राष्ट्रपतिविरुद्ध राजविराजमा प्रदर्शन- मधेस - कान्तिपुर समाचार

राष्ट्रपतिविरुद्ध राजविराजमा प्रदर्शन

अवधेशकुमार झा

राजविराज — राष्ट्रपति विद्यादेवी भण्डारीले नागरिकता विधेयक प्रमाणीकरण नगरेर संविधानको खिल्ली उडाएको भन्दै लोकतान्त्रिक समाजवादी पार्टी (लोसपा)का नेता तथा कार्यकर्ताहरूले बुधबार राजविराजमा प्रदर्शन गरेका छन् । लोसपाका नेताहरूले सार्वभौम संसद्‌बाट पारित भएको विषयलाई प्रमाणीकरण नगरेर राष्ट्रपतिले संसदीय प्रणालीको समेत उपहास गरेकाले तत्काल राजीनामा दिनुपर्ने माग गरे । 

राजविराजको गजेन्द्रचोकस्थित लोसपाको जिल्ला कार्यालयबाट निस्किएको जुलुस नगरका विभिन्न भागको परिक्रमा गरेको थियो । प्रदर्शनमा सहभागीहरूले राष्ट्रपति भण्डारीविरुद्ध चर्को नाराबाजी गरेका थिए ।

बजार क्षेत्रभरि प्रदर्शनपश्चात् राष्ट्रपति भण्डारीको पुत्ला जलाउन खोज्दा प्रहरीले हस्तक्षेप गरेको थियो । सो क्रममा प्रहरी र लोसपा कार्यकर्ताहरूबीच केहीबेर घम्साघम्सीसमेत भएको थियो । लोसपाले प्रदर्शन गर्ने सूचना पाएसँगै राजविराज मुख्य बजार क्षेत्रमा नेपाल र सशस्त्र प्रहरी व्यापक रुपमा परिचालन गरिएको प्रहरीले जनाएको छ ।

‘एकातर्फ राष्ट्रपतिले संविधानको खिल्ली उडाए‚ अर्कोतर्फ प्रहरीले प्रदर्शन गर्न पाउने नेपाली जनताको लोकतान्त्रिक हकलाई कुण्ठित गर्न खोज्दै छ‚’ लोसपाका नेता तथा राजविराज नगरपालिकाका पूर्वनगरप्रमुख शम्भुप्रसाद यादवले भने, ‘जनतालाई अनागरिक बनाइराख्ने राष्ट्रपतिको कदमले राष्ट्रपति पदको गरिमालाई नै धक्का पुर्‍याएको छ ।’

प्रकाशित : आश्विन ५, २०७९ १८:१२
प्रतिक्रिया
पठाउनुहोस्

एनएमबी बैंक र सिप्रदिबीच सहकार्य

कान्तिपुर संवाददाता

काठमाडौँ — एनएमबी बैंकले विद्युतीय गाडी खरिद गर्न चाहनेलाई न्युनतम ब्याज दरमा कर्जा प्रवाह गर्ने गरी सिप्रदि ट्रेडिङसँग सहकार्य गरेको छ ।

यसमा ८०% फाइनान्सिङसहित आवश्यक सम्पूर्ण कागजात बुझाएको २४ कार्य घण्टाभित्र कर्जा प्रवाह हुने विज्ञप्तीमा उल्लेख छ । यो कर्जा योजनामार्फत् एनएमबीले व्यवसायसँगै वातावरणीय दायित्व पुरा गर्न खोजेको छ । यसबाट विद्युतीय गाडी चढ्न चाहनेलाई कर्जा प्रदान गर्ने मात्र नभइ वातावरणलाई दिगो बनाउन समेत टेवा पुग्ने बैंकको दाबी छ । बैंकले आफ्नो सेवा अभिवृद्धि गर्ने क्रममा यस्ता सुविधाहरू प्रदान गर्दै आएको छ । एनएमबी बैंकले हाल देशभरी २०१ शाखा, १३८ एटीएम र ११ एक्सटेन्सन काउन्टरमार्फत सेवा प्रदान गर्दै आइरहेको छ ।

प्रकाशित : आश्विन ५, २०७९ १८:०७
पूरा पढ्नुहोस्
प्रतिक्रिया
पठाउनुहोस्
x
×