गौरमा मुख्य निर्वाचन अधिकृतको कार्यालय स्थापना - मधेस - कान्तिपुर समाचार
कान्तिपुर वेबसाईट
AdvertisementAdvertisement

गौरमा मुख्य निर्वाचन अधिकृतको कार्यालय स्थापना 

शिव पुरी

रौतहट — आगामी मंसिर ४ गते हुन लागेको प्रतिनिधि सभा र प्रदेश सभा निर्वाचनका लागी रौतहटको सदरमुकाम गौरमा मुख्य निर्वाचन अधिकृतको कार्यालय स्थापना गरिएको छ ।

जिल्ला अदालत गौरका न्यायाधीश एवं मुख्य निर्वाचन अधिकृत मातृका प्रसाद मरासिनीले मंगलबार एक कार्यक्रमबीच कार्यालयको उद्घाटन गरेका छन् । मरासिनीले निर्वाचन निष्पक्ष धाँधली रहित हुनेमा आफू ढुक्क रहेको बताए । ‘दलका प्रतिनिधिहरुले आचारसंहिता पालना गर्ने प्रतिबद्धता जाहेर गरेका छन्,‘उनले भने,‘जुलुस ,भेला, कोण सभा २४ घन्टा पहिले अनुमति लिनुपर्ने र बाल बालिकाको प्रयोग गर्न नपाउने भनेर दलहरुलाई भनेको छु ।’

गौर नगरपालिकाका नगरप्रमुख शम्भु साहले जिल्लाका केही क्षेत्रमा निर्वाचनको क्रममा गडबडी हुने सम्भावना रहेकोले स्थानीय प्रशासनलाई सजग रहन आग्रह गरे ।

प्रमुख जिल्ला अधिकारी कृष्णबहादुर शाहीले अन्य जिल्लाका अनुभव सुनाउंदै सम्पन्न स्थानिय चुनावबाट जिल्लामा फरक किसिमले चुनाव हुने गरेको बताए । कार्यालय स्थापना कार्यक्रममा दलका प्रतिनिधिहरु समेत उपस्थित थिए । दलहरुले आचारसंहिता पालना गर्ने प्रतिबद्वता व्यक्त गरे । निर्वाचन कार्यालय रौतहटका प्रमुख छोटेलाल दासले जिल्लाको ४ वटा निर्वाचन क्षेत्रमा निर्वाचन कार्यालय स्थापना हुन लागेको बताए ।

क्षेत्र नम्बर एकको गौर, दुईको परोहा, तिनको कटहरिया र चार चन्द्रनिगाहपुरमा कार्यालय स्थापना हुन लागेको दासले जानकारी दिए । जिल्लामा १ सय ५७ वडा रहेका छन् । जसमा २ सय ७६ मतदान स्थल छन् । ५ सय २३ मतदान केन्द्र रहेको दासले बताए ।

प्रकाशित : आश्विन १९, २०७९ ११:५७
प्रतिक्रिया
पठाउनुहोस्

पाल्पाको छहरामा तरबार ठोक्काउँदै निकालियो सराय नाच

माधव अर्याल

पाल्पा — पाल्पाको रैनादेवी छहरा गाउँपालिका–४, छहरास्थित ब्रम्हादेवी मन्दिर तिलकथानमा तरबार ठोक्काउँदै सराय नाच निकालिएको छ । यहाँ जिल्लाकै पहिलो पटक सराय निकाल्ने चलन छ । घटस्थापनादेखि महानवमीसम्म ब्रम्हादेवीमा दुर्गा पूजा गरेर कुविन्डो काटेर पुजा बिसर्जन गर्ने चलन रहेको मन्दिर व्यवस्थापन समितिका अध्यक्ष टिकाराम पोखरेलले बताए ।


नवमीका दिनमा पूजा गरेपछि यहाँको दुर्गा पुजा नै सकिने उनले बताए । मगर जातीको पुजारी राखेर नौ दिनसम्म मन्दिरमा दुर्गा पूजा हुन्छ । सराय नाच नाच्ने त्यसपछि दुर्गा बिसर्जन गर्ने प्रचलन रहेको उनले बताए । सराय नाच्न छिमेकी रैनादेवी छहराको अमलाबास, छहरा, धजाबाँध्ने, जौखर्क लगायतका स्थानबाट तिलकथान ब्रम्हादेवी मन्दिरमा पुग्ने गर्छन् ।

स्थानीयले देवीका मन्दिर र कोतघरमा राखिएका खुँडा, भाला, तरबार प्रदर्शन गर्दै 'वाख्यै वाख्यै हो' भन्दै सराय नाच नाच्छन् । बाजाको तालमा स्थानीय युवाहरू सराय नाचेपछि देवी मन्दिरमा पूजा स्थगन गरिन्छ । युवा पुस्ताको आकर्षण बढाउन पनि सराय नाच्ने परम्परालाई कामय गरेको अध्यक्ष पोखरेलले बताए ।

स्थानीयका अनुसार पछिल्लो समय सराय नाच लोप हुने अवस्थामा पुगेको छ । युवाको बसोवास गाउँमा कमैमात्र छ । कतिपयले यसलाई चासो पनि दिँदैनन् । जसले गर्दा सराय खेल्नेको पनि कमी हुन्छ । स्थानीय कमल रायमाझीका अनुसार युवाकै सक्रियतामा बाजाको तालमा सराय नाच देखाइएको हो । छहराकै भैरवमन्दिरमा द्वादशीमा सराय निकाल्ने चलन छ ।

भुवनपोखरीको रैनादेवीकी पाँच बहिनीमध्ये छहराको ब्रम्हादेवी एक भएको स्थानीय लक्ष्मण बरालले बताए । भुवनपोखरीको रैनादेवी, सोमादीको मछिन्दादेवी, छहराको ब्रम्हादेवी, मुझुङको कालिकादेवी र भैरवस्थानको भैरवदेवीलाई दिदीबहिनी भन्ने स्थानीयको प्रचलन छ । भुवनपोखरीमा भने मंसिरमा हुने न्वागीमा रमाइलो गर्ने प्रचलन छ ।

पहिले सांस्कृतिक पर्वका रुपमा सरायलाई लिने चलन थियो । पछिल्लो समयमा युवा गाउँमा नहुने, बसाइसराइँका कारण मानिसहरुको गाउँमा बसोबास कम भएकाले पनि तरबार र खुँडा नचाउने व्यक्ति नहुँदा समस्या छ । जसले गर्दा सराय लोप हुने अवस्थामा पुगेको हो । जिल्लाका अन्य स्थानमा पूर्णिमाको दिन सराय नाच्ने प्रचलन छ । मुझुङको कालिकादेवी, बन्दीपोखराको लिपिन्देवीमा भने पूर्णिमामा सराय नाच नाच्ने चलन छ ।

जिल्लाकै कोतघरहरुमा खुँडा, तरबार नचाउने चलन छ । कतिपय मगर बस्तीका कोतघरमा भने मगरी संस्कृतिको ठूलो नाच नाच्ने, देवीलाई सम्झने गरिन्छ । केही कोतघरमा भने बली दिएर राँगो, खसी, कुखुरा लगायतको टाउको नचाउने, तरबार ठोक्काएर रमाइलो गर्ने पनि प्रचलन रहेको छ ।

तस्बिरहरु : माधव अर्याल र छहराबाट भुवन रायमाझीको सहयोग

प्रकाशित : आश्विन १९, २०७९ ११:४७
पूरा पढ्नुहोस्
प्रतिक्रिया
पठाउनुहोस्
×