भूमिहीनलाई जग्गा वितरण अन्तिम चरणमा- मधेस - कान्तिपुर समाचार

भूमिहीनलाई जग्गा वितरण अन्तिम चरणमा

ओमप्रकाश ठाकुर

सर्लाही — सर्लाहीका दुई पालिकाका करिब ५ हजार भूमिहीनलाई जग्गा वितरण प्रक्रिया अन्तिम चरणमा पुगेको छ । जिल्लाको आठवटा पालिकामा काम गरिरहेको राष्ट्रिय भूमि आयोग जिल्ला समिति सर्लाहीले पहिलो चरणमा लालबन्दी र वाग्मती नगरपालिकाका करिब ५ हजार भूमिहीनलाई जग्गा वितरणको तयारी थालेको हो । 


आयोगले जिल्लाको वाग्मती, हरिवन, लालबन्दी, ईश्वरपुर, बरहथवा, हरिपुर, कविलासी नगरपालिका र चन्द्रनगर गाउँपालिकासँग सम्झौता गरी काम गरिरहेको छ । जसअनुसार पहिलो चरणमा वाग्मती नगरपालिकामा भूमिहीन दलित, भूमिहीन सुकुम्बासी र अव्यवस्थित बसोबासी ४ हजार ३ सय ७८ जनालाई ८ हजार ७ सय ५७ कित्ता जग्गा नापजाँच गरी वितरणको अन्तिम तयारीमा रहेको आयोगले जनाएको छ । वाग्मतीमा भूमिहीनहरूका लागि १० धुरदेखि १ कट्ठासम्मको घडेरी र ५ कट्ठा खेतीयोग्य जग्गा प्रदान गरिनेछ ।

यस्तै, पहिलो चरणअन्तर्गत नै लालबन्दी नगरपालिकामा ३ सय ५७ भूमिहीन दलित, भूमिहीन सुकुम्बासीलाई प्रतिव्यक्ति करिब १ कट्ठाका दरले वितरण गर्ने प्रक्रिया अन्तिम चरणमा पुगेको आयोगका प्रवक्ता मदनबहादुर विश्वकर्माले जानकारी दिए । उनले १५–१५ दिनको दुईवटा सूचना र एक हप्ताको अर्को एकवटा सूचना प्रकाशित भएपछि भूमिहीन सुकुम्बासीले जग्गा प्राप्ति गर्ने बताए । ‘वाग्मती र लालबन्दी नगरपालिकामा पहिलो चरणमा हामीले भूमिहीनलाई जग्गा बाँड्न लागेका छौं, यसका लागि सूचना मात्र निकाल्न बाँकी छ,’ उनले भने, ‘पहिलो पटक प्रकाशित सूचनाको मितिले ३६ दिनभित्रमा जग्गासहित लालपुर्जा पाउनेछन् ।’

सम्झौता भएका अन्य ६ पालिकामा पनि प्रक्रियागत काम भइरहेको जनाउँदै आयोगका जिल्ला अध्यक्ष चन्द्रप्रसाद वाग्लेले विभिन्न बाधा अवरोधको सामना गर्नु परिरहेको जनाएका छन् । वाग्लेले प्रविधि प्रयोग गरेर काम गर्नुपर्दा अहिलेको विकसित प्रविधि प्रयोग गरी पुर्जा बनाउन सक्ने अमिन र सर्वेक्षक नहुँदा भने समस्या भइरहेको बताए । उनले कतिपय स्थानी तहमा जग्गा नापजाँच र पुर्जा बाँड्न अत्यन्तै चुनौतीपूर्ण रहेकाले त्यहाँका जनप्रतिनिधिले नै चासो र उत्सुकता नदेखाउँदा समस्या भइरहेको गुनासो पोखे ।

‘पहिलो चरणमा आठवटा स्थानीय तहमा सुकुम्बासीका लागि काम अगाडि बढाएका छौं, जसमा केही स्थानीय तहका जनप्रतिनिधिले सहयोग गरिरहेका छन्, भने केही स्थानीय तहका जनप्रतिनिधि चुनौती रहेको जनाउँदै उत्सुकता देखाइरहनुभएको छैन,’ उनले भने, ‘उत्सुकता नदेखाएका स्थानीय तहमा काम गर्न असहज भइरहेको छ ।’ यी ८ पालिकामा मात्र भूमिहीन दलित ३ हजार २ सय ३७ जना, भूमिहीन सुकुम्बासी ७ हजार ५ सय ८१ जना, अव्यवस्थित बसोबासी ३० हजार ७ सय ८० जना र अधुरा अपूरा ६ सय १९ जनाको लगत संकलनको तथ्यांक आयोगको जिल्ला समितिमा छ ।

प्रकाशित : भाद्र ६, २०७९ ०९:१०
प्रतिक्रिया
पठाउनुहोस्

विद्युत् कटौतीले उपभोक्ता हैरान

ओमप्रकाश ठाकुर

सर्लाही — सर्लाहीमा विद्युत् कटौतीको समस्याले उपभोक्ता आजित भएका छन् । चर्को गर्मीबीच विद्युत् कटौती र कम भोल्टेजको समस्या भोग्नुपरेको स्थानीयको गुनासो छ । तुलनात्मक रूपमा जिल्लाको उत्तरीभन्दा दक्षिणी क्षेत्रमा विद्युत् आपूर्तिमा समस्या छ ।


मुलुक लोडसेडिङ मुक्त घोषणा गरिए पनि त्यस्तो अनुभूति गर्न नपाएको कविलासी नगरपालिका–७ सिर्सियाका शम्भु रायले बताए । रातभरि विद्युत् नहुँदा गर्मीले निदाउनै नसकिएको उनको गुनासो छ । छिनछिनमै विद्युत् जाने र रातभरि नआउने समस्या बढेपछि सिर्सियाका स्थानीयले केही दिनअघि सडक अवरुद्ध गरे । त्यसपछि केही दिन विद्युत् आपूर्तिमा खासै समस्या नदेखिए पनि फेरि छिनछिनमै विद्युत् जाने आउने भइरहेको रायले बताए । ‘मुलुक लोडसेडिङमुक्त भएको भनिएको छ, हामी रातभरि गर्मीले बेहाल भइरहेका छौं, फेरि पनि आन्दोलन नै गर्नुपर्नेजस्तो भएको छ,’ उनले भने ।

जिल्ला उत्तरी क्षेत्रमा समेत बिहीबार दिनभरि विद्युत् अवरुद्ध बन्यो । ३३ केभीमा समस्या आएको भन्दै लालबन्दी वितरण केन्द्रले दिनभरि विद्युत् छोडेन । बिहानै कटेको विद्युत् बिहीबार साँझ मात्र आपूर्ति भयो । विद्युत् नियमित नहुँदा दिनभरिको टन्टलापुर घामले यस क्षेत्रका सर्वसाधारणले सास्ती भोग्नुपर्‍यो । बिहान खेतमा काम गरेर आराम गर्ने बेलामा विद्युत् नहुँदा रूखको छहारीमा ओत लाग्नुपरेको हरैयाका विष्णु राउतले बताए । जिल्लामा केही दिनदेखि पटक–पटक विद्युत् आउने जाने समस्या हुँदा विद्युतीय उपकरणमा समेत समस्या देखिन थालेको उपभोक्ताको गुनासो छ । विद्युत् अनियमित भएकै कारण विद्युतीय सामग्री खराब हुन थालेको सदरमुकाम मलंगवामा सञ्चालनमा रहेको अमन कोल्ड स्टोरका सञ्चालक अजित सिंहले बताए । बिजुलीबाट चल्ने व्यापार, व्यवसाय प्रभावित भइरहेका छन् ।

विद्युत् प्राधिकरणले भने मागअनुसार आपूर्ति हुन नसक्दा विद्युत्को अनियमित कटौती भइरहेको जनाएको छ । विद्युत् प्राधिकरण मलंगवा वितरण केन्द्रका प्रमुख विनोद यादवलाई अनियमित विद्युत् कटौतीका बारेमा बुझ्न खोज्दा उनी सम्पर्कमा आउन चाहेनन् । मलंगवा वितरण केन्द्रमा नागरिकको गुनासो नै नसुन्ने गरेको सर्वसाधरण बताउँछन् । नागरिक समाजका महासचिव शिवचन्द्र चौधरीले प्राधिकरणमा नागरिकको पहुँच हुने नसकेको बताए । ‘गर्मीमा अनियमित विद्युत् कटौतीका बारेमा बुझ्न मलंगवा वितरण केन्द्रमा फोन गरे पनि जवाफ नै पाइँदैन,’ उनले भने ।

प्रकाशित : भाद्र ५, २०७९ १०:५२
पूरा पढ्नुहोस्
प्रतिक्रिया
पठाउनुहोस्
×