तस्करीका सामान दिनहुँ बरामद

ओमप्रकाश ठाकुर

सर्लाही — सर्लाहीमा दिनहुँ भन्सार छलीका सामानसहित तस्कर पक्राउ पर्न थालेका छन् । प्रहरीले केही दिनयता झन्डै ४ लाख बराबरको सामानसहित ७ भारतीय तथा ५ नेपाली गरी १२ जनालाई नियन्त्रणमा लिएको छ । 

सर्लाहीको बलरा, सिमरा फेन्हारा, बाराउधोरण, त्रिभुवननगर, संग्राम्पुरलगायत नाकाबाट निर्वाध रूपमा तस्करी हुँदै आएको थियो । पछिल्लो समय यस क्षेत्रमा प्रहरीले कडाइ गरेको छ । किरानाका सामान, भारतीय कमसल मललगायत वस्तु नियन्त्रणमा लिइएको प्रहरीले जनाएको छ ।

प्रहरीले गत बुधबार सदरमुकाम मलंगवाबाट दुईवटा भारतीय नम्बर प्लेटका मोटरसाइकलमा भन्सार छलेर ल्याउँदै गरेको दुई बोरा सुर्तीसहित मोटरसाइकल र चालकलाई नियन्त्रणमा लिई भन्सारमा बुझाएको छ । सोही दिन मलंगवा नगरपालिका–९ बाट प्रहरीले अवैध रूपमा भारतबाट ल्याइएको किरानाका सामान पनि नियन्त्रणमा लिएर भन्सारमा बुझाएको छ ।

ब्रह्मपुरी गाउँपालिका–४ त्रिभुवननगरबाट बा९३प ८३९८ नम्बरको मोटरसाइकलमा अवैध रूपमा भारत लैजान लागिएको २ बोरा सोफी रक्सी बरामद गरेर भन्सारमा बुझाइएको छ । बुधबार मात्रै प्रहरीले मोटरसाइकलबाहेक ३ लाख रुपैयाँको सामान बरामद गरी भन्सारमा बुझाएको हो ।

यस्तै, बिहीबार प्रहरीले पर्सा गाउँपालिका–२ बाट भन्सार छली गरी ल्याउँदै गरेको १९ हजार मूल्य बराबरको किरानाका सामान बरामद गरी भन्सारमा बुझाएको छ । जिल्लाका प्रहरी प्रवक्ता विजय यादवले सोही दिन मलंगवाबाट अवैध रूपमा ल्याइएको ३४ हजार रुपैयाँ बराबरको लत्ताकपडा पनि बरामद गरी भन्सारमा बुझाइएको जानकारी दिए ।

शुक्रबार भने विष्णु गाउँपालिका–६ मिर्जापुरको जंगलको बाटोबाट प्रहरीले १४ वटा साइकलमा २८ बोरा भारतीय कमसल युरिया मल बरामद गरेको थियो । यस्तै, बलरा नगरपालिका–२ हनुमान चोकबाट पनि प्रहरीले दुईवटा मोटरसाइकलमा १० बोरा युरिया मल बरामद गरेको छ । दुई जना मोटरसाइकल चालकलाई नियन्त्रण लिई अनुसन्धान अघि बढाइएको प्रहरीले जनाएको छ ।

‘मलसहित केही भारतीय पनि पक्राउ परेकाले किसानको नाममा भारतबाट मल तस्करी भइरहेको देखिन्छ, त्यही भएर प्रहरीले उनीहरूलाई पक्राउ गरी अनुसन्धान थालेको छ,’ प्रहरी प्रवक्ता यादवले भने, ‘अन्य किरानाका सामान जिल्ला भन्सारमा बुझाइरहेका छौं ।’

शुक्रबार दिउँसो भने त्रिभुवन– नगरबाट किरानका सामानसहित बीआर ३० एम ०५१४ नम्बरको मोटरसाइकलसमेत नियन्त्रणमा लिइएको छ । यस्तै बरहथवाबाट समेत भारतबाट भन्सार छली ल्याइएका मोटरसाइकलका सामान पनि नियन्त्रणमा लिई अनुसन्धान अघि बढाइएको जिल्लाका प्रहरी उपरीक्षक नरेशराज सुवेदीले जानकारी दिए ।

‘खुला सीमाले भन्सार छलीका घटना व्याप्त छ, चुरेमा भने गाँजा खेती मौलाएको छ,’ सुवेदीले भने, ‘यी दुवै गैरकानुनी भएकाले नियन्त्रण गर्न प्रहरी परिचालन गरिएको छ ।’ सुवेदीका अनुसार चुरेमा अहिले ३२ बिघाको गाँजा फँडानी गरिएको छ ।

प्रकाशित : पुस २८, २०७९ ०९:०६
प्रतिक्रिया
पठाउनुहोस्

लुम्बिनीमा मन्त्री छान्न सकस

कान्तिपुर संवाददाता

काठमाडौँ — मुख्यमन्त्रीमा गिरीको नियुक्तिसँगै सत्ता साझेदार दलहरूबीच भागबन्डा मिलाउन र मन्त्रीको टुंगो लगाउन सकस परेको छ । बढी आन्तरिक प्रतिस्पर्धा माओवादीमा देखिएको छ । मुख्यमन्त्री एमालेले पाएपछि सभामुख माओवादीको भागमा परेको छ । माओवादीले पाल्पाका तुलाराम घर्तीलाई सभामुख बनाउने तयारी गरेको छ । उपसभामुख पाएको राप्रपाले महिलालाई बनाउने तयारी गरेको छ । गुल्मीकी मेनुका खाँण केसी र बाँकेकी मीनाकुमारी श्रेष्ठमध्ये एक जना उपसभामुख बन्ने छन् ।

अर्थ तथा सहकारीसहित तीन मन्त्रालय दाबी गरेको माओवादीमा मन्त्रीका लागि चर्को प्रतिस्पर्धा छ । संसदीय दलका नेता जोखबहादुर महरादेखि हालका स्वास्थ्य तथा जनसंख्या मन्त्री इन्द्रजित थारु र बाँकेकी कृष्णा केसी मन्त्री बन्ने दौडमा छन् । एमालेले भने माओवादीलाई अहिले दुई मन्त्रालय लिन आग्रह गरिरहेको छ । सरकारलाई ७ दलको समर्थन रहेकाले कम्तीमा ४ मन्त्रालय साना दललाई दिने एमालेको तयारी छ । लोसपाले समर्थन गरे पनि तत्काल मन्त्री पाउने सम्भावना नरहेको छलफलमा सहभागी एक नेताले बताए ।

एमालेमा पहिलो चरणमा को मन्त्री बन्ने भन्ने प्रतिस्पर्धा छ । एमालेमा पूर्वमन्त्री एवं दलका उपनेता चेतनारायण आचार्य, भोजप्रसाद श्रेष्ठ, पूर्व प्रमुख सचतेक भूमिश्वर ढकाल र सार्वजनिक लेखा समितिका पूर्वसभापति विष्णु पन्थी मन्त्रीका प्रमुख दाबेदार हुन् । दोस्रो वरीयताको मन्त्रालय पाएको अवस्थामा उपनेता आचार्य आफैं जाने तयारीमा छन् । उनी निकट स्रोतका अनुसार उनले आन्तरिक मामिला, कानुन तथा सञ्चार मन्त्रालय वा भौतिक पूर्वाधारमा जोड गरेका छन् । भूमिश्वर ढकाल पनि भौतिक पूर्वाधार मन्त्रालय लिएर पहिलो चरणमै मन्त्री बन्ने प्रयासमा छन् । राप्रपाले मन्त्रीको विषयमा केन्द्रको निर्देशन कुरिरहेको छ । जसपा र जनमतले पनि भौतिक पूर्वाधार मन्त्रालय वा पर्यटन, ग्रामीण तथा सहरी विकास मन्त्रालयमा दाबी गरिरहेका छन् । नागरिक उन्मुक्तिले चारै जनालाई पुग्ने गरी मन्त्री माग गरिरहेको छ ।

साना दलको समर्थन पनि बटुलेका मुख्यमन्त्री गिरीलाई मन्त्रालयको संख्या घटाउने दबाब पनि छ । अहिले लुम्बिनीमा १३ मन्त्रालय छन् । गिरी बढीमा ११ मन्त्रालय बनाउने तयारीमा छन् । तर, साना दललाई समेट्न मन्त्रालय यथावत् राख्नुपर्ने दबाब पनि बढेको छ । दलहरूबीच मन्त्रालयको भागबण्डा नमिलेको अवस्थामा र दलहरूमा मन्त्रीको टुंगो नलागे माओवादीबाट संसदीय दलका नेता महरा र एमालेबाट ढकालसहित तीन सदस्यीय मन्त्रिमण्डलसहित बिहीबार शपथ लिने तयारी गरेका छन् । सहमति नजुटेको अवस्थामा दुई मन्त्रीलाई बिना विभागीय मन्त्रीको शपथ खुवाउने सम्भावना छ ।

प्रकाशित : पुस २८, २०७९ ०९:०६
पूरा पढ्नुहोस्
प्रतिक्रिया
पठाउनुहोस्
×