दसैं मान्न खसीबोका बिक्रीकै भर- मधेस - कान्तिपुर समाचार
कान्तिपुर वेबसाईट
AdvertisementAdvertisement

दसैं मान्न खसीबोका बिक्रीकै भर

ओमप्रकाश ठाकुर

सर्लाही — दसैं सुरु भएसँगै सर्लाहीमा खसीबोकाको व्यापार बढेको छ । जिल्लाको दक्षिणी ग्रामीण क्षेत्रमा उत्पादित खसीबोका उत्तरी बजार क्षेत्रमा ल्याई बिक्री गर्ने गरिएको छ । खसीबोका पालन गर्ने धेरै स्थानीयले खसीबोका बेचेरै दसैंको किनमेल गरिरहेका छन् ।

लालबन्दी नगरपालिका–१३ नारायणडाँडाका बलबहादुर थिङले बर्सेनि खसीबोका बेचेरै दसैंको गर्जो टार्दै आएको बताए । उनले बुधबार मात्रै हरिवन बजारमा ४५ हजार रुपैयाँमा २ वटा बोका बेचे । ‘अहिले त्यही पैसाबाट परिवारलाई दसैंको किनमेल गरिरहेका छौं,’ उनले भने ।

अर्का स्थानीय चन्द्र जिम्बाले पनि सोमबार ४ वटा खसी बेचे । १ लाख ५ हजारमा खसी बिक्री गरेका उनी लत्ताकपडा खरिद गर्न आएका बेला छोराछोरीसहित लालबन्दी बजारमा भेटिए । उनका अनुसार गाउँका सबैजसो किसानले खसीबोका बेचेर दसैं मान्ने गरेका छन् । ‘अन्य समयमा पनि आफूहरूको आम्दानीको स्रोत खसीबोका बिक्री नै हो । दसैंका बेला बिक्री गर्न बजारको दुःख हुँदैन, मूल्य पनि पाइन्छ,’ उनले भने, ‘गाउँका अन्य किसानले पनि धमाधम खसीबोका बेचेर लुगाफाटा, मरमसला किनिरहेका छन् ।’

अहिले जिल्लाको बरहथवा, बयलवास, लालबन्दी, हरिवनलगायतका हाटबजारमा खसीबोकाको उल्लेख्य व्यापार भइरहेको छ । खसीबोका खरिद गर्नेको चाप धेरै भएको भन्दै कतिपय व्यापारी किसानकहाँ नै पुगेर खसीबोका खरिद गरी बजारसम्म ल्याइरहेका छन् ।

‘अहिले मुख्य गरी खसीबोकाकै बजार हो । हाटबजारमा बिक्री गर्नेभन्दा खरिद गर्नेको संख्या बढी छ, जसले आपूर्तिमा समस्या आइरहेको छ,’ हरिवनका खसीबोका व्यापारी शेख इद्रिसले भने, ‘पर्याप्त खसीबोका होस् भनी हामी गाउँ–गाउँ पुगेर खरिद गरी यहाँसम्म ल्याएर बिक्री गरिरहेका छौं । यसबाट मुनाफा पनि बढेको छ ।’

सर्लाहीको उत्तरी चुरे क्षेत्रमा व्यावसायिक रूपमै बाख्रापालन हुने गरेको छ । खेती गर्नुभन्दा बढी आम्दानी हुने भएपछि यहाँका किसान बाख्रापालनमा लागेका हुन् । माग बढेका बेला उनीहरूले ४ वटा खसीबोका बेच्दा १ लाखदेखि डेढ लाख रुपैयाँसम्म कमाउँछन् । स्थानीय व्यापारीहरूका अनुसार दसैंको महाअष्टमीका दिनसम्म नै खसीबोकाको व्यापार हुने गर्छ ।

प्रकाशित : आश्विन १४, २०७९ ११:०३
प्रतिक्रिया
पठाउनुहोस्

बजारमा मुस्ताङे स्याउ छ्यापछ्याप्ती

प्रकाश बराल

बागलुङ — दुई साता भयो बागलुङमा चीन र भारतबाट स्याउ आएको छैन । बरु बजारमा भेटिने मुस्ताङको स्याउ प्रतिकेजी २ सय रुपैयाँमा बिक्री भएको छ । अधिकांश उपभोक्ताले मुस्ताङकै स्याउ खोज्ने भएकाले धेरै दिनदेखि अन्य स्याउ मगाउनै छाडेको स्थानीय हीरादेवी शर्माले बताइन् ।

‘मुस्ताङको स्याउ मीठो र सस्तो छ,’ शर्माले भनिन्, ‘अहिले कसैले पनि अरू स्याउ खोजेकै छैनन् ।’ चीन र भारतबाट आउने स्याउ कम्तीमा २ सय ५० देखि ३ सय रुपैयाँसम्म पर्छ ।

थोक व्यवसायीले पनि यतिबेला बाहिरको स्याउ नराखेको बताए । ‘ट्रकमा दैनिक मुस्ताङे स्याउ आएका छन्, त्यसैले अरू स्याउ केही समय बिक्दैनन्,’ थोक विक्रेता मधु केसीले भने, ‘सदरमुकाममा मात्र हैन गाउँगाउँमा पनि मुस्ताङकै स्याउ छन् ।’

दसैं मनाउन घर जान निस्केकाले पनि मुस्ताङकै स्याउ खोज्ने भएपछि अन्य स्याउ र फलफूलसमेत बजारमा छैनन् । मुस्ताङका बगान फुगेर थोक वित्रेताले प्रतिकेजी ८० रुपैयाँसम्ममा खरिद गरेका छन् । कामविशेषले मुक्तिनाथ पुगेकाले खुद्रा खरिद गर्दा भने उपभोक्ताले मुस्ताङमै प्रतिकेजी १ सय ३० रुपैयाँ तिर्ने गरेका छन् । ‘कागबेनी पुगेर फर्कंदा केही स्याउ ल्याउन खोजेको थोकमा नकिने महँगो पर्ने रहेछ,’ स्थानीय प्रेमप्रसाद पोखरेलले भने, ‘छुट पाउन कम्तीमा दुई/चार कार्टुन नै किन्नुपर्ने रहेछ ।’

मुस्ताङ जाने सडक अझै जोखिममा छ । त्यसैले मुक्तिनाथ गएर फर्कनेले स्याउ किनेर ल्याउनुभन्दा सोझै बागलुङ र बेनी झरेर खरिद गर्न सजिलो भएको बताउँछन् । ‘बोकाएर ल्यायो, बाटैमा बास बस्नुपरे सास्ती हुन्छ, त्यसैले बेनी झरेर मात्रै स्याउ किनेर घरमा पठायौं,’ पोखरेलले भने, ‘उता सबै पोको पार्नुपर्छ, बजारमा आएर किनेपछि छानेर लैजान पनि पाइन्छ ।’ सडक जोखिम भएकाले भाडासमेत महँगो तिर्नुपर्दा चाहेर पनि २ सय घटीमा बेच्न नसकिएको फलफूल व्यवसायी संघका अध्यक्ष ध्रुवप्रसाद शर्माले बताए । वर्षा अझै नरोकिएकाले मेवालगायत अन्य फलफूल पनि बजारमा छैनन् ।

अघिल्ला वर्ष दसैंको मुखमा १ सय ८० रुपैयाँसम्ममा स्याउको खुद्रा मूल्य थियो । अहिले केही महँगो भएको हो । ढुवानी भाडा महँगो भएकाले अघिल्ला वर्षको तुलनामा यो मूल्य सामान्य भएको केसीले बताए । ‘एक केजी तरकारी नै दुई सय रुपैयाँ पर्न थालिसक्यो, स्याउ त पर्ने नै भयो,’ शर्माले भनिन्, ‘थोक खरिद, ढुवानी, स्टोरलगायतको खर्च कटाउँदा हामीलाई पनि फाइदा छैन ।’

प्रकाशित : आश्विन १४, २०७९ ११:०३
पूरा पढ्नुहोस्
प्रतिक्रिया
पठाउनुहोस्
×