६ स्थानमा स्वतन्त्र अघि- मधेस - कान्तिपुर समाचार

६ स्थानमा स्वतन्त्र अघि

प्रदेशका ३२ सिटमध्ये कांग्रेस ८, एमाले ७, जसपा ५, माओवादी २, एस २, लोसपा १ र जनमत १ स्थानमा अगाडि
मधेस ब्युरो

जनकपुर — मधेस प्रदेशमा प्रतिनिधिसभाका ३२ सिटमध्ये ६ वटामा स्वतन्त्र उम्मेदवार अगाडि छन् । मंगलबार साँझसम्म सर्लाहीका दुई, रौतहटका दुई, महोत्तरीको एक र बाराको एउटा क्षेत्रमा स्वतन्त्र उम्मेदवार मतगणनामा अगाडि देखिएका हुन् । स्वतन्त्रमध्ये कोही गठबन्धनका कारण दलबाट बागी भएका थिए भने कसैले दलको टिकटलाई पन्छाउँदै स्वतन्त्रतर्फ उम्मेदवारी दिएका थिए । 

महोत्तरी–३ मा स्वतन्त्र उम्मेदवार रामआधार कापर मतगणनाको सुरुवातदेखि नै अग्रस्थानमा छन् । कापरलाई लोकतान्त्रिक समाजवादी पार्टी (लोसपा) का अध्यक्ष महन्थ ठाकुरले पछ्याइरहेका छन् । ठाकुरलाई भने जनता समाजवादी पार्टी (जसपा) का उम्मेदवार हरिनारायण यादवले पछ्याएका छन् । कापर ठाकुरभन्दा करिब दोब्बर मतले अगाडि छन् । महोत्तरी–३ मा मतगणना सुस्त छ । ५९ हजार ३ सय २१ मत खसेकोमा मंगलबार अपराह्नसम्म १० हजार मत मात्र गनिएको छ । महोत्तरी–३ मा ठाकुरलाई सत्ता गठबन्धनको साथ थियो भने जसपाका यादवलाई एमालेले सघाएको थियो । एमालेमा रहेका कापरले भने टिकट नपाएपछि त्यहाँबाट स्वतन्त्र उम्मेदवारी दिएका हुन् ।

यस्तै, बारा–२ मा स्वतन्त्र उम्मेदवार रामकिशोरप्रसाद यादव अग्रस्थानमा छन् । स्वतन्त्र उम्मेदवार यादवले पनि मतगणना थालिएदेखि नै अग्रता कायम राखेका छन् । उनलाई माओवादीका शिवचन्द्रप्रसाद कुशवाहाले पछ्याइरहेका छन् । मंगलबार अपराह्नसम्म यादव कुशवाहाभन्दा ८ सय मतले अगाडि छन् । बारा–२ मा जसपाका उम्मेदवार रामसहायप्रसाद यादव तेस्रो स्थानमा छन् । उनले ०७४ को निर्वाचनमा यही क्षेत्रबाट जितेका थिए । स्वतन्त्र उम्मेदवार रामकिशोर जसपाका केन्द्रीय सदस्य थिए । जसपाले टिकट नदिएपछि उनी स्वतन्त्र उम्मेदवार बनेका हुन् । यसअघि उनी दुईपटक संसदीय निर्वाचनमा पराजित भएका थिए ।

सर्लाहीका दुई निर्वाचन क्षेत्रमा दललाई पछि पार्दै प्रतिनिधिसभामा स्वतन्त्र उम्मेदवारले अग्रता कायम राखेका छन् । ४ निर्वाचन क्षेत्र रहेको सर्लाहीमा क्षेत्र–१ र ४ मा गठबन्धनका उम्मेदवारलाई पछि पार्दै स्वतन्त्र अगाडि छन् । सर्लाही क्षेत्र–१ मा मतगणनाको सुरुदेखि अग्रस्थानमा रहेका स्वतन्त्र उम्मेदवार मानबहादुर खड्कालाई सत्ता गठबन्धनका तर्फबाट लोसपाका उम्मेदवार रामप्रकाश चौधरी पछ्याइरहेका छन् । मंगलबार दिउँसोसम्ममा खड्काले ४ हजार १ सय १० मत प्राप्त गरेका छन् भने चौधरीले ३ हजार ७ सय ७५ मत प्राप्त गरेका छन् । जसपा–एमाले गठबन्धनबाट जसपाका निवर्तमान सांसद प्रमोद साहले भने २ हजार ६ सय ३६ मत प्राप्त गरेका छन् ।

सर्लाही–४ मा स्वतन्त्र उम्मेदवार अमरेशकुमार सिंह अगाडि छन् । कांग्रेसका निवर्तमान सांसद सिंह पार्टीबाट स्वतन्त्र उम्मेदवार बनेका थिए । मंगलबार अपराह्नसम्म सिंहले २ हजार २ सय ५९ मत प्राप्त गरेर अग्रस्थानमा छन् । उनलाई सत्ता गठबन्धनबाट कांग्रेसका उम्मेदवार नागेन्द्र कुमारले २ हजार २ सय ५४ मत ल्याएर पछ्याइरहेका छन् । माओवादीका बागी नेता शिवपुजन रायकी छोरी मधुमाला कुमारीले १ हजार ६ सय ३३ मत ल्याएकी छन् । यहाँ मतगणनामा ढिलाइ भइरहेको छ । दलका प्रतिनिधिलाई मतपत्र देखाउन नै समय बढी लाग्ने भएकाले गणनामा ढिलाइ भएको निर्वाचन अधिकृतको कार्यालयले जनाएको छ ।

रौतहट–३ र २ मा स्वतन्त्र उम्मेदवारहरू क्रमशः प्रभु साह र किरण साह अगाडि छन् । प्रभु एमालेको तत्कालीन पोलिटब्युरो सदस्य हुन् । अर्का साह एमालेकै नेता हुन् । दुवै नेकपा माओवादीमा सँगै थिए । एक वर्षअघि माओवादी छाडेर जसपामा लागेका किरणलाई एमालेमा ल्याउने प्रभु नै हुन् । प्रभु क्षेत्र–३ बाट यसअघिका तीन निर्वाचनमा विजयी भएका थिए । उनलाई अर्का स्वतन्त्र उम्मेदवार ओमप्रकाश जैसवालले पछ्याइरहेका छन् । प्रभुकै निकट मानिएको रौतहट–२ का किरण साह पनि पार्टीबाट टिकट पाउन नसकेपछि स्वतन्त्र उम्मेदवार भएका हुन् । मुस्लिम बाहुल्य क्षेत्रमा उनले कांग्रेसका नेता एवम पूर्वमन्त्री मोहम्मद आफताब आलमका छोरा फिरदोस आलमलाई पछि पारेका छन् । २०७४ को चुनावमा किरण कांग्रेसका आफताबसँग १ हजार ५ सय ५५ मतले पराजित भएका थिए । मधेसका प्रतिनिधिसभाको ३२ सिटमा कांग्रेस ८, एमाले ७, जसपा ५, माओवादी २, एस २, लोसपा १ र जनमत १ स्थानमा अगाडि छन् । प्रदेशसभाका ६४ सिटमध्ये दुई वटा सिट जनमत पार्टीले जितेको छ ।

सुनिता बराल (महोत्तरी), ओमप्रकाश ठाकुर (सर्लाही), शिव पुरी (रौतहट) र लक्ष्मी साह (बारा)

प्रकाशित : मंसिर ७, २०७९ ०७:४५
प्रतिक्रिया
पठाउनुहोस्

मधेसमा मतगणना ढिलाइ

मतगणनास्थलमा सुरक्षा व्यवस्था कडा
मत सदर र बदरको विषयमा विवाद
कतिपय स्थानमा सर्वदलीय बैठक बस्न ढिलाइ
मधेस ब्युरो

जनकपुर — सर्वदलीय बैठक बस्न ढिलाइले मधेस प्रदेशका आधाजसो निर्वाचन क्षेत्रमा सोमबार साँझसम्म मतगणना हुन सकेको छैन । सोमबार बिहान सप्तरी–२ र धनुषा–३ मा मतगणना थालिएको छ । मधेसमा प्रतिनिधिसभाका ३२ निर्वाचन क्षेत्रमध्ये सोमबार साँझसम्म १४ वटामा गणना सुरु हुन सकेको छैन ।

धनुषामा सर्वदलीय बैठक बस्न नसक्दा मतगणनामा सुरु गर्न ढिलाइ भएको थियो । चार निर्वाचन क्षेत्र रहेको धनुषाका तीन क्षेत्रमा मतगणना अबेर सुरु भएको छ । धनुषा क्षेत्र नं. २ को निर्वाचन अधिकृतको कार्यालय बिदेह नगरपालिकाको तिनकौरियामा मतगणना सुरु गर्न सर्वदलीय बैठक अपराह्न बोलाएपछि साँझदेखि मतगणना सुरु भएको हो ।

पर्सामा मतगणना ढिलो गरी सुरु भएको छ । वीरगन्जस्थित ठाकुरराम बहुमुखी क्याम्पस मतदान केन्द्रमा क्षेत्र नं १ र २ को मतगणना सोमबार दिउँसो १ बजेबाट मात्र सुरु भएको छ । त्यसैगरी, पोखरियास्थित जिल्ला उच्चांगल रामदेव कलवार प्राविधिक विद्यालयमा क्षेत्र नं ३ को दिउँसो साढे ३ बजे र क्षेत्र नं ४ को ३ बजे मतगणना सुरु भएको छ । मुख्य निर्वाचन अधिकृत विनोदकुमार पोखरेलले आइतबार राति मतपेटिका संकलन हुन ढिलाइ भएको तथा सोमबार बिहान सर्वदलीय बैठकमा पार्टी प्रतिनिधि आउन ढिलाइ गरेकाले मतगणना ढिलो गरी सुरु भएको बताए । पर्सामा ३ लाख ४५ हजार ९ सय २८ मतदाता रहेको पर्सामा २ लाख ३८ हजार ६ सय १६ मतदान भएको छ । जुन ६६ दशमलव ८६ प्रतिशत हो ।

मतपेटिका जिम्मा लिनेदेखि दलको बैठकको ढिलासुस्तीले रौतहटको क्षेत्रनम्बर १, २ र ३ को मतगणना सोमबार साँझ सुरु भएको छ । आइतबार चारवटै निर्वाचन क्षेत्रमा मतदान सम्पन्न भए पनि जिल्ला निर्वाचनको कार्यालयले रातभरजस्तै मतपेटिका बुझ्ने काम गरेको थियो । यही कारण मतगणनामा ढिलाइ भएको थियो । जिल्ला निर्वाचन अधिकृत छोटेलाल दासले सोमबार बिहानसम्म मतपेटीको बुझ्ने काम भएको र त्यो सकिनासाथ सर्वदलीय बैठक बोलाउदा दलका प्रतिनिधिहरू आउन ढिला गरेकोले मतगणना प्रभावित भएको बताए । क्षेत्र नम्बर ४ को मतगणना दिउँसो १ बजे सुरु भएको थियो । १,२ र ३ को सर्वदलीय बैठक बस्न ढिला भएको निर्वाचनको कार्यालयले जनायो । जिल्लाको चारवटै निर्वाचन क्षेत्रको ५ सय २३ वटै मतदान केन्द्रको मतपेटिका राति अबेरसम्म मतगणस्थल पुर्‍याइएको थियो ।

जिल्ला निर्वाचनको कार्यालयका अनुसार स्थानीय तहभन्दा अहिलको निर्वाचनमा कम (६२.४७ प्रतिशत) मत खसेको छ । ४ लाख १५ हजार ४५५ मतदाता रहेको यस जिल्लामा २ लाख ५९ हजार ५२८ मत मात्र खसेको निर्वाचनको कार्यालयले जनायो । जिल्लाको कुल चार निर्वाचन क्षेत्रमा प्रतिनिधिसभातर्फ ६७ र प्रदेशसभातर्फ १ सय ४० जना उम्मेदवारहरू चुनावी मैदानमा थिए । मतगणनास्थलमा भने सुरक्षा व्यवस्था कडा बनाइएको छ ।

सर्वदलीय बैठकमा मतगणनाको प्रक्रियाको बारेमा दल र निर्वाचन अधिकृतको कार्यालयबीच साझा धारणा बन्न नसकेपछि सिरहामा पनि मतगणनामा ढिलाइ भएको छ । निर्वाचन अधिकृतको कार्यालयले बिहान १० बजे बोलाएको सर्वदलीय बैठकमा दलहरूले प्रत्येक वडाहरूको छुट्टाछुट्टै मतगणना गर्नुपर्ने माग गरेका थिए । तर निर्वाचन अधिकृतको कार्यालयले भने निर्देशिकाअनुसार दुई वटा वडाहरू मिसाएर मिश्रित रूपले गणना गर्नुपर्ने धारणा राखेपछि दुवै पक्षबीच विवाद उत्पन्न भएको थियो ।

दुवै पक्ष आ–आफ्नो अडानमा कायम रहेपछि दलहरूले मतगणना कार्य बहिष्कार गरेका छन् । दलहरूको सहभागिताविना निर्वाचन अधिकृतको कार्यालयले मतगणना प्रक्रिया नै अगाडि बढाउन सकेका छैनन् । दल र कार्यालयबीच दिउँसो १ बजेबाट पुनः बैठक बसेको थियो । तर पनि सहमति हुन सकेको छैन । ‘वडागत रूपले छुट्टाछुट्टै मत गणना गर्नुपर्छ भनेर हामी सबै दलहरूले साझा प्रस्ताव मान्यौं तर निर्वाचन अधिकृतले मान्नुभएन’, कांग्रेसका प्रतिनिधि सन्तोष उपाध्यायले भने, ‘उहाँहरूले निर्देशिका देखाउनुभयो, निर्देशिका भनेको त विवाद उत्पन्न भएपछि पो देखाइने हो ।’ सिरहा क्षेत्र नं. १ को निर्वाचन अधिकृतको कार्यालयको प्रवक्ता तथा सहायक निर्वाचन अधिकृत अनिल रेग्मीले निर्वाचन निर्देशिकामा दुई वा दुईभन्दा बढी वडाहरूको मतपेटिकाभित्र रहेका मत मिसाएर मतगणना गर्नुपर्छ भन्ने प्रावधान राखिएको हुनाले प्रक्रियामा विवाद उत्पन्न भएको जानकारी दिए । रेग्मीले विवाद समाधानका लागि प्रयास भइरहेको जानकारी दिए ।

सिरहाका चार वटै क्षेत्रको मतगणना प्रक्रियाबारे अहिले सर्वदलीय बैठक भइरहेको जिल्ला निर्वाचन अधिकृतको कार्यालयका प्रमुख इन्दिरा यादवले जानकारी दिइन् । सिरहा क्षेत्र नम्बर १ को लहानस्थित दुलिचन्द अतिथि सदनमा, २ को धनगढीमाई नगरपालिकाको प्रशासकीय भवनमा, ३ को सदरमुकाम सिरहा बजारस्थित चन्द्र माध्यमिक विद्यालयमा र क्षेत्र नम्बर ४ को मतगणना मोहन माध्यमिक विद्यालय मिर्चैयामा हुने भएको छ ।

सिरहामा २ सय २१ मतदानस्थल र ५ सय ५ मतदान केन्द्र थिए । ४ क्षेत्र रहेको सिरहामा ४ लाख २२ हजार ७ सय १२ मतदाता थिए । तीमध्ये सिरहा क्षेत्र नम्बर १ मा ७० हजार ५ सय २४, क्षेत्र नम्बर ३ मा ७३ हजार ७ सय ९ र क्षेत्र नम्बर ४ मा ६५ हजार ५ सय २४ मत खसेको जिल्ला निर्वाचन कार्यालय सिरहाले जनाएको छ । मतगणना सुरु गर्नुपर्ने भए पनि सिरहा क्षेत्र नम्बर २ मा कति मत खस्यो भने यकिन तथ्यांक क्षेत्र नम्बर २ निर्वाचन कार्यालयसँग छैन । कार्यालयका मतको तथ्यांक संकलन गर्ने कृष्णकुमार महतोले अहिलेसम्म तथ्यांक इन्ट्री गर्ने कार्य भइरहेको जानकारी दिए ।

महोत्तरीमा पनि सोमबार साँझसम्म मतगणना सुरु भएको छैन । सर्वदलीय बैठकले मतगणना कसरी गर्ने भन्ने विषयमा सम्झदारी गर्न नसक्दा मतगणना सुरु हुन नसकेको निर्वाचन कार्यालयले जनाएको छ । मतपेटिका काहाँबाट खोल्ने, कस्ता मतलाई सदर र बदर गर्ने भन्ने विषयमा राजनीतिक दलहरूबीच कुरा नमिल्दा मतगणनामा ढिलाइ भएको निर्वाचन कार्यालयले जनाएको छ । महोत्तरी क्षेत्र नं २ मा कस्तो मत सदर र बदर गर्ने भन्ने विषय नमिल्दा गणना सुरु हुन ढिला भएको क्षेत्र नं २ का सहायक निर्वाचन अधिकृत सुनिल चौहानले जानकारी दिए । दलबीच कुरा नमिल्दा केही समयलाई सर्वदलीय बैठक नै स्थगित गरिएको चौहानले बताए । क्षेत्र नं १ मा सदर र बदर मतको विषय र प्रदेशमा कुन क्षेत्रको मतपेटिका पहिले खोल्ने भन्ने विषयमा कुरा नमिल्दा गणना सुरु हुन नसकेको निर्वाचन कार्यालयले जनाएको छ ।

प्रकाशित : मंसिर ६, २०७९ ०७:२२
पूरा पढ्नुहोस्
प्रतिक्रिया
पठाउनुहोस्
×