छोटी भन्सार सञ्चालनमा अलमल- मधेस - कान्तिपुर समाचार
कान्तिपुर वेबसाईट
AdvertisementAdvertisement

छोटी भन्सार सञ्चालनमा अलमल

रामपुरखाप, औरैया, ब्रह्मपुरी र मठिया छोटी भन्सार अझै सञ्चालनमा आएनन्
शिव पुरी

रौतहट — राजस्व चुहावट बढ्ने भन्दै जिल्लास्थित छोटी भन्सार कार्यालय फेरि सञ्चालनमा ल्याउन गौर भन्सार कार्यालयले चासो देखाएको छैन् । छोटी भन्सारबाट तस्करी बढ्ने भन्दै सञ्चालनमा ल्याउन नसकेको कार्यालयले जनाएको हो । छोटी भन्सारहरू १५ वर्षदेखि बन्द छ । तर, यही नाकाबाट झोलेपोके तस्कर सामान बोकेर नेपाल छिर्छन् ।

माओवादी द्वन्द्वकालका बेला सुरक्षाको कारण देखाउँदै ‘मर्ज’ गरिएको रामपुरखाप, औरैया, ब्रह्मपुरी र मठिया छोटी भन्सार कार्यालय अझै सञ्चालनमा आएको छैनन् । सुरक्षा थ्रेट बढेपछि विस्थापित छोटी भन्सारमध्ये बंकुल मात्र पछि सञ्चालनमा ल्याइयो । बाँकी ४ वटा बन्द छन् । यी भन्सार कार्यालय सञ्चालनमा आए तस्करी झनै बढ्ने गौर भन्सारका सूचना अधिकारी अभिजित सिंहले बताए । ‘विभागको पनि रणनीति हो । सानो भन्सार नाका खुलाएर झनै तस्करी बढ्ने देखिएको छ,’ उनले भने, ‘लक्ष्य दिएपछि पूरा गरेर राजस्व प्रभावित हुने काम हुन्छ । यस्ता भन्सार कार्यालय बिस्तारै बन्द गर्ने हो ।’ अन्य स्थानमा पनि छोटी भन्सार बन्द रहेको उनले जनाए ।

भारतीय बैरगनिया बजार हुँदै नेपाल भित्रिने सामानको गौर भन्सारले राजस्व लिने गरेको छ । छोटी भन्सार बन्द भएपछि यही नाका हुँदै झोलेपोके तस्करी हुन्छ । तस्करी बढेपछि राजस्व प्रभावित भएको गौर भन्सारका प्रमुख वासु नेपाल स्विकार्छन् । चुहावट रोक्न नसकेपछि भन्सार कार्यालयको राजस्व असुली ६ महिनादेखि प्रभावित छ । चाुल आर्थिक वर्ष २०७९/८० को साउन महिनामा २ करोड ३९ लाख लक्ष्य दिइएकोमा १ करोड ३ लाख रुपैयाँ मात्र असुली भएको थियो । माघयता ६ महिनाको अवधिमा भन्सारले लक्ष्य पूरा गर्न सकेको छैन ।

कार्यालय प्रमुख नेपाल छोटी भन्सार सञ्चालनमा नआएर राजस्व नघटेको बताउँछन् । जिल्लामा तस्करी बढ्न थालेपछि राजस्व असुलीमा प्रभाव परेको उनको भनाइ छ । जिल्ला प्रहरी प्रमुख एसपी वीरबहादुर बुढामगरले खुला सीमा भएकाले पारिबाट चोर नाका हुँदै सानोतिना सामान भित्रिने गरेको बताए । ‘राजस्व प्रभावित पार्ने कुनै पनि वस्तु नियन्त्रणमा लिन्छौं,’ उनले भने, ‘भन्सारले पनि राजस्व चुहावट हुन नदिन योजना बनाउनुपर्छ ।’ रौतहटका प्रमुख जिल्ला अधिकारी कृष्णबहादुर शाहीले छोटी भन्सारहरू सञ्चालनमा ल्याइए राजस्व असुलीमा बढ्ने बताए ।

प्रकाशित : आश्विन ८, २०७९ ०९:३०
प्रतिक्रिया
पठाउनुहोस्

सीप सिकेर स्वदेशमै काम

कान्तिपुर संवाददाता

पर्सा — पटेर्वासुगौली गाउँपालिका–२ का २७ वर्षीय अजयकुमार महतो धाँगड निरन्तर ६ वर्ष रोजगारीका लागि मलेसियामा बसे । सन् २०१५ देखि २०२१ सम्म मलेसियामा रोजगार उनी गत वर्ष स्वदेश फर्किए । मलेसिया हुँदा उद्योगदेखि शौचालय सफा गर्ने र कुखुराको प्वाँख उखेल्नेसम्मका काम पनि उनले गरे ।


जाँदा लागेको १ लाख ५० हजार रुपैयाँ ऋण तिर्नेबाहेक खासै कमाउन सकेनन् । कारण थियो, हातमा कुनै सीप नहुनु ।

‘कुनै सीप वा तालिम नलिई वैदेशिक रोजगारीमा जाँदा निकै हन्डर खाएँ,’ उनले भने, ‘अहिले एक महिने प्लम्बर तालिम लिएपछि मेरो आत्मविश्वास बढेको छ, ५ दिनयता दैनिक १ हजार रुपैयाँ पारिश्रमिक पाउने गरी काम पनि पाएको छु, अब स्वदेशमै रोजगारी गर्ने हो ।’ रोजगार तथा सीप विकास तालिम केन्द्र वीरगन्जले सञ्चालन गरेको उक्त तालिममा सहभागी भएपछि आफ्नो आत्मविश्वास बढेको उनले बताए ।

अजयजस्तै अनुभव सुनाए पर्सागढी नपा–४ बर्वाटाडीका ४२ वर्षीय बृजकिशोर चौरसियाले । १२ वर्ष मलेसियामा स्टोर किपरदेखि सेल्स म्यानसम्मको काम गरेका उनले त्यहाँ खासै कमाउन सकेनन् । बरु भाइ सिकेन्द्रकुमार चौरसियालाई उतै गुमाए । दाजुको सिको गरेर परवानीपुरको एक बैंकको जागिर छाडेर रोजगारीका लागि मलेसिया हानिएका सिकेन्द्रको त्यहाँ पुगेको १४ महिना नपुग्दै कोरोना संक्रमणले मृत्यु भएको थियो । उतिबेला बृजकिशोर मलेसियामा भए पनि भाइको शवसमेत हेर्न पाएनन् । ‘मलेसियामै निधन भएको भाइको अन्तिम पटक मुखसमेत हेर्न पाइनँ, उसका २ सन्तान यहाँ टुहुरा भए, बुहारी अझै सामान्य अवस्थामा फर्किन सकेकी छैनन्,’ उनले भने, ‘अब विदेश जान्नँ, यहीं आल्मुनियम फेब्रिकेटरको तालिम लिएको छु, मसँगै तालिम लिइरहेका २० जनाको समूह बनाएर कम्पनी खोलेर यहीं व्यवसाय गर्ने योजना छ ।’

युरोपियन युनियनको आर्थिक सहयोगमा दक्षता प्रोजेक्टको व्यवस्थापनमा शिक्षा विज्ञान तथा प्रविधि मन्त्रालय र यूएनडीपी स्किल्सको सहयोगमा पर्सा, बारा, सर्लाही र धनुषाका वैदेशिक रोजगारीबाट फर्किएका १ सय २० युवाले तालिम लिएका छन् । बिल्डिङ इलेक्ट्रिसियन, आल्मोनियम फेब्रिकेटर र नेपाली कुजिन कुकको तालिम दिइएको आयोजक संस्था रोजगार तथा सीप विकास तालिम केन्द्र वीरगन्जका कार्यकारी निर्देशक विजयकुमार श्रीवास्तवले बताए ।

‘वैदेशिक रोजगारीबाट फर्किएका युवालाई पुनः रोजगारीका लागि विदेश जानबाट रोकेर स्वदेशमै सीपमूलक तालिम दिएर रोजगारीको अवसर दिनु तालिमको उद्देश्य हो,’ उनले भने, ‘हामी सफल भएका छौं, एकमहिने तालिम लिएका युवा अब अनेक हन्डर खाएर रोजगारीका लागि विदेश जानुभन्दा स्वदेशमै काम गर्ने मनस्थिति बनाइसकेका छन् ।’

प्रकाशित : आश्विन ८, २०७९ ०९:२८
पूरा पढ्नुहोस्
प्रतिक्रिया
पठाउनुहोस्
×