१८.१२°C काठमाडौं
काठमाडौंमा वायुको गुणस्तर: १२४

नारायणी रंगशालाको प्यारापिट निर्माण सुस्त

पर्सा — वीरगन्जस्थित नारायणी रंगशालाको प्यारापिट निर्माण जिम्मा पाएको कम्पनीले भुक्तानी नपाएको गुनासो गरेको छ । भुक्तानीको समस्याले निर्माण सुस्त छ । राष्ट्रिय खेलकुद परिषद्ले रंगशालाको ब्लक ‘सी’ को दुईवटा प्यारापिट निर्माणका लागि ४ करोड ९९ लाख ४८ हजारमा टेन्डर आह्वान गरेको थियो । रोशन/सागर ज्वाइन्ट भेन्चरले ४ करोड २५ लाख ७६ हजार रुपैयाँमा ठेक्का सकार गरेको थियो ।

नारायणी रंगशालाको प्यारापिट निर्माण सुस्त

२०७७ पुस २२ देखि कार्यादेश पाई ठेकेदारले काम सुरु गरेकोमा हालसम्म ७० प्रतिशत निर्माण सकिएको छ । जसबापत उसले राखेपबाट १ करोड ४९ लाख रुपैयाँ भुक्तानी पाएको छ । २०७९ असार २२ सम्म काम सम्पन्न गरिसक्नुपर्नेमा कोरोनाकालको कारण कामले गति लिन नसकेपछि म्याद थप गरी २०७९ चैतसम्मको अवधि दिइएको छ । हाल ९ दशमलव ९ मिटर लामो १४ सिँढी भएको र ६ दशमलव ४ मिटर लामो ८ सिँढी भएको गरी २ वटा प्याराफिट निर्माण गरिँदै छ ।

ठेकेदार सागर निर्माण सेवाका प्रोपाइटर उमेश क्षेत्री ७० प्रतिशत काम सम्पन्न हुँदा पनि कामअनुरूपको भुक्तानी नपाउँदा आफूलाई समस्या भएको बताउँछन् । ‘काम धेरै भइसक्यो, चैतमा काम नै सकिन्छ, तर जति मागे पनि भुक्तानी पाइएको छैन,’ उनले भने, ‘तैपनि मैले काम रोकेको छैन, बैंकबाट १ करोड रुपैयाँ ऋण लिएर मासिक ५० हजार ब्याज तिरेर काम गरिरहेको छु ।’

५ महिनाअघि नै आफूले काम भएअनुरूपको बिल पेस गरिसकेकोमा ‘अर्थ मन्त्रालयबाट स्वीकृति भएर आएको छैन’ भनी राखेपले झुलाउने काम गरेको उनले बताए । रंगशालाको पूर्व–दक्षिण कुनाको २ वटा जीर्ण प्यारापिट भत्काएर नयाँ निर्माण भइरहेको छ ।

प्रकाशित : मंसिर २२, २०७९ १०:०६
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?