कारागारमा क्षमताभन्दा दोब्बर कैदी
रौतहट — गौर नगरपालिकास्थित कारागारमा क्षमताभन्दा दोब्बर कैदीबन्दी राखिएको छ । १ सय ६० जना क्षमताको भवनमा ३ सय ८२ कैदीबन्दीलाई राखिएको हो । कारागार विभागले पुग्दो बजेट नदिएपछि जीर्ण कारागार मर्मतमा समस्या भएको जेल प्रशासनको भनाइ छ ।
कारागारका तीन भवनमध्ये एउटा निकै पुरानो छ । दुईवटा भवन पनि दाताले बनाइदिएका हुन् । कारागारको मूल भवन ८७ वर्ष पुरानो हो । विसं १९८९ मा कारागार स्थापना भएको थियो । क्षमताभन्दा बढी कैदीबन्दीले बस्न समस्या हुन थालेपछि केही महिनाअघि उधारो सामान मगाई तला थपेर जस्तापाता लगाइएको जेलर शम्भु यादवले बताए । यादवका अनुसार ठाउँ अभावमा कैदीबन्दीहरू केही भर्याङ र भान्सा घरमा सुत्ने गरेका थिए ।
‘अहिले माथिल्लो तलामा अस्थायी रुपमा कैदीलाई बस्न सुत्न हुने बनाइएको छ,’ उनले भने, ‘यसरी चन्दा उठाएर कतिन्जेल काम चलाउनु ? कारागार बलियो भएन भने समस्या हुन्छ ।’ वर्षायाममा कारागार भित्र र बाहिर कम्पाउन्डमा पानी जम्ने समस्या पनि छ । २०७२ सालको भूकम्पले कारागारको पुरानो भवन चर्किएको छ । पुरानो जीर्ण भवन कुनै पनि बेला भत्किने डरले रातभरि सुत्न नसकेको कैदीबन्दीको गुनासो छ । कारागारमा अहिले लागूऔषध, सवारी ज्यान, कर्तव्य ज्यान, चेलीबेटी बेचबिखन, मानव ओसारपसार, अपहरण तथा शरीर बन्धक, जबर्जस्ती करणीलगायत मुद्दामा कैदीबन्दी छन् ।
प्रकाशित : भाद्र २८, २०७९ ०८:३६