अनुगमन छल्न औषधि पसल बन्द- मधेस - कान्तिपुर समाचार
कान्तिपुर वेबसाईट
AdvertisementAdvertisement

अनुगमन छल्न औषधि पसल बन्द

अवधेशकुमार झा

राजविराज — औषधि व्यवस्था विभागबाट अनुगमन टोली आएको खबर पाएसँगै राजविराज क्षेत्रका औषधि पसल बन्द गर्दै सञ्चालक सम्पर्कविहीन बने । विभागको विराटनगरस्थित कार्यालयबाट अनुगमन टोली आएको सुनेपछि औषधि पसलेहरूको भागाभाग भएको हो । विभागको टोली मंगलबार साँझ अनुगमन गर्न पुगेको थियो ।

‘एक–दुई वटा पसल छिर्न नपाउँदै राजविराजका अधिकांश पसल बन्द भए,’ अनुगमन टोलीका प्रमुख फार्मेसी अधिकृत टेकेन्द्र मिश्रले भने, ‘अनुगमन टोली आउनेबित्तिकै पसल बन्द गरेर भाग्नुको मतलब राजविराजका औषधि पसलमा समस्या र विकृति छ ।’

पसल दर्ता भए–नभएको, गुणस्तरीय औषधि र भण्डारण राम्रो रहे–नरहेको र सरकारले प्रतिबन्धित गरेका औषधि राखेको लगायतका विषयमा छानबिन गर्न अनुगमन टोली आएको थियो । ‘पसलै बन्द गरेर सञ्चालक फरार भए ।

राजविराजका औषधि पसलहरूको अनुगमन गर्न सकेनौं,’ मिश्रले भने, ‘सोमबार पनि सप्तरीकै बोदेवरसाइनमा अनुगमन गरेकोले त्यहाँबाट सूचना चुहिएको हो ।’ उनले यहाँ पुनः अनुगमन गरिने बताए । स्रोतका अनुसार राजविराजमा रहेका अधिकांश औषधि पसलहरू मापदण्डविपरीतका छन् ।

यस्तै औषधि बिक्री गर्ने अनुमति पाएका भन्दा फरक व्यक्तिले पसल सञ्चालन गरिरहेकाले अनुगमनबाट डराएर सञ्चालक भागाभाग गरेको एक औषधि व्यवसायीले बताए ।

यसअघि पनि राजविराजमा औषधि पसल अनुगमन गर्न टोली आउँदा पसल बन्द गरेर भागाभाग भएको थियो । सञ्चालकमध्ये केहीले सँगै क्लिनिकसमेत राखेको र धेरैजसो क्लिनिकहरू मापदण्डविपरीत छन् । यसका अतिरिक्त राजविराजमा बग्रेल्ती खुलेका प्याथोलोजी सेन्टरहरूसमेत अनुमति नलिएका र मापदण्डविपरीतका छन् ।

‘अनुगमन गर्न आउँदा पसल बन्द गरेर भाग्दा सिल पनि गर्न मिल्दैन,’ मिश्रले भने, ‘अब प्रहरीसमेतको सहयोग लिएर अनुगमन गरिनेछ । मापदण्डविपरीत गर्नेलाई कारबाहीको दायरामा ल्याइनेछ ।’

प्रकाशित : मंसिर १५, २०७९ ०८:१७
प्रतिक्रिया
पठाउनुहोस्

दोलखाका १० मतदान केन्द्रमा मतदान जारी

रासस

काठमाडौँ — दोलखाका १० मतदान केन्द्रमा मतदान सुरु भएको छ । मुख्य निर्वाचन अधिकृत डिल्लीरत्न श्रेष्ठका अनुसार आज बिहान ७ बजेदेखि मतदान सुरू भएको हो । ती मतदान केन्द्रमा चार बुथमा आठ हजार पाँच सय १४ मतदाता रहेको उनले जानकारी दिए ।

निर्वाचन आयोगको यही मंसिर ११ गते बसेको बैठकले दोलखाको वैत्यश्वर गाउँपालिका–६ का वैत्यश्वर माध्यमिक विद्यालय मतदान केन्द्रको क, ख र ग, वडा नं २ को जनज्योति माध्यमिक विद्यालय पुतली काठका मतदान केन्द्र क र ख तथा तामाकोसी गाउँपालिका–३ हेल्थपोस्ट भवन जफे मतदान केन्द्रका क र ख गरी सात मतदान केन्द्रमा आज मतदान गर्ने निर्णय गरेको थियो ।

त्यस्तै, वैत्यश्वर वडा नम्बर ३ को कालीढुङ्गा मावि मतदान केन्द्रमा क, ख र ग मतदान केन्द्रमा मतदान सुरू भएको छ । निर्वाचन आयोगले यही मंसिर ४ गते सम्पन्न भएकोे निर्वाचनलाई रद्द गरी सोही ठाउँमा पुनः मतदान गर्ने निर्णय गरेको हो ।

प्रकाशित : मंसिर १५, २०७९ ०८:०७
पूरा पढ्नुहोस्
प्रतिक्रिया
पठाउनुहोस्
×