यातायातको फाइल अख्तियारको नियन्त्रणमा

आयोगले लाइसेन्ससम्बन्धी गरिएको निर्णय पुस्तिका र अन्य केही फाइल अनुसन्धानका लागि लगेको यातायात कार्यालयले जनाएको छ । कार्यालयका एक कर्मचारीका अनुसार आयोगले जनकपुर र वीरगन्जका कर्मचारीलाई हेभी सवारीसाधन चालकको परीक्षामा यातायात कार्यालय वीरगन्जमा फेल भएका ६२ जनालाई यातायात कार्यालय जनकपुरले मध्यरातमा पास देखाएर लाइसेन्स बाँडिएको बारे जवाफसमेत मागेको छ ।

ट्रायलमा फेल भएका ६२ जनालाई मध्यरातमा पास गराएर बाँडियो लाइसेन्स

यातायात कार्यालय वीरगन्जमा ‘जी’ समूह (हेभी सवारी) चालक अनुमतिपत्रका लागि फारम भरेर प्रयोगात्मक (ट्रायल) परीक्षामा फेल भएका ६२ जनालाई जनकपुरको सर्भरबाट मध्यराति पास देखाइएको थियो ।

यातायात कार्यालय जनकपुरबाट ३ वर्षअघि निलम्बन भएका कर्मचारीको युजर (खाता) प्रयोग गरेर लाइसेन्सका लागि पास देखाइएको हो । यसबारे समाचार आएपछि ६२ जनाकै लाइसेन्स रद्द गरिएको छ ।

यातायात कार्यालय जनकपुरका प्रमुख वीरेन्द्र साहका अनुसार ईडीएलभीआरएस सर्भरमा समस्या आएको दिन कार्यालयको जानकारी बिना सर्भरमा ६२ जनाको नामा इन्ट्री भएको हो ।

जनकपुरको सर्भरबाट वीरगन्जमा फेल भएकालाई पास गराइएको दिन यातायातका तीन कर्मचारी कार्यालयमा आएका थिए । कार्यालय नजिकैको एक होटलमा बसेका विभागका कर्मचारीकै संलग्नतामा अवैध लाइसेन्स वितरण भएको हुन सक्ने उनले आरोप लगाए ।