धनुषा — मधेस प्रदेश सरकारको दोस्रो पटक मन्त्रिपरिषद् विस्तार भएको छ । शुक्रबार ६ मन्त्री र ३ राज्यमन्त्रीले शपथ लिएका हुन् । प्रदेश प्रमुख हरिशंकर मिश्रले मन्त्रीहरूलाई शपथ गराए । नयाँ मन्त्रीमा सत्ता गठबन्धनबाट एमालेका ३, जनता समाजवादी पार्टीका २ र जनमत पार्टीबाट १ जना छन् ।

सामाजिक विकासमन्त्रीमा सुरिता साह र खानेपानी तथा ऊर्जा विकासमन्त्रीमा सिंहासन कलावार नियुक्त भएका छन् । उनीहरू जसपाका हुन् । एमालेका शत्रुधनप्रसाद सिंह गृह तथा सञ्चारमन्त्री, राजकुमार लेखी कानुन न्याय तथा प्रदेश मामिलामन्त्री र मोहम्मद जयद आलम महिला बालबालिका, युवा तथा खेलकुदमन्त्रीमा नियुक्त भएका छन् । जनमतका महेशप्रसाद यादव शिक्षा, विज्ञान, प्रविधि तथा वाणिज्यमन्त्री नियुक्त भएका छन् । जसपाका शेख अब्दुल कलाम आजाद सामाजिक विकास राज्यमन्त्री, एमालेका केशव राय गृह तथा सञ्चार राज्यमन्त्री र जनमतका सञ्जयकुमार यादव भूमि व्यवस्था तथा कृषि राज्यमन्त्री बनेका छन् ।

मुख्यमन्त्री सरोजकुमार यादव नेतृत्वको प्रदेश सरकारमा यसअघि एमालेका सरोज यादव भौतिक पूर्वाधार विकासमन्त्री, जनमतका वसन्त कुशवाहा भूमि व्यवस्था कृषि तथा सहकारीमन्त्री र जसपाका सञ्जय यादवले अर्थमन्त्रीको जिम्मेवारी सम्हालेका थिए । प्रदेशमा जसपाका मुख्यमन्त्रीसहित ४, एमालेका ४, जनमतका २ गरी १० जना मन्त्री र ३ जना राज्यमन्त्री भएका छन् । सत्ता गठबन्धनको माओवादी केन्द्रले सरकारलाई समर्थन गरे पनि मन्त्री पद लिएको छैन । ९ जना प्रदेश सांसद रहेको माओवादीले २ वटा मन्त्रालय पाउनुपर्ने अडान राखे पनि मुख्यमन्त्री यादवले उद्योग, पर्यटन तथा वन मन्त्रालय मात्र दिन सक्ने बताएपछि माओवादी सरकारमा सहभागी नभएको हो ।

मन्त्रालय बाँडफाँटमा सहमति नहुँदा मन्त्रिपरिषद् विस्तारमा सकस भएको थियो । जनमत पार्टीले सामाजिक विकास मन्त्रालयको अडान नछोडेपछि मुख्यमन्त्री यादवले उक्त मन्त्रालयबाट शिक्षालाई टुक्राएर विज्ञान प्रविधि मन्त्रालयमा जोडेर जनमतका महेश यादवलाई मन्त्री बनाएका छन् । मन्त्रीले शपथ लिए पनि जनमत भने सन्तुष्ट छैन । सामाजिक विकास मन्त्रालयमा भएको भ्रष्टाचार लुकाउन आफूलाई नदिइएको जनमतको आरोप छ । उक्त मन्त्रालयको बेरुजु र भ्रष्टाचारको आरोप लागेका कार्यक्रममा अख्तियार दुरुपयोग अनुसन्धान आयोगले छानबिनसमेत गरिरहेको छ ।