वीरगन्ज नाकाबाट घट्यो आयात

उनका अनुसार आइतबार भारत हुँदै ४ सय २५ मालबाहक गाडी भित्रिएका थिए । सोमबार यो संख्या ३ सय १८ र मंगलबार ३ सय ६८ थियो । बुधबार मध्यान्ह १२ बजेसम्म जम्मा ७३ गाडी आएका थिए । ‘अघिल्ला वर्षहरूमा चाडपर्व नजिकिँदै गर्दा भन्सारबाट दिनमै ९ सयदेखि ११ सय वटासम्म गाडीको जाँचपास हुने गर्थ्यो । यसपटक यो आँकडा निकै कम छ,’ उनले भने, ‘अहिले चामल, विद्युतीय उपकरणजस्ता वस्तु मात्र बढी भित्रिरहेको छ ।’

चाडपर्वको समयमा पनि आयात घट्नुमा एलसी खोल्नमा कडाई तथा समग्रमा आयातनिर्यात कारोबार नै घट्दै जानु मुख्य कारण रहेको बताउँछन् समिति प्रमुख कमल ज्ञवाली । ‘एकातिर नयाँ सवारीसाधनको आयात ठप्प छ, आयात भइसकेका सवारीसाधन पनि जाँचपास भई छुटेका छैनन्,’ उनले भने, ‘अर्कोतिर समग्रमै आयातनिर्यात कारोबार ओरालो लागेको छ । लामो समयपछि यस्तो अवस्था देखिएको हो ।’

अहिले आईसीपी परिसरमा ठूलो संख्यामा भारत तथा तेश्रो मुलुकबाट आयातित सवारीसाधन अड्किएका छन् । बुधबार मध्यान्हसम्ममा आईसीपीमा कुल २ हजार २ सय ६८ सवारीसाधन जाँचपास गर्न बाँकी रहेकामा १ हजार ७ सय ३५ सवारी नयाँ हुन् । नयाँ सवारीसाधनमा ५ सय ८० वटा कार–जीप र १ हजार १ सय ५५ वटा बस तथा ट्रकका चेसिस छन् । बैंकबाट ‘अटोलोन’ नपाउँदा आयातकर्ताले यी सवारीसाधन जाँचपास गराउन सकेका छैनन् । एकैसाथ धेरै सवारीसाधन अड्किएपछि आईसीपीमा पार्किङ व्यवस्थापनमै समस्या आइरहेको ज्ञवालीले बताए । ‘हामीले सम्भव भएजति समथल र खाली ठाउँमा नयाँ सवारी साधन पार्किङ गरिरहेका छौं,’ उनले भने, ‘आईसीपीको सबै खाली स्थान नयाँ सवारी साधनले खचाखच भरिएको छ ।’