१८.१२°C काठमाडौं
काठमाडौंमा वायुको गुणस्तर: १२४

अनुदानको बीउ उम्रेन

सप्तरी — स्थानीय तहले अनुदानमा किसानलाई उपलब्ध गराएको गहुँको बीउ नउम्रिँदा सप्तरीका किसानको मिहिनेत र लगानी खेर गएको छ । बीउ छर्दाको खर्च र मलखाद खरिदमा लगाइएको लगानी खेर गएको भन्दै उनीहरूले क्षतिपूर्तिको माग गरेका छन् । 

अनुदानको बीउ उम्रेन

सप्तरीको कञ्चनरूप नगरपालिकाले पालिकाभित्रका किसानलाई वितरण गरेको अनुदानको गहुँको बीउ नउम्रेको कृषकहरूले आरोप लगाएका छन् । अनुदानको बीउ राम्रो हुन्छ भन्ने सोचेर नगरपालिकाले दिएको बीउ खेतमा छर्दा गहुँ ५० प्रतिशत पनि नउम्रेको त्यहाँका किसानको भनाइ छ ।

कंचनरूप नगरपालिकाले केही दिनअघि ५० प्रतिशत अनुदानमा कृषकलाई गहुँको बीउ वितरण गरेको थियो । ‘५० प्रतिशत बीउ पनि उम्रेन,’ कञ्चनरूप–८ का किसान मुनेश्वर साहले भने, ‘गहुँ खेतको अवस्था हेर्दा रुन मन लाग्छ । कट्ठामा ८ किलोका दरले बीउ छरे पनि ५० प्रतिशतभन्दा बढी उम्रिएन । गुणस्तरहीन बीउ परेजस्तो छ ।’

गुणस्तरीय बीउको अभाव र रासायनिक मल नपाउँदा तथा सिँचाइ सुविधा नहुँदा खेती गर्नु चुनौतीपूर्ण रहेको किसान साहले बताए । ‘खेत तयार गर्दादेखि नै खर्च सुरु भइसक्छ । अनुदान बीउको उम्रने शक्ति हेर्दा लगानीबमोजिमको प्रतिफल आउन पनि समस्या छ,’ उनले भने, ‘जुन शंका थियो, त्यही भयो ।’ कञ्चनरूप–८ का किसान अजय मण्डलले खेतमा मिहिनेत गरेर छरेको बीउ मज्जाले नउम्रिँदा समस्या भएको बताए । ‘खेत पनि ओगटियो, गहुँ पनि राम्ररी उम्रेन, लगानी उठ्न पनि संकट हुनेजस्तो छ,’ उनले भने ।

सप्तरीको कञ्चनरूप नगरपालिकाले ५० प्रतिशत अनुदानमा किसानलाई ४० किलो बराबरको ३ सय प्याकेट गहुँको बीउ वितरण गरेको थियो । २ हजार ८ सय ८० रुपैयाँ बोराको बीउ किसानलाई १ हजार ४ सय ४० रुपैयाँमा दिइएको नगरपालिकाले जनाएको छ । कञ्चनरूप नगरपालिकाका कृषि शाखा प्रमुख बेचन सढोक यादवले अनुदानमा वितरण गरिएको गहुँको बीउ नउम्रेको गुनासो कुनै पनि किसानले नगरेको बताए । उनले भने, ‘गहुँको बीउ नउम्रेको गुनासो लिएर कुनै किसान आएका छैनन्, यद्यपि, के भएको रहेछ हामी खोजीनिती गर्छौं ।’ अनुदानको बीउ अधिकांश खेतमा उम्रेको छैन । ‘अनुदानको बीउ छरिएको सबै खेतमा समस्या छ कि कुनै कुनैमा हामी छानबिन गर्छौं,’ उनले भने । कृषि शाखाका प्रमुख यादवका अनुसार नगरपालिकाले कृषि सामग्री कम्पनी लिमिटेड इटहरीबाट गहुँको बीउ खरिद गरी किसानलाई अनुदानमा वितरण गरेको थियो ।

प्रकाशित : माघ २०, २०७९ ०७:२२
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?