श्रीमतीको हत्या आरोपमा एक जना पक्राउ- मधेस - कान्तिपुर समाचार
कान्तिपुर वेबसाईट
AdvertisementAdvertisement

श्रीमतीको हत्या आरोपमा एक जना पक्राउ

सन्तोष सिंह

धनुषा — आफ्नै श्रीमतीको हत्या गरेको आरोपमा धनुषा प्रहरीले एक जनालाई पक्राउ गरेको छ । पक्राउ पर्नेमा मिथिलाबिहारी नगरपालिका ५ ललिया बस्ने ५० वर्षीय रामा मण्डल केवट रहेको जिल्ला प्रहरी कार्यालय धनुषाले जनाएको छ ।

रामालाई आइतबार पक्राउ गरिएको हो । असोज ४ गते घरायसी विवादको क्रममा रामाले आफ्नो श्रीमती ४५ वर्षीया जिवछीदेवी मण्डललाई कोदालो प्रहार गरी हत्या गरेको प्रहरीले जनाएको छ । रामाले ललियास्थित बाँसघारीमा टाउकोमा कोदालो प्रहार गरी हत्या गरेको प्रहरीले दाबी गरेको छ ।

प्रहरीले घटनाको अनुसन्धानको क्रममा असोज ९ गते श्रीमतीको क्रिया बसेको अवस्थामा श्रीमान् रामालाई घरबाटै पक्राउ गरेका हुन् । रामा मण्डल र मृतक जिवछीदेवीका २ छोराहरू २२ वर्षीय विनय मण्डल र कान्छो छोरा २० वर्षीय सञ्जय मण्डल रोजगारको सिलसिलामा विदेशमा छन् ।

कान्छो छोरा सञ्जय मण्डलले विदेशबाट कमाएको पैसा मृतक जिवछीदेवी मण्डलको नाममा पठाउँदै आएकाले बाँकी रहेको ऋण तिर्न पति रामा मण्डल केवटलाई असहयोग गरेको भन्दै पति र पत्नीबीच विवाद भई घटना भएको जिल्ला प्रहरी कार्यालय धनुषाका डीएसपी प्रदीपबहादुर क्षेत्रीले बताए ।

प्रकाशित : आश्विन १०, २०७९ १९:४१
प्रतिक्रिया
पठाउनुहोस्

क्याम्पस प्रमुखमाथि कुटपिट गर्नेलाई कारबाहीको माग

डीबी बुढा

जुम्ला — जुम्ला बहुमुखी क्याम्पसका प्रमुख ओमप्रकाश आचार्य कर्मचारीबाटै कुटिएको भन्दै नेपाल राष्ट्रिय कर्मचारी संगठन र नेपाल राष्ट्रिय प्रध्यापक संगठन केन्द्रीय समितिले आपत्ति जनाएका छन् । संयुक्त विज्ञप्ति जारी गर्दै ती संगठनले क्याम्पस प्रमुखलाई कुटपिट गर्नेमाथि कारबाही हुनुपर्ने माग राखेका हुन् ।

‘बिनाकारण व्यक्तिगत रिसिइबी साँध्ने मनसायले क्याम्पसजस्तो गरिमामय उच्च शिक्षा प्रदान गर्ने निकायका जिम्मेवार व्यक्तिमाथि क्याम्पस हाताभित्रै गरिएको आक्रमण अक्षम्य छ‚’ विज्ञप्तिमा भनिएको छ,‘यस्तो आपराधिक क्रियाकलापमा संलग्न व्यक्तिमाथि कडाभन्दा कडा कार्बाही गर्न र शान्ति सुरक्षाको प्रत्याभूति दिन माग गर्दर्छौं ।’

सेजुवालको कुटाइबाट क्याम्पस प्रमुख आचार्यको सर्ट र भेस्ट च्यातिएको छ भने टाँकहरू फुटेका छन् । सोमबार चिया पिइरहेको ठाउँमा आएर सेजुवालले क्याम्पस प्रमुखको छातीमा मुक्का प्रहार गरेको क्याम्पस प्रमुख आचार्यले बताए । उनले भने, ‘ममाथि हात हाल्नुपर्ने कारण केही थिएन । वादविवाद पनि केही थिएन । अलि अघि कर्मचारीको निर्वाचनको कुरा थियो; त्यो पनि स्थगित भइसकेको छ । गलत नियतले ममाथि आक्रमण भयो ।’

प्रमुख जिल्ला अधिकारी मुकेश केसरीले औपचारिक रुपमा जानकारी नआइसकेको बताए । उनले भने, ‘अनौपचारिक रुपमा जानकारी आएको छ । तर औपचारिक रुपमा जानकारी पाएको छैन । मंगलबार क्याम्पस प्रमुखलाई बोलाएर जानकारी लिएपछि मात्रै म आफ्नो धारणा राख्छु । ’

क्याम्पस प्रमुखमाथि हाताभित्रै बिनाकारण हातपात भएको भन्दै नेपाल राष्ट्रिय कर्मचारी संगठन र नेपाल राष्ट्रिय प्रध्यापक संगठन केन्द्रीय समितिले संयुक्त प्रेस विज्ञप्ति निकालेर घटनाले गम्भीर ध्यानाकर्षण भएको जनाएको छ ।

क्याम्पस प्रमुख कुटेको आरोप लागेका प्रशासन शाखा प्रमुख सेजुवाल भने सम्पर्कमा आउन चाहेनन् ।

प्रकाशित : आश्विन १०, २०७९ १९:३१
पूरा पढ्नुहोस्
प्रतिक्रिया
पठाउनुहोस्
×