श्रीमतीको हत्या आरोपमा पक्राउ- मधेस - कान्तिपुर समाचार
कान्तिपुर वेबसाईट
AdvertisementAdvertisement

श्रीमतीको हत्या आरोपमा पक्राउ

कान्तिपुर संवाददाता

राजविराज — श्रीमतीको हत्या आरोपमा सप्तरीबाट एक जना पक्राउ परेका छन् । पक्राउ पर्नेमा राजविराज नगरपालिका–१ रामपुरका हीरालाल रजक छन् । रकम हिनामिना गरेको भन्दै उनले शुक्रबार राति ४० वर्षीया श्रीमती गीतालाई टाउको र निधारमा धारिलो हतियार प्रहार गरी हत्या गरेको प्रहरीले जनाएको छ । 


शनिबार बिहान गीताको शव फेला परेको थियो । मृतकका बुबा गजानन्द रजकले आफ्नी छोरीलाई ज्वाईले नै हत्या गरेको किटानी जाहेरी दिएका छन् । हीरालालविरुद्ध कर्तव्य ज्यान मुद्दामा अदालतबाट सात दिन म्याद लिई अनुसन्धान भइरहेको प्रहरीले जनाएको छ । प्रारम्भिक सोधपुछका क्रममा उनले आफूले भारतको केरलाबाट कमाएर ल्याएको साढे चार लाख रुपैया र घरमा भएको गरगहना गिताले हिनामिना गरेको र सोही विषयमा बिबाद भई कुटपिट गरेको बताएको प्रहरी स्रोतले जनाएको छ ।

सप्तरीमै सोमबार राति एक जनाको घाँटी रेटी हत्या भएको छ । कञ्चनरुप नगरपालिका–१ बैरवाका ५० वर्षीय पप्पु भनिने सञ्जय राउतको हत्या भएको जिल्ला प्रहरीका डीएसपी नरेशकुमार सिंहले जानकारी दिए । सोमबार राति १० बजे आफ्नो घरबाट निस्केका राउत बिहानसम्म नफर्किएपछि परिवारले खोजी थालेको थियो ।

स्थानीयले राउतको घरदेखि डेढ सय मिटर उत्तरमा रहेको पोखरीमा घोप्टो अवस्थामा उनको शव देखेपछि प्रहरीलाई खबर गरेका थिए । डीएसपी सिंहका अनुसार धारिलो हतियार प्रहार गरी उनको हत्या गरिएको छ । घटनास्थलमा जिल्ला प्रहरी प्रमुख एसपी अभिनारायण काफ्लेसहित इलाका प्रहरी कार्यालय कञ्चनपुरको टोली पुगेर अनुसन्धान थालेको छ । थप अनुसन्धानका लागि प्रदेश प्रहरी कार्यालय जनकपुरबाट तालिमप्राप्त कुकुर मगाइएको डीएसपी सिंहले जानकारी दिए ।

प्रकाशित : मंसिर १४, २०७९ ०७:४१
प्रतिक्रिया
पठाउनुहोस्

दिनकै योजना बनाउनमा व्यस्त डेसच्याम्प

एजेन्सी

दोहा — फ्रान्सेली प्रशिक्षक डिडियर डेसच्याम्पले मंगलबार करिम बेन्जेमाबारे बोल्न अस्वीकार गरेका छन् । बालोन डी’अर विजेता बेन्जेमा विश्वकपबाट फिर्ता भएयता बिदा मनाइरहेका छन् । रियल म्याड्रिड स्ट्राइकरले खुट्टाको चोटका कारण फ्रान्सेली टिम छाडेका थिए ।

त्यसयता उनी रियुनियन टापुमा देखा परेका थिए । उनी चाँडै रियलको प्रशिक्षणमा फर्कने पनि बताइएको छ । उनी कम्तीमा एक साता त्यस टापुमै रहने भनिएको छ ।

औपचारिक रूपमा अझै पनि फ्रान्सेली टिमको सदस्य रहेका बेन्जेमाबारे सोधिएको प्रश्नमा डेसच्याम्प चुप रहे । प्रशिक्षकले डेसच्याम्पको स्थानमा केही पनि नयाँ खेलाडी टिममा राखेका छैनन् । ‘यो अप्ठ्यारोमा पार्ने प्रश्न हो, तर यी सबै मेरो मनमा छैन । मलाई कसले के, कहाँ र किन कस्तो भनिरहेको छ, मतलब छैन,’ उनले भनेका छन् । ट्युनिसियाविरुद्धको खेलअघि मिडियासामु प्रस्तुत हुने क्रममा बेन्जेमाबारे प्रशिक्षकले अनभिज्ञता देखाएका हुन् ।

उनले भने, ‘मैले टिम छाडेयता बेन्जेमासँग कुरा गरेको छैन । सबैलाई थाहा छ, उनको स्थिति कस्तो छ र उनी कति समय मैदानबाहिर रहनेछन् । म भने अहिले यहाँ उपलब्ध २४ खेलाडीमै केन्द्रित छु । कसैले चाहन्छ भने यो विषयमा म तर्क गर्न सक्छु । तर मैले यस्तो काम गर्ने पनि छैन, किनभने प्रत्येक दिनको योजनामा व्यस्त छु ।’ फ्रान्सेली फुटबल संघले बेन्जेमालाई तीन साताका आराम चाहिएको बताएको छ । त्यसको अर्थ विश्वकपको फाइनलअगाडिसम्म पनि उनी पूर्णतः फिट हुने छैनन् ।

फ्रान्स समूह ‘डी’ को सुरुआती दुवै खेलमा विजयी छ । टोलीले अस्ट्रेलिया र डेनमार्कमाथि जित निकालेको हो । बुधबार ट्युनिसियाविरुद्धको खेलमा बराबरी गरे पनि फ्रान्स समूह विजेता हुँदै अन्तिम १६ मा प्रवेश गर्नेछ । फ्रान्सलाई गोलअन्तरको धेरै फाइदा रहेको स्थितिमा डेनमार्कविरुद्धको खेल गुमाए पनि उसलाई खासै घाटा नहुन सक्छ । त्यसैले प्रशिक्षक डेसच्याम्प अन्तिम १६ को खेलअगाडि केही नयाँ खेलाडीलाई मौका दिन सक्ने स्थितिमा हुनेछ ।

उनी भन्छन्, ‘सबैलाई थाहा छ, हामी अर्को चरण पुगिसकेका छौं, जसरी ब्राजिल र पोर्चुगल पुगेका छन् । त्यसैले हामीलाई टिममा केही परिवर्तन गर्ने अवसर हुनेछ । तर हामी यो तेस्रो खेललाई कम महत्त्व दिन चाहँदैनौं । हामी राम्रो नतिजाका लागि सक्दो प्रयास गर्ने पक्षमै छौं । यो विश्वकप हो र हामी जितको लय कायम राख्न चाहन्छौं । हामीलाई जित आवश्यक नहुन पनि सक्नेछ, तर हामी यही नतिजाका लागि नै खेल्नेछौं ।

ट्युनिसियालाई अर्को चरण पुग्ने सम्भावना जीवन्त राख्न एजुकेसन सिटी स्टेडियममा हुने यो खेल जित्नैपर्ने हुन्छ । संयोगले ट्युनिसियाको टिममा फ्रान्समा जन्मेका १० खेलाडी रहेका छन् । ट्युनिसियाले अहिलेसम्म दुईपल्टको विश्वकप विजेता फ्रान्सलाई हराउन भने सकेको छैन । प्रशिक्षक जलेल कादरी भन्छन्, ‘म सबै खेलाडीलाई के भन्न चाहन्छु भने असम्भव भनेको केही छैन । हामी अझै पनि प्रतियोगितामा कायम छौं ।’

प्रकाशित : मंसिर १४, २०७९ ०७:३९
पूरा पढ्नुहोस्
प्रतिक्रिया
पठाउनुहोस्
×