विजय र्‍यालीको विवादले राजमार्ग अवरुद्ध- मधेस - कान्तिपुर समाचार
कान्तिपुर वेबसाईट
AdvertisementAdvertisement

विजय र्‍यालीको विवादले राजमार्ग अवरुद्ध

भरत जर्घामगर

सिरहा — विजय र्‍यालीमा सहभागी एमाले कार्यकर्ताले निकटतम प्रतिद्वन्द्वी माओवादीका विश्वनाथ साहका दाइको घरमा ढुंगामुढा गरेको विरोधमा अवरुद्ध पूर्व–पश्चिम राजमार्ग ८ घण्टापछि खुलेको छ । घटनामा संलग्नलाई कारबाही गर्ने सहमतिपछि राजमार्ग खुलेको हो । 

सिरहा–३ बाट प्रतिनिधिसभामा निर्वाचित लीलानाथ श्रेष्ठको विजय र्‍यालीमा सहभागी एमाले कार्यकर्ताहरूले शुक्रबार साँझ साहका दाइको घरमा ढुंगामुढा गरेका थिए । त्यसैको विरोधमा पूर्व–पश्चिम राजमार्ग अन्तर्गत गोलबजार खण्ड अवरुद्ध पारिएको थियो । राजमार्ग अवरुद्ध भएपछि लामो तथा छोटो दूरीका सवारीसाधन पूर्वतर्फ कसहा र पश्चिमतर्फ चोहर्वामा रोकिएका थिए । गोलबजार नगरका पूर्वप्रमुख देवनाथ साहको गोलबजार नगरपालिका–४ स्थित घरमा ढुंगामुढा भएको हो । एक जनालाई कुटपिट पनि गरेको विरोधमा माओवादी केन्द्रका कार्यकर्ताहरूले शनिबार बिहानदेखि राजमार्ग अवरुद्ध पारेका थिए ।

एमाले कार्यकर्ताहरूले ढुंगामुढा गर्दै झ्यालको सिसा फुटाउनुका साथै त्यसो नगर्न आग्रह गरेका स्थानीय ४३ वर्षीय श्रीचन साहलाई कुटपिट गरेका थिए । टाउकोमा चोट लागेका साहको गोलबजारस्थित लाइफ लंग अस्पतालमा उपचार भइरहेको छ । साहको टाउकोमा चार वटा टाँका लगाइएको र उनको अवस्था सामान्य रहेको अस्पतालले जनाएको छ ।

एमालेका श्रेष्ठले सत्ता गठबन्धनबाट माओवादी केन्द्रका उम्मेदवार साहलाई १ हजार १ सय ८२ मतान्तरले पछि पार्दै जित हासिल गरेका थिए । निर्वाचित श्रेष्ठले विज्ञप्ति जारी गरी घटनाप्रति दुःख व्यक्त गरेका छन् । उनले घटनामा संलग्नलाई तत्काल पक्राउ र कारबाही गर्न माग गरेका छन् ।

प्रकाशित : मंसिर ११, २०७९ ०८:१४
प्रतिक्रिया
पठाउनुहोस्

युरोपमा काठको संकट, मूल्य अकासियो

कान्तिपुर संवाददाता

पेरिस — रुस-युक्रेन युद्धका कारण ऊर्जा संकट बढिरहेका बेला जाडोयाम सुरु भएसँगै युरोपमा काठको मूल्य अकासिएको छ । ग्लोबल वुड मार्केटका अनुसार सन् २०२२ को पहिलो त्रैमासिकको तुलनामा दोस्रो त्रैमासिकमा स्विडेनको राउन्डवुड र पल्पवुड दुवैको मूल्य लगभग ९ प्रतिशतले बढेको छ ।

मूल्य बढेपछि फिनल्यान्डमा काठको व्यापार अघिल्लो वर्षको तुलनामा २३ प्रतिशतले घटेको छ । दाउरामा अत्यधिक माग बढेपछि काष्ठ उद्योगको व्यापार घटेको हो । अस्ट्रियामा पनि काठको मूल्य बढेको छ । क्षेत्रीय रूपमा १३० युरो प्रतिघन मिटरको सीमा तोकिएकोमा उक्त सीमा पहिले नै नाघिसकेको ग्लोबल वुड मार्केटले उल्लेख गरेको छ ।

जुलाई २०२० सम्म प्रतिघन मिटर ६१ युरो तीन सेन्टमा बिक्री गरिँदै आएको काठको मूल्य अस्ट्रिया र जर्मनीका केही भागमा हाल ११५ युरो प्रतिक्युबिक मिटरमा बिक्री भइरहेको छ । जर्मनीमा सन् २०२१ को पहिलो ६ महिनादेखि नै काठदाउरामा ठूलो मूल्यवृद्धि भएको हो ।

काठदाउरा स्थानीयले प्रयोग गरिदिँदा धेरै उच्च मागका कारण जर्मन काठ उद्योगलाई वसन्तमा आफ्ना केही सम्झौताहरू पूरा गर्न गाह्रो भएको थियो । खुद्रा क्षेत्रले धेरै उच्च माग र कठिन खरिदको सामना गर्नुपर्‍यो । त्यसैले गर्दा सन् २०२२ को वसन्तमा काठको मूल्यमा व्यापक वृद्धि भएको हो । दाउरा र कोइला जम्मा गर्ने होड चलेपछि काठको चरम अभाव र निर्माणलागतमा उल्लेख्य वृद्धि भएको छ ।

उता केही इस्टोनियाली काठ मिलहरू यो वर्षको अन्त्यमा अस्थायी रूपमा भए पनि बन्द गर्नुपर्ने अवस्थामा पुगेका छन् । प्राकृतिक ग्यासको सट्टा काठ र काठबाट उत्पादन हुने उत्पादनहरूमा स्विच गर्ने ऊर्जा फर्महरूबाट सःमिलहरूले प्रतिस्पर्धाको सामना गरिरहेका छन् । ऊर्जाको मूल्य बढेको बेला काठदाउराको माग अत्यधिक बढेकाले काठ उत्पादकहरूलाई असर गरेको छ । विशेष गरी इस्टोनियाई निर्माण क्षेत्रको मागमा आएको गिरावटले यस वर्षको सुरुदेखि बजार सम्झौता लगभग ५० प्रतिशतले घटेको छ ।

त्यसो त, बढ्दो यातायात मूल्य र बलियो रुबलको पृष्ठभूमिमा ईयू प्रतिबन्धका कारण निर्यात मात्रामा आएको गिरावटले रुसी उत्तर–पश्चिम क्षेत्रमा काठको उत्पादनलाई नाफारहित बनाइदिएको छ । किनभने यो क्षेत्र युरोप नजिक पर्ने हुनाले पनि यस क्षेत्रको काठ उद्योग प्रायः युरोपेली क्षेत्रको निर्यातमा निर्भर छ ।

अप्रिल २०२२ मा कोरोना क्वारेन्टिनका कारण चीनका बन्दरगाहहरूमा गरिएको तालाबन्दीका साथै देशको निर्माण उद्योगमा आएको मन्दीका कारण काठको आयातमा २०.१ प्रतिशतले घट्दा त्यसको मार रुस हुँदै युरोपेली मुलुकमा परेको ग्लोबल वुड मार्केटको अध्ययनले देखाएको छ ।

प्रकाशित : मंसिर ११, २०७९ ०७:५९
पूरा पढ्नुहोस्
प्रतिक्रिया
पठाउनुहोस्
×