रक्सौलकै भाउ सस्तो बजारमा

करिब २० मिनेटको बीचमा उनी सस्तो बजारबाट बाहिरिदा उनको दुबै झोला भरिएका थिए । ‘बजार मूल्य भन्दा उपभोग्य सामग्री सस्तो छ,’ उनले भनिन्, ‘दुई हप्ता पुग्ने गरि सामान खरिद गरेको छु ।’

वीरगन्ज– ६ माईस्थानकी सृजना पान्डेले पनि करिब १५/२० दिनलाई पुग्ने गरि भान्साको सामान सस्तो बजारमा खरिद गरेको बताइन् । चाडपर्वको समयमा सर्वसाधारण दैनिक उपभोग्य वस्तु खरिद गर्न सीमावर्ती रक्सौल बजार जाने गरेका छन् । सस्तो मूल्यमा सामान खरिद गर्न पाइने हुनाले रक्सौलमा नेपाली उपभोक्ताको भीड नै लाग्ने गरेको छ । ‘सस्तो बजारमा दैनिक उपभोग्य वस्तु अहिले रक्सौलकै रेटमा खरिद गरे,’ माइस्थान निवासी पान्डेले भनिन्, ‘अन्य उपभोक्ताले पनि यसबाट लाभ लिन सक्नुपर्छ ।’

वीरगन्ज उद्योग वाणिज्य संघ र घरेलु तथा साना उद्योग कार्यालय पर्साले महावीर धर्मशालामा सोमबार देखि सञ्चालनमा ल्याएको सस्तो बजार अहिले धेरैको रोजाईमा परेको छ । उपभोग्य सामग्री एकै स्थलमा पाउने र बजार मूल्य भन्दा २० प्रतिशत सस्तो दरमा खरिद गर्न पाइने हुनाले उपभोक्ताहरूको भीड लागेको छ । घटस्थापनादेखि सञ्चालनमा आएको सस्तो बजार फुलपातीको दिनसम्म लाग्ने बताइएको छ । त्यहाँ दैनिक उपभोग्य सामग्री सहितका १९ वटा स्टल राखिएका छन् ।

वीरगन्ज उद्योग वाणिज्य संघका अध्यक्ष डा.सुवोध कुमार गुप्ताले दैनिक उपभोग्य वस्तुहरू सस्तो मूल्यमा एकै ठाउँमा उपलब्ध गराउने उद्देश्यले सस्तो बजार आयोजना गरिएको जनाए । चाडपर्वमा दैनिक उपभोग्य सामग्री सुपथ मूल्यमा एकैथलोमा खरिद गर्न पाउँदा उपभोक्ता लाभान्वित हुने बताए ।