दलको नेता बन्न दौडधुप- मधेस - कान्तिपुर समाचार
कान्तिपुर वेबसाईट
AdvertisementAdvertisement

दलको नेता बन्न दौडधुप

बहुमत नपुग्ने भएपछि प्रदेश सरकारको नेतृत्व पाउन पहिला दलको नेता बन्ने प्रयास 
सन्तोष सिंह

धनुषा — मधेसमा संसदीय दलको नेता बन्न प्रदेश सांसदले दौडधुप बढाएका छन् । प्रदेश सरकार बनाउन कुनै पनि दलको बहुमत नपुग्ने भएपछि नेतृत्वमा पुग्ने महत्त्वाकांक्षाका साथ सांसदहरूले पहिला दलको नेता बन्न कसरत थालेका हुन् । दलको नेता सांसदहरूले छान्ने भए पनि त्यो अधिकार खोसेर विगतमा पार्टीका शीर्ष नेतृत्वले सीधै तोक्ने गर्दै आएका थिए ।

त्यसैले पनि शीर्ष नेतालाई रिझाउन सांसदहरूको काठमाडौं आउजाउ बाक्लिएको छ । समानुपातिक सांसद छनोट बाँकी छँदै दलका नेता बन्न निर्वाचित सांसदहरू लबिइङ छन् ।

प्रदेशसभामा प्रत्यक्षतर्फ ६४ सिटमध्ये सबैभन्दा बढी १५ सिट जितेको नेकपा एमालेमा संसदीय दलको नेता बन्न ३ जना प्रतिस्पर्धामा छ । धनुषा–३ (२) बाट निर्वाचित दीपेन्द्र ठाकुर, धनुषा–१ (२) बाट निर्वाचित रामचन्द्र मण्डलले एमाले संसदीय दलको नेतामा दाबी गरेका छन् । माओवादी केन्द्रबाट एमालेमा आएका मण्डल यसअघि प्रदेशसभामा माओवादीको संसदीय दलका नेता थिए । एमालेबाट विद्रोह गरी रौतहटबाट प्रतिनिधिसभामा निर्वाचित प्रभु साहसँग मण्डल नजिक रहेकाले उनलाई पार्टी नेतृत्वले दलको नेता बनाउने सम्भावना कम छ । महोत्तरीबाट निर्वाचित एमालेका अर्का प्रदेश सांसद सरोज यादव पनि संसदीय दलको नेता बन्ने प्रतिस्पर्धामा छन् ।

नेपाली कांग्रेसबाट प्रदेश संसदीय दलको नेतामा रौतहट–१ (२) बाट निर्वाचित कांग्रेसका प्रदेश सभापति कृष्णप्रसाद यादव, धनुषा–३ (१) बाट निर्वाचित रामसरोज यादव र सर्लाही–४ (१) बाट निर्वाचित वीरेन्द्र सिंहले दाबी गरेका छन् । कांग्रेसका प्रदेश सभापति यादव प्रदेशसभामा पहिलो पटक निर्वाचित भएका हुन् । सर्लाहीका सिंह यसअघि प्रदेशसभा सदस्यमा निर्वाचित भएर महिला, बालबालिका, युवा तथा खेलकुदमन्त्री भइसकेका छन् । धनुषाका रामसरोज यादव यसअघि संसदीय दलको नेता हुँदै प्रदेश सरकारमा भौतिक पूर्वाधारमन्त्री भएका थिए ।

कांग्रेस संसदीय दलको नेताका लागि तीनै जना पार्टीका शीर्ष नेतासँग छलफलमा छन् । प्रदेशसभामा प्रत्यक्षतर्फ कांग्रेसका १३ जना सांसद निर्वाचित भएका छन् । कांग्रेसको समानुपातिक मत एमालेभन्दा बढी छ । दोस्रो ठूलो दल कांग्रेसकै नेतृत्वमा गठबन्धनको सरकार बन्ने सम्भावना रहेकाले कांग्रेसमा मुख्यमन्त्रीका आकांक्षीहरू दलको नेता बन्न दौडधुप गरिरहेका छन् ।

प्रदेशसभामा प्रत्यक्षतर्फ ९ जना सांसद भएर तेस्रो दलको हैसियतमा रहेको जनता समाजवादी पार्टी (जसपा) को संसदीय दलमा हालका मुख्यमन्त्री लालबाबु राउत नै दोहोरिने सम्भावना धेरै छ । मधेस प्रदेश सरकारमा ५ वर्षसम्म मुख्यमन्त्री रहेका राउत दलको नेता बन्नेमा कुनै शंका नभएको जसपाका एक सांसदले बताए ।

‘दलका नेतामा दाबी गर्नेहरू निर्वाचनमा पराजित भए,’ ती सांसदले भने, ‘विजय यादव र शैलेन्द्र साह पराजित भएपछि राउत नै दलका नेता बन्नेछन् ।’ जसपाबाट निर्वाचिन निवर्तमान सभामुख सरोजकुमार यादव र धनुषाबाट निर्वाचित रामाशिष यादवले पनि संसदीय दलको नेता बन्ने इच्छा देखाएका छन् ।

संसदीय निर्वाचनमा पहिलो पटक सहभागी हुँदै मधेस प्रदेशमा सरकार बनाउने निर्णायक सिट जितेको जनमत पार्टीमा पनि संसदीय दलको नेता बन्ने कसरत सुरु भएको छ । सप्तरीबाट ४ र सिरहाबाट २ गरी जनमतका ६ जना सांसद निर्वाचित छन् । समानुपातिकमा जनमत जसपाभन्दा अगाडि छ । जनमतले समानुपातिकमा ३ लाख २४ हजारभन्दा बढी मत पाइसकेको छ । पार्टीमा संसदीय दलको नेता चयनबारे छलफल नभए पनि सप्तरी–२ (१) बाट निर्वाचित सतिश सिंह र सिरहा–४ (१) बाट निर्वाचित त्रिभुवन साहको नाम चर्चामा रहेको जनमतका एक नेताले बताए ।

प्रदेशसभामा प्रत्यक्षतर्फ ७ जना सांसद निर्वाचित भएको लोकतान्त्रिक समाजवादी पार्टी (लोसपा) को संसदीय दलको नेतामा जितेन्द्र सोनलको चर्चा छ । सोनल यसअघि पनि उक्त पार्टीको संसदीय दलका नेता थिए । राजपा हुँदा दलको नेता हुँदै भौतिक पूर्वाधारमन्त्री भएका सोनल जसपाबाट विभाजन भएर लोसपा बन्दा पनि दलको नेतामा निर्वाचित भएका थिए ।

प्रदेशसभामा राष्ट्रिय प्रजातन्त्र पार्टी, नेपाल संघीय समाजवादी पार्टी र नागरिक उन्मुक्ति पार्टीले पनि समानुपातिकबाट १/१ जना सांसद पाउने सम्भावना छ । त्यसो भएमा प्रदेशसभामा एमाले, कांग्रेस, जसपा, जनमत, लोसपा, राष्ट्रिय प्रजातन्त्र पार्टी, नेपाल संघीय समाजवादी पार्टी र नागरिक उन्मुक्ति पार्टी गरी ८ राजनीतिक दल र ६ जना स्वतन्त्र सांसद सहभागी हुनेछन् ।

मधेस प्रदेशमा प्रत्यक्षबाट ६४ र समानुपातिकतर्फ ४३ गरी १०७ जना सदस्य हुनेछन् । प्रत्यक्षबाट ६० पुरुष र ४ महिला निर्वाचित भएका छन् । प्रदेशसभामा यस पटक प्रत्यक्षतर्फ ४१ नयाँ अनुहार थपिएका छन् । अघिल्लो निर्वाचनमा चुनिएका २३ जना सांसद यस पटक दोहोरिएका हुन् । प्रदेश सरकार बनाउन ५४ जना सांसद चाहिन्छ ।

प्रकाशित : मंसिर १७, २०७९ ०८:१२
प्रतिक्रिया
पठाउनुहोस्

मार्बल, टायलमा नगद मार्जिन हट्यो

कान्तिपुर संवाददाता

काठमाडौँ — मुलुकको विदेशी विनिमय सञ्चितिमा सुधार हुन थालेपछि राष्ट्र बैंकले यसअघि कडाइ गरेका केही वस्तुको नगद मार्जिनसम्बन्धी व्यवस्था हटाएको छ ।

शुक्रबार राष्ट्र बैंक विदेशी विनिमय विभागले परिपत्र जारी गरेर मार्बल, टायल, प्लास्टिकलगायत वस्तुको नगद मार्जिनसम्बन्धी यसअघिको व्यवस्था हटाएको हो । यसअघि राष्ट्र बैंकले करिब १४ सय वस्तु आयातका लागि नगद मार्जिनको व्यवस्था गरेको थियो । तीमध्ये अहिले हर्मोनिक कोड ६८ अन्तर्गतका वस्तुको नगद मार्जिनसम्बन्धी व्यवस्था राष्ट्र बैंकले हटाएको हो ।

राष्ट्र बैंकले चालु आर्थिक वर्षको मौद्रिक नीतिमार्फत केही वस्तुको आयातका लागि प्रतीतपत्र खोल्दा नगद मार्जिन राख्नुपर्ने विद्यमान व्यवस्थालाई क्रमिक रूपमा पुनरावलोकन गर्दै लगिने बताएको थियो । ‘केही वस्तुको आयातका लागि प्रतीतपत्र खोल्दा नगद मार्जिन राख्नुपर्ने विद्यमान व्यवस्थालाई क्रमिक रूपमा पुनरावलोकन गर्दै लगिनेछ,’ मौद्रिक नीतिमा भनिएको छ । राष्ट्र बैंकले गत पुस ५ मा गरेको नगद मार्जिनसम्बन्धी व्यवस्थाबमोजिम हर्मोनिक कोड ६८ अन्तर्गतका सबै वस्तु आयात गर्दा शतप्रतिशत नगद मार्जिन राख्नुपर्ने व्यवस्था हटाएको हो । करिब डेढ वर्षअघि राष्ट्र बैंकले मार्बल, टायल, प्लास्टिक, सिमेन्ट, काँचका सामान, सेरामिकलगायत वस्तु आयातका लागि प्रतीतपत्र खोल्दा शतप्रतिशत नगद मार्जिन राख्नुपर्ने व्यवस्था हटेको परिपत्रमा उल्लेख छ ।

गाडी, मोटरसाइकल, हवाईजहाजलगायतमा बिछ्यौनाका रूपमा प्रयोग हुने सामग्रीलगायत आयातका लागि नगद मार्जिन राख्नुपर्ने व्यवस्था खारेज गरेको हो । सार्वजनिक खरिद कानुन लागू हुने निकायले सार्वजनिक निकायहरूले सार्वजनिक खरिद कानुनअन्तर्गत बोलपत्र आह्वान गरी खरिद गर्दा त्यस्तो बोलपत्रदाताले सम्बन्धित सार्वजनिक निकायलाई आपूर्ति गर्ने समान आयात गर्दासमेत नगद मार्जिन राख्नु नपर्ने व्यवस्था राष्ट्र बैंकले गरेको छ ।

प्रकाशित : मंसिर १७, २०७९ ०८:०९
पूरा पढ्नुहोस्
प्रतिक्रिया
पठाउनुहोस्
×