मधेसका २ माओवादी सांसदले लिए शपथ- मधेस - कान्तिपुर समाचार
कान्तिपुर वेबसाईट
AdvertisementAdvertisement

मधेसका २ माओवादी सांसदले लिए शपथ

सन्तोष सिंह

धनुषा — सर्वोच्च अदालतको अल्पकालीन आदेशका कारण शपथ रोकिएका माओवादी केन्द्रका २ जना प्रदेश सांसदले शपथ लिएका छन् । प्रदेशसभाका सभामुख रामचन्द्र मण्डलले माओवादी केन्द्रका प्रदेश सांसद महोतरीका रजी हैदर र सप्तरीका मला कर्णलाई बुधबार पद तथा गोपनीयताको शपथ गराएका छन् ।

अदालतले दुवै जनालाई शपथ गराउन पत्र पठाएपछि दुवै जनालाई पद तथा गोपनीयताको शपथ गराएको प्रदेशसभाका सभामुख मण्डलले बताए ।

दुवै जनालाई प्रदेश सांसदलाई सर्वोच्चले सांसदको कामकारबाहीमा रोक लगाएको थियो । माओवादीले पठाएको बन्दसूचीअनुसार निर्वाचन आयोगले निर्वाचित नगरेको भन्दै सर्वोच्चमा मुद्दा दायर भएपछि सर्वोच्चले तत्काल शपथ नगराउन प्रदेश सभा संसद् सचिवालयलाई पत्र पठाउदा दुवै सांसदको शपथ रोकिएको थियो ।

मधेस प्रदेशमा माओवादीबाट ४ जना समानुपातिकमा निर्वाचित भएका थिए । निर्वाचित हुनेमा धनुषाबाट सुनिता यादव, सप्तरीबाट मालाकुमारी कर्ण, धनुषाबाट शारदा दास (पहाडी) र महोत्तरीबाट मोहम्मद रजी हैदर निर्वाचित भएका हुन् । सुनिता र माला मधेसी समूह, शारदा दलित र रजी मुस्लिम समूहबाट निर्वाचित भएका हुन् ।

समानुपातिकको बन्दसूचीमा रहेकी खचान्जी महतो नुनियाले आफूहरूभन्दा तल रहेकालाई निर्वाचित गरेको भन्दै निर्वाचन आयोगविरुद्ध सर्वोच्चमा मालाकुमारी र रजीको शपथमा रोक लगाउन माग गर्दै रिट दायर गरेका थिए । उक्त मुद्दामा न्यायाधीश तिलप्रसाद श्रेष्ठको एकल इजलासले मंसिर २९ गते अल्पकालीन अन्तरिम आदेश जारी गरेको थियो ।

प्रकाशित : माघ ११, २०७९ ११:४७
प्रतिक्रिया
पठाउनुहोस्

सुनको मूल्य एक सय रुपैयाँ घट्यो, चाँदीको स्थिर

कान्तिपुर संवाददाता

काठमाडौँ — मंगलबार हालसम्मकै नयाँ रेकर्ड बनाएको सुनको मूल्यमा बुधबार १ सय रुपैयाँले कमी आएको छ । विश्व बजारमा सुनको मूल्य करिब २ अमेरिकी डलरले कमी आएको छ ।

सुनको मूल्यमा कमी आए पनि बुधबार नेपाली रुपैयाँको तुलनामा अमेरिकी डलरको विनिमय दरमा पनि कमी आएकाले सुनको मूल्य १ सय रुपैयाँले मात्र घटेको सुन चाँदी व्यवसायी महासंघका पूर्व अध्यक्ष तेजरत्न शाक्यले बताए ।

बुधबार सुनको मूल्य प्रतितोला १ लाख ६ हजार २ सय रुपैयाँ कायम भएको छ । मंगलबार सुनको मूल्य प्रतितोला १ लाख ६ हजार ३ सय रुपैयाँ पुगेको थियो । यसअघि गत फागुन २५ गते सुनको मूल्य प्रतितोला १ लाख ५ हजार ५ सय पुगेको थियो । जुन उच्च मूल्य एक वर्ष नपुग्दै तोडिएको थियो ।

महासंघका अनुसार बुधबार चाँदीको मूल्य भने स्थिर छ । जसअनुसार बुधबार पनि चाँदीको मूल्य प्रतितोला १ हजार ३ सय ६५ रुपैयाँ कायम भएको छ । चाँदीको मूल्य यसअघि गत फागुन २५ गते प्रतितोला १ हजार ४ सय ५० रुपैयाँ पुगेको थियो ।

प्रकाशित : माघ ११, २०७९ ११:४३
पूरा पढ्नुहोस्
प्रतिक्रिया
पठाउनुहोस्
×