बलात्कार प्रयास आरोपमा लहानका उपमेयर प्रहरी नियन्त्रणमा

गत जेठ १९ गते जागिरको प्रलोभन देखाई २१ वर्षीया महिलामाथि बलात्कार प्रयास गरेको उनीमाथि आरोप लागेको थियो । ती महिलाले साउन ४ गते इलाका प्रहरी कार्यालय लहानमा जाहेरी दिएकी थिइन् । जाहेरी परेको खबर पाएपछि उपप्रमुख महतो सम्पर्कविहीन भएका थिए ।

उपमेयर महतोले कार्यकक्षको गोप्य कक्षभित्र लगेर जबर्जस्ती करणी प्रयास गरेको जाहेरीमा महिलाले उल्लेख गरेकी छन् । जिल्ला प्रहरी कार्यालय सिरहाका प्रवक्ता डीएसपी सुवास बुढाथोकीले उपमेयर महतोलाई नियन्त्रणमा लिइएको र आइतबार म्याद थप गरेर आवश्यक अनुसन्धान अगाडि बढाउने जानकारी दिए ।

उपमेयर महतोले प्रहरीमा हाजिर हुँदै आफू निर्दोष रहेको र आफूलाई बदनाम गर्ने नियतले फसाउन खोजेको प्रतिक्रिया दिए । आफू भारतको तीर्थस्थलमा रहेको र त्यही बेला आफूमाथि नियोजित तरिकाले षड्यन्त्र भएको थाहा भएपछि निर्दोष सावित गर्न पनि तीर्थाटनबाट फर्केपछि प्रहरीमा हाजिर भएको उनले बताए ।

महतो गत स्थानीय तह निर्वाचनमा कांग्रेससँगको गठबन्धनमा जनता समाजवादी पार्टी (जसपा) बाट उपमेयरमा निर्वाचित भएका थिए । स्थानीय तहको निर्वाचनमा ३७ वर्षीय महतो १२ हजार ५ सय ६९ मत प्राप्त गरी नगर उपप्रमुखमा विजयी भएका थिए । गठबन्धनबाट कांग्रेसका महेश प्रसाद चौधरी २० हजार १ सय ५ मत ल्याई नगर प्रमुखमा विजयी भएका थिए ।