१८.१२°C काठमाडौं
काठमाडौंमा वायुको गुणस्तर: १२४

मधेसको सभामुखमा एमालेका मण्डल निर्वाचित

अजित तिवारी

जनकपुर — मधेस प्रदेशको सभामुखमा एमालेका सांसद रामचन्द्र मण्डल निर्वाचित भएका छन् । मण्डललाई सत्ता गठबन्धनका ८ दलको समर्थन छ। उनलाई महन्थ ठाकुर नेतृत्वको लोकतान्त्रिक समाजवादी पार्टी(लोसपा)का सांसदले पनि उनलाई मत हालेका थिए ।

मधेसको सभामुखमा एमालेका मण्डल निर्वाचित

धनुषा क्षेत्र नं. १ को २ बाट प्रदेशसभामा दोस्रो कार्यकालका लागि निर्वाचित मण्डल ७४ मत पाएर सभामुखमा निर्वाचित भएका छन् । उनका प्रतिस्पर्धी कांग्रेसका जंगीलाल रायले २९ मत पाए । रायलाई कांग्रेस र नेकपा (एस) का सांसदहरुले मत दिए।

१ सय ७ जना सांसद रहेको मधेस प्रदेशसभाको मंगलबारको बैठकमा १ सय ३ जना सांसदको उपस्थिति थियो । सभामुखमा एमालेका मण्डललाई निर्वाचित गर्न माओवादी(केन्द्र)का संसदीय दलका नेता भरतप्रसाद साहले प्रस्ताव पेस गरेका थिए । उनको प्रस्तावमा एमालेका संसदिय दलका नेता सरोजकुमार यादव, जनमत पार्टीका संसदीय दलका नेता महेश यादव र जसपाका सांसद रामआशिष यादवले समर्थन जनाएका थिए ।

यस्तै, कांग्रेसका सांसद जंगीलाल रायलाई सभामुखमा निर्वाचित गरियोस् भन्ने प्रस्ताव कांग्रेसका सांसद कुमरकान्त झाले प्रदेशसभाको बैठकमा पेस गरेका थिए भने कांग्रेस सांसद जिवछीकुमारी यादवले समर्थन जनाएकी थिइन् ।

को हुन् मण्डल ?

मधेस प्रदेशको सभामुखमा निर्वाचित भएका मण्डल प्रदेशसभाको पहिलो कार्यकालमा माओवादी(केन्द्र)बाट निर्वाचित भएका थिए ।

धनुषाको निर्वाचन क्षेत्र नं. १(२)बाट दोस्रोपटक प्रदेशसभामा जितेका मण्डल प्रदेशसभाको पहिलो कार्यकालमा प्राकृतिक श्रोत तथा वातावरण समितिका सभापतिसमेत रहे ।

अध्यापन पेशामा रहेका मण्डल माओवादीको जनयुद्धकालमा भूमिगत भएका थिए । माओवादीको धनुषा जिल्ला नेतृत्वसमेत सम्हालिसकेका मण्डल नेकपा विभाजन हुँदा एमालेमै बसिरहे । त्यसपछि उनलाई माओवादी(केन्द्र)ले प्रदेशसभा सांसद पदबाट निलम्बनसमेत गरेको थियो । प्रदेशसभाको दोस्रो कार्यकालमा मण्डल एमालेबाट उम्मेदवार भएर चुनाव जितेका हुन् ।

प्रकाशित : माघ ३, २०७९ १७:१३
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?