठेक्का लागेको थियो । सडक कालोपत्रको ठेक्का लागेको ६ वर्ष भइसक्दा पनि सडकको अवस्था उस्तै छ । जसले यस भेगका स्थानीय हैरानी खेपिरहेका छन् । निरन्तरको धूलोले सर्वसाधारणको स्वास्थ्यमासमेत असर परिरहेको नागरिकको गुनासो छ । सडकको केही स्थानमा भने पहिलो चरणकै अलकत्रा हालिए पनि धेरैजसो स्थान धुलाम्मे नै छ ।

सडक कालोपत्र नहुँदा कष्टपूर्ण यात्रा गर्नुको साथै धूलोले आजित बनाइरहेको गोडैता नगरपालिका–१० सिसौटियाका कुन्दनकुमार झाले बताए । उनले बर्सेनि सडक कालोपत्र हुने आश मात्र आफूहरूले पाइरहेको गुनासो पोखे । उनका अनुसार हुलाकी सडक छेउछाउका बस्ती धूलोले आजित छन् । ‘हुलाकी सडकमा यात्रा गर्नुपर्दा निकै कष्ट हुन्छ, त्यसमाथि गाडीले उडाएको धूलोले झन् बिजोग हुन्छ,’ उनले भने, ‘बर्सेनि हामीलाई सडक कालोपत्रको आश देखाउँछ, तर सडक कालोपत्र हुँदैन ।’

राणाकालीन समयमा निर्माण भएको हुलाकी सडकले काँचुली फेर्न नसक्दा यस क्षेत्रका स्थानीय हिउँदमा धूलो र वर्षामा हिलोले सास्ती खेप्न बाध्य छन् । जिल्लाको पूर्वमा संग्रमपुरदेखि पश्चिम बलरासम्मको हुलाकी सडकको अधिकांश भाग अहिले पनि कालोपत्रको पर्खाइमा छ । सदरमुकाम मलंगवादेखि पूर्व संग्राम्पुरसम्मको पहिलो खण्डको १५ किलोमिटर सडकमा धेरै समस्या देखिएको छ । यस खण्डको ठेक्का हिम्दुङ एन्ड ठोकर/हीरा एन्ड नमिता जेभीले पाएको छ । यो खण्डमा कामले गति लिन सकेको छैन ।

मलंगवादेखि पश्चिम रोहुवासम्मको दोस्रो खण्डको १५ किलोमिटरको ठेक्का हिम्दुङ एन्ड ठोकर/साह निर्माण सेवाले पाएको छ । त्यहाँबाट पश्चिम बलराको वाग्मती किनारसम्मको तेस्रो खण्डको १२ किलोमिटर सडकको ठेक्का दिवा निर्माण सेवाले पाएको छ । जसमध्ये पहिलो र तेस्रो खण्डको ठेक्काको म्याद चैत मसान्तसम्म थपिएको छ भने दोस्रो खण्डको म्याद वैशाख मसान्तसम्म रहेको हुलाकी सडक आयोजना जनकपुरधामले जनाएको छ ।

हुलाकी सडक आयोजना जनकपुरका प्रमुख कृष्णकुमार महतोले ठेकेदारको बहानाबाजीसहित स्थानीयको अवरोधका बीच पछिल्लो समय हुलाकी सडकको कामले गति लिएको दाबी गरे । उनले अर्को कुनै समस्या नआए वैशाख मसान्तभित्र हुलाकी सडक कालोपत्र हुने जानकारी दिए । तर, सदरमुकाम मलंगवाको हकमा भने थप केही समय लाग्ने महतोले बताए । ‘अझै पनि केही ठाउँको साइट क्लियरेन्स हुन सकेको छैन, बुझेका, पढेलेखेका तथा राजनीति गर्ने नै साइट क्लियरेन्समा बाधक बनिरहेका छन्, त्यसलाई चिर्ने काम भइरहेको छ,’ उनले भने, ‘महँगी बढेकाले ठेकेदारले बहाना झिक्नु स्वाभाविक पनि हो, तर वैशाख महिनाभित्रमा हुलाकी सडक कालोपत्रको काम सकिन्छ ।’

जिल्ला समन्वय समिति सर्लाहीका प्रमुख कौशलकिशोर सिंहले आफूसहित प्रशासनको टोली गएर साइट क्लियर गराइसकेको जनाउँदै ठेकेदारले नै काममा आलटाल गरिरहेको जानकारी दिए । उनले पश्चिमको दोस्रो र तेस्रो खण्डको ठेक्कामा सन्तोषजनक काम देखिए पनि पूर्वको पहिलो ठेक्कामा ठेकेदार पक्षले बदमासी गरिरहेको बताए । ‘साइट क्लियरेन्स भएन भने पछि हामी पुगेर साइट क्लियर गराइदियौं, कार्यालयले पनि ठेकेदारले पाउने रकममा कुनै समस्या नरहेको जनाएपछि दोषी त ठेकेदार नै देखियो,’ उनले भने, ‘अझै पनि कुनै न कुनै बहाना ठेकेदारले खोजिरहेको जस्तो बुझिन्छ ।’