कुखुराको फार्ममा १८० केजी गाँजा बरामद- मधेस - कान्तिपुर समाचार
कान्तिपुर वेबसाईट
AdvertisementAdvertisement

कुखुराको फार्ममा १८० केजी गाँजा बरामद

शिव पुरी

रौतहट — रौतहटको सदरमुकाम गौरस्थित नेपाल भारत सीमा क्षेत्रमा रहेको एक कुखुरा फार्ममा जमिनमुनि गाडेको अवस्थामा प्रहरीले १८० किलो गाँजा बरामद गरेको छ । युवकसहित बरामद गरेको गाँजाको प्रहरीले आइतबार सार्वजनिक गरेको हो ।

गौर नगरपालीका– ३ स्थित भारतीय व्यापार अफरोज मियाले सञ्चालन गरेको फलक पोल्ट्री (कुखुरा) फार्मबाट शनिबार साँझ १२ पोकामा १ सय ८० किलो गाँजा बरामद गरेको प्रहरीले जनाएको छ । कुखुरा फर्मको जमिनमुन‍ि गाडेको अवस्थामा गाँजा फेला पारेको जिल्ला प्रहरी प्रमुख एसपी बीरबहादुर बुढामगरले बताए ।

‘मकवानपुरबाट गाँजा ल्याएको भन्ने प्रारम्भिक अनुसन्धानबाट खुल्न आएको छ,’ उनले भने,‘गाँजा कहाँ लैजान लागेको र यसको मुख्य मानिस को हो भन्ने अनुसन्धानबाट चाँडै पत्ता लाग्छ ।’ मकवानपुरबाट गाँजा ल्याउने ट्रक र चालकलाई समेत नियन्त्रणमा लिएको प्रहरीले जनायो ।

जिल्ला प्रहरीका अनुसार गाँजा ल्याउने वाग्मती प्रदेश ०१–००६ ख २८३० नम्बरको ट्रक र चालक मकवानपुरका सुरेन्द्र स्याङ्तानलाई नियन्त्रणमा लिएर अनुसन्धान थालेको छ । कुखुरा फार्मका सञ्चालक मियाँ फरार छन् । फर्ममा रहेको ट्रक र चालकलाई सोधपुछ गर्दा मकवानपुरबाट गाँजा ल्याएको खुलको हो । केही समय यता जिल्लामा गाजाको ओसारपसार बढेको पाइएको छ ।

एक महिना अघि गौर नगरपालिका–२ स्थित लालबकैया नदी हुँदै भारत गाँजा तस्करी गर्न लागेको अवस्थामा अस्थायी प्रहरी पोष्ट महादेवपटी र सशस्त्र प्रहरी बल नेपाल बेस क्याम्प गौरको संयुक्त टोलीले १७ पोका गाँजा फेला पारेको थियो । प्रहरीलाई देखेपछि गाजा बोक्ने समूह फरार भयो । पोका खोलेर हेर्दाभित्र २०४ किलो लागूऔषध गाँजा बरामद भएको डिएसपी सुनिल मल्लले बताए ।

प्रकाशित : मंसिर १८, २०७९ १३:३३
प्रतिक्रिया
पठाउनुहोस्

लुम्बिनीको राजधानी दाङमा तत्काल नसार्न एमाले रुपन्देहीको माग

अमृता अनमोल

बुटवल — नेकपा एमाले रुपन्देही जिल्ला कमिटीले बिनापूर्वाधार लुम्बिनी प्रदेशको राजधानी बुटवलबाट तत्काल नसार्न भन्दै ध्यानाकर्षण गराएको छ ।

वर्तमान कामचलाउ सरकारले सस्तो लोकप्रियताका लागि पूर्वाधार तयार नभएको अवस्थामा दाङको भालुवाङमा राजधानी सार्ने हतार गरिरहेको भन्दै यस्तो काम तत्काल रोक्न माग गरेको हो ।

प्रदेश सरकारले बुटवलबाट विभिन्न कार्यालयहरू सार्न थालेपछि एमाले रुपन्देहीका अध्यक्ष तेजेन्द्र केसीले आइतबार विज्ञप्ति जारी गर्दै नयाँ प्रदेशसभा निर्वाचित भइसकेको अवस्थामा कामचलाउ सरकारले कार्यालय थालेको राजधानी सार्ने काम तुरुन्त रोक्न माग गरेको छ ।

आवश्यक पूर्वाधारबिना कार्यालयहरू सार्ने हतार नगर्न सरकारको ध्यानाकर्षण गराएको हो । नयाँ प्रदेशसभा निर्वाचित भइसकेको अवस्थामा नयाँ प्रदेश सरकारले यो काम गर्दा उपयुक्त हुने एमालेको ठहर छ ।

विज्ञप्तिमा बुटवलमा राजधानीका लागि आवश्यक पर्ने सबै पूर्वाधारहरू रहेको अवस्थामा पूर्वाधार नभएको स्थानमा राजधानी सार्नु गलत भएको उल्लेख गरिएको छ । यद्यपि एमाले महासचिव शंकर पोखरेल नेतृत्वको तत्कालीन लुम्बिनी प्रदेश सरकारले स्थायी राजधानी दाङ तोकेको थियो । यसअघि कर्मचारीहरूले समेत राजधानी सार्ने हतार नगर्न सरकारलाई आग्रह गरेका थिए ।

प्रकाशित : मंसिर १८, २०७९ १३:१४
पूरा पढ्नुहोस्
प्रतिक्रिया
पठाउनुहोस्
×