१६ वर्षपछि निर्माण पूरा
राजविराज — निर्माण सुरु भएको १६ वर्षपछि भारतीय सहयोगका तीन योजनाको उद्घाटन गरिएको छ । सप्तरीको गजेन्द्रनारायण सिंह अस्पतालको आकस्मिक कक्ष र प्रसूति भवन, नरेन्द्र मेमोरियल माध्यमिक विद्यालय बोरियाको भवन र जनता रामेश्वर मेमोरियल माध्यमिक विद्यालय ब्रह्मपुरको भवन उद्घाटन गरिएको हो । यी योजना २०६३ सालमा सुरु भएका थिए ।
नेपालका लागि भारतीय राजदूत नवीन श्रीवास्तवले शुक्रबार ती भवनको उद्घाटन गरे । उनले नेपाली जनतालाई शिक्षा र स्वास्थ्यमा सहज पहुँचका लागि भारतीय सहयोग जारी रहने बताए । तीनवटै भवन यसअघि नै प्रयोगमा आइसकेका छन् ।
भारतीय सहयोगमा निर्माणाधीन राजविराजस्थित महेन्द्र बिन्देश्वरी बहुमुखी क्याम्पसको कन्या छात्रावास र कुनौली फत्तेपुर सडक निर्माण योजना भने अलपत्र छन् । ‘छात्रावास र सडक बनाउनका लागि सहयोग गर्न तयार छौं,’ राजदूत श्रीवास्तवले भने, ‘दूतावासका अधिकारीले ती योजनाको निरीक्षण गरिसकेका छन्, कसरी सम्पन्न गर्न सकिन्छ भनेर जिल्ला समन्वय समितिसँग प्रस्ताव मागेका छौं ।’
प्रकाशित : माघ २३, २०७९ १०:१४
