सिरहा — घाँस काट्न जंगलमा गएकी सिरहा मिर्चैयाकी एक महिलाको मंगलबार हत्या भएको खुलासा भएको छ । मिर्चैया नगरपालिका–२ की २६ वर्षीया लक्ष्मीनियाँ कापरको शव अरहिया सामुदायिक वनमा हत्या भएको अवस्थामा मंगलबार अपराह्न फेला परेको प्रहरीले जनाएको छ ।

मिर्चैया नजिकै रहेको सामुदायिक वन कर्जन्हा नगरपालिका–६ मा पर्छ । इलाका प्रहरी कार्यालय मिर्चैयाका प्रमुख डीएसपी हरि वलीले जंगलमा हत्या गरेको अवस्थामा कापरको शव भेटिएको र कापरको घाँटी र पेटमा धारिलो हतियार प्रहारबाट हत्या भएको देखिएको जानकारी दिए ।

प्रहरीका अनुसार घाँस काट्न मृतक लक्ष्मिनियासँगै अर्की एक महिला पनि गएकी थिइन् । दुई जना जंगल गएका बेला लक्ष्मिनियालाई तीन जना युवाले लछार–पछार गर्न थालेपछि जंगलमा लुकेकी अर्की महिलाले गाउँमा हत्या खबर गरेका थिइन् । गाउँलेले घटनाबारे प्रहरीलाई जानकारी गराएपछि प्रहरी घटनास्थल पुगेको डीएसपी वलीले जानकारी दिए ।

स्थानीयले घटनालगत्तै तीन जनाको नाममा किटानी जाहेरी दर्ता गर्न प्रहरीलाई दबाब दिएका थिए । घटनाको अनुसन्धानपछि मात्र जाहेरी दर्ता गर्ने भनेपछि विरोधमा स्थानीयले पूर्व–पश्चिम राजमार्गको मल्हनीया खण्डमा अपरान्ह ४ बजेदेखि २ घण्टासम्म राजमार्ग अवरुद्ध पारेका थिए । उनीहरुले दोषीलाई तत्काल पक्राउ गरी कारबाहीको माग गर्दै सडकमै टायर बालेर राजमार्ग अवरोध गरेका थिए । राजमार्ग अवरोध दुई घण्टापछि खुलेको थियो ।

घटनाको अनुसन्धान भइरहेको र मृतक लक्ष्मिनियासँगै गएकी महिलाको बयानको आधारमा एक जनालाई पक्राउ गरी अनुसन्धान भइरहेको डीएसपी वलीले जानकारी दिए ।