विवाह महोत्सवमा राम–सीता मिलन- मधेस - कान्तिपुर समाचार
कान्तिपुर वेबसाईट
AdvertisementAdvertisement

विवाह महोत्सवमा राम–सीता मिलन

कान्तिपुर संवाददाता

जनकपुर — राम–जानकी विवाह महोत्सवको दोस्रो दिन बिहीबार फूलबारी लिला सम्पन्न भएको छ । सातदिवसीय विवाह महोत्सवको क्रममा फूलबारी लीला विशेषरुपले मनाउने चलन छ ।

राम र सीताबीच पहिलो मिलन फूलबारीमै भएको वर्णन विभिन्न धर्मग्रन्थमा उल्लेख छ । सोही जनविश्वासका आधारमा जानकी मन्दिरको उत्तरमा रहेको विवाह मण्डपअगाडिको फूलबारीमा उक्त लिला सम्पन्न गरिएको हो । ‘सिया–पिया मिलन’ नाम दिइएको लीला हेर्न सयौंको सहभागिता थियो ।

फूलबारीमा आफ्ना सहेलीहरूसँग फूल टिपिरहेकी सीता र अनुज लक्ष्मणसँग फूलबारी घुम्न आएका रामबीच पहिलो मिलन भएको लिला देखाइएको थियो । त्यस क्रममा मुख्य गायक (व्यास) महेन्द्र दास सुरिलो स्वरमा गाइरहेका थिए– ‘लागल जनकपुरमे मेला, देखेला मोरा मनमा करेला ।’ सीताको पिताको भूमिकामा रहेका जानकी मन्दिरका महन्थ रामतपेश्वर दास वैष्णव भावुक बनेका थिए, ‘छोरीको विवाह हुने भएपछि पिता भावुक भइहाल्छ नि !’

मंसिर ७ देखि सुरु भएको विवाह महोत्सव मंसिर १३ मा रामकलेवासँगै सम्पन्न हुनेछ ।

प्रकाशित : मंसिर ९, २०७९ ०८:३३
प्रतिक्रिया
पठाउनुहोस्

‘ब्याटम्यान’ शैलीमा फर्किए सन

राजु घिसिङ

दोहा, कतार — दक्षिण कोरियाली स्टार सन ह्युङ–मिन प्रिमियर लिगको लन्डन क्लब टोटेनहम हर्टस्परबाट च्याम्पियन्स लिग खेल्दा फ्याक्चर भएको आँखाको हाडको शल्यक्रिया गरेपछि विश्वकप २०२२ को टिम घोषणा गर्दासम्म खेल्न सक्नेमा शंका थियो । उनी खेल्न सकेन भने टिममा समावेश गर्न वैकल्पिक खेलाडी लिएर प्रशिक्षक पाउलो बेन्टो कतार आएका थिए ।

कतार ओर्लेपछि टिमसँगै ट्रेनिङ थालेका ३० वर्षीय फरवार्ड सन यो विश्वकपको पहिलो खेलमा बिहीबार उरुग्वेविरुद्ध अनुहारमा सुरक्षा मास्क लगाएर ‘ब्याटम्यान’ को रूपमा मैदानमा उत्रिए । उनको कप्तानीमा कोरियाले अल रायनस्थित एजुकेसन सिटी स्टेडियममा ४१ हजार ६ सय ६३ दर्शकमाझ राम्रै प्रदर्शन गरे । तर, पाएका अवसर उपयोग गर्न सकेन । पहिलो हाफमा कोरियाले राम्रो गरेको थियो । दोस्रो हाफमा लय समातेको उरुग्वेले अन्त्यतिर दबाब दियो । उसले अवसर सिर्जना गरेर पनि बललाई गोलमा परिणत गर्न सकेन । त्यसैले पहिलो खेल गोलरहित टुंग्याउँदै कोरिया र उरुग्वेले अंक बाँडे ।

नेपोलीका डिफेन्डर किम मिन–जाएले चोट बोक्दै मैदान छाडेपछि कोरिया दबाबमा परेको थियो । सन र चो गु–सुङले दोस्रो हाफमा पेनाल्टी क्षेत्रबाहिरैबाट प्रहार गरेको बल पोस्ट नजिकबाट बाहिरियो । रियल म्याड्रिडका मिडफिल्डर फेडेरिको भाल्भेर्डेले ९० औं मिनेटमा सशक्त रूपमा प्रहार गरेको बल क्रसबारमा लाग्दै बाहिरिँदा उरुग्वेले ३ अंक जोडने अवसर गुमाएको थियो । इंग्ल्यान्ड, स्पेन र इटालीका ठूला क्लबमा आबद्ध खेलाडीलाई समेटेको उरुग्वेले व्यक्तिगत कौशलअनुसार प्रदर्शन गर्न सकेन ।

प्रशिक्षक डिएगो अलोन्सोले लिभरपुलका फरवार्ड डार्विन नुनेजसँगै भेट्रान लुइस स्वारेजलाई पहिलो रोजाइमा खेलाएका थिए । गोल गर्न नसके पनि नुनेजको प्रदर्शन छरितो रह्यो । लिभरपुल र बार्सिलोनाका पूर्वफरवार्ड स्वारेज भने मैदानमा हराइरहेका थिए । दोस्रो हाफमा एडिन्सन काभानी उत्रिए । तर, दुईपल्टको विश्वकप विजेतालाई जित दिलाउने उनको प्रयास पनि सफल भएन । खेल प्रतिस्पर्धात्मक र हेर्नलायक थियो । तैपनि कोरियाविरुद्ध उरुग्वेको प्रतिस्पर्धा बल गोलमा परिणत हुने गरी पोस्टमा प्रहार गर्न नसकेको पहिलो खेल बन्यो । समूह ‘एच’ मा रहेको कोरियाले दोस्रो खेलमा घानाविरुद्ध प्रतिस्पर्धा गर्नेछ भने उरुग्वेले क्रिस्टियानो रोनाल्डोको कप्तानीमा रहेको पोर्चुगलको सामना गर्नेछ ।

समूह ‘जी’ को पहिलो खेलमा स्विट्जरल्यान्डले क्यामरुनलाई १–० ले पराजित गर्यो । अल जनोब रंगशालामा ब्रिल एम्बोलोले ४८ औं मिनेटमा निर्णायक गोल गरे । घानामा जन्मिएका उनले गोलको खुसी भने मनाएनन् । कीर्तिमान पाँचपल्टको विश्वकप विजेता ब्राजिल रहेको समूहमा स्विट्जरल्यान्डको जित नकआउट चरण प्रवेशका लागि महत्त्वपूर्ण हुनेछ । स्विस टिमले दोस्रो खेलमा ब्राजिलको सामना गर्नेछ भने क्यामरुनको भेट सर्बियासँग हुनेछ ।

बुधबार राति बेल्जियमले क्यानडालाई १–० ले पन्छाउन निकै संघर्ष गर्नुपर्‍यो । मध्यान्तर हुनु ठीकअगाडि मिची बात्सुयीले टबी एल्डरवेइलर्डको लामो क्रसमा क्यानडाका मिलान बोर्जानलाई पन्छाउँदै गोल गरेका थिए । क्यानडाका अल्फोन्सो डेभिसले सुरुमै गोल गरेको भए कथा फरक हुन सक्थ्यो । तर १० औं मिनेटमा बायर्न म्युनिकका स्टार डेभिसको पेनाल्टी प्रहार बेल्जियमका गोलरक्षक थिबाउट कोर्टियसले बचाइदिए । खेलभरि बेल्जियमले भन्दा क्यानडाले धेरै गोल अवसर बुनेको थियो ।

प्रकाशित : मंसिर ९, २०७९ ०८:३२
पूरा पढ्नुहोस्
प्रतिक्रिया
पठाउनुहोस्
×