विद्युत् कटौतीले उपभोक्ता हैरान- मधेस - कान्तिपुर समाचार

विद्युत् कटौतीले उपभोक्ता हैरान

ओमप्रकाश ठाकुर

सर्लाही — सर्लाहीमा विद्युत् कटौतीको समस्याले उपभोक्ता आजित भएका छन् । चर्को गर्मीबीच विद्युत् कटौती र कम भोल्टेजको समस्या भोग्नुपरेको स्थानीयको गुनासो छ । तुलनात्मक रूपमा जिल्लाको उत्तरीभन्दा दक्षिणी क्षेत्रमा विद्युत् आपूर्तिमा समस्या छ ।


मुलुक लोडसेडिङ मुक्त घोषणा गरिए पनि त्यस्तो अनुभूति गर्न नपाएको कविलासी नगरपालिका–७ सिर्सियाका शम्भु रायले बताए । रातभरि विद्युत् नहुँदा गर्मीले निदाउनै नसकिएको उनको गुनासो छ । छिनछिनमै विद्युत् जाने र रातभरि नआउने समस्या बढेपछि सिर्सियाका स्थानीयले केही दिनअघि सडक अवरुद्ध गरे । त्यसपछि केही दिन विद्युत् आपूर्तिमा खासै समस्या नदेखिए पनि फेरि छिनछिनमै विद्युत् जाने आउने भइरहेको रायले बताए । ‘मुलुक लोडसेडिङमुक्त भएको भनिएको छ, हामी रातभरि गर्मीले बेहाल भइरहेका छौं, फेरि पनि आन्दोलन नै गर्नुपर्नेजस्तो भएको छ,’ उनले भने ।

जिल्ला उत्तरी क्षेत्रमा समेत बिहीबार दिनभरि विद्युत् अवरुद्ध बन्यो । ३३ केभीमा समस्या आएको भन्दै लालबन्दी वितरण केन्द्रले दिनभरि विद्युत् छोडेन । बिहानै कटेको विद्युत् बिहीबार साँझ मात्र आपूर्ति भयो । विद्युत् नियमित नहुँदा दिनभरिको टन्टलापुर घामले यस क्षेत्रका सर्वसाधारणले सास्ती भोग्नुपर्‍यो । बिहान खेतमा काम गरेर आराम गर्ने बेलामा विद्युत् नहुँदा रूखको छहारीमा ओत लाग्नुपरेको हरैयाका विष्णु राउतले बताए । जिल्लामा केही दिनदेखि पटक–पटक विद्युत् आउने जाने समस्या हुँदा विद्युतीय उपकरणमा समेत समस्या देखिन थालेको उपभोक्ताको गुनासो छ । विद्युत् अनियमित भएकै कारण विद्युतीय सामग्री खराब हुन थालेको सदरमुकाम मलंगवामा सञ्चालनमा रहेको अमन कोल्ड स्टोरका सञ्चालक अजित सिंहले बताए । बिजुलीबाट चल्ने व्यापार, व्यवसाय प्रभावित भइरहेका छन् ।

विद्युत् प्राधिकरणले भने मागअनुसार आपूर्ति हुन नसक्दा विद्युत्को अनियमित कटौती भइरहेको जनाएको छ । विद्युत् प्राधिकरण मलंगवा वितरण केन्द्रका प्रमुख विनोद यादवलाई अनियमित विद्युत् कटौतीका बारेमा बुझ्न खोज्दा उनी सम्पर्कमा आउन चाहेनन् । मलंगवा वितरण केन्द्रमा नागरिकको गुनासो नै नसुन्ने गरेको सर्वसाधरण बताउँछन् । नागरिक समाजका महासचिव शिवचन्द्र चौधरीले प्राधिकरणमा नागरिकको पहुँच हुने नसकेको बताए । ‘गर्मीमा अनियमित विद्युत् कटौतीका बारेमा बुझ्न मलंगवा वितरण केन्द्रमा फोन गरे पनि जवाफ नै पाइँदैन,’ उनले भने ।

प्रकाशित : भाद्र ५, २०७९ १०:५२
प्रतिक्रिया
पठाउनुहोस्

मलकै पिरलो

ओमप्रकाश ठाकुर

सर्लाही — सर्लाही कविलासी नगरपालिका–१ पिपरियाका रवीन्द्र रायले डेढ बिघामा धान खेती गरेका छन् । धानले गाँज हाल्ने बेलामा मल हाल्नुपर्ने भए पनि पाएका छैनन् । मलका लागि उनी कृषि सहकारी संस्था तथा निजी एग्रोभेटमा सधैं पुग्छन् । तर, खाली हात फर्किनुपर्छ ।


सरकारले उपलब्ध गराउने अनुदानको मल त परको कुरा, निजी एग्रोभेटमा पनि पाउन नसकेको उनी बताउँछन् ।

राय जस्तै जिल्लाका अधिकांश किसानको अवस्था छ । मलको समस्या बर्सेनि दोहोरिन्छ । मल नहालेकै कारण यस वर्ष उत्पादन घट्ने उनीहरूको चिन्ता छ । कतिपय किसानले अनुदानको मल दोब्बर मूल्य तिरेर निजी पसलबाट खरिद गरेका छन् । कतिपय सहकारी संस्थाले नै किसानबाट दोब्बर मूल्य उठाइरहेका छन् । तर बिल दिने गरेका छैनन् । रायले खेतमा मल नहाली रोपाइँ सकेको जनाउँदै गाँज हाल्ने बेलासम्ममा पनि नपाएको गुनासो गरे । मल छर्ने मुख्य–मुख्य समयमा नै नपाउँदा किसानको बिजोग हुने गरेको उनले सुनाए । ‘हिउँदे बालीमा पर्याप्त मल छर्न पाएनौं, जसको असर उत्पादनमा बेहोर्नुपर्‍यो, अहिले धानको गाँज हाल्ने मुख्य समयमा मल हालिएन भने उत्पादन घट्नेछ,’ रायले भने, ‘तर मल कतै पनि पाइरहेको छैन, किसानको आवाज सुनिदिने कोही भएनन् ।’

सहकारीले कृषि सामग्री कम्पनीबाट थोरै परिमाणमा मल पाएपछि कालोबजारीसमेत हुन थालेको छ । थोरै मात्रामा मल पाएपछि कतिपय सहकारीले स्थानीय व्यापारीलाई बुझाउने गरेका छन् । व्यापारीले किसानबाट चर्को मूल्य असुल्ने गरेका छन् । कतिपय सहकारी संस्थाले नै ८ सय १५ रुपैयाँ पर्ने युरिया मलको १ हजार ५ सय रुपैयाँ असुल्ने गरेका छन् । पिपरियाकै उपेन्द्र साहले युरिया प्रतिबोरा १ हजार ५ सयका दरले किने । ‘सरकारले अनुदानको मल लिन तोकेकै संस्थाबाट झन्डै डबल मूल्य तिरेर ल्याएको हो, तर उनीहरूले बिल दिन मानेनन्,’ साहले भने, ‘के गर्नु, मल हाल्नुपर्ने बाध्यता छ, उनीहरूले भनेको मूल्य दिइन भने त्यो मल पनि हातबाट फुत्किन्छ ।’ किसानका लागि ल्याइएको अनुदानको मल कृषि सामग्रीको शाखाबाट लिँदा भीडभाड हुने भएपछि केही वर्षदेखि कम्पनीले सहकारीमार्फत दिने नीति बनाएको थियो ।

कृषि सामग्री कम्पनीले भने किसानका लागि पिकआवर मानिएको समयमै गोदाममा एक बोरा पनि मल नभएको जनाएको छ । कम्पनी नवलपुरका प्रमुख दीपक बर्मलेले वीरगन्ज गोदाममा मल आइसके पनि त्यहाँ अवरोध भइरहेकाले अहिलेसम्म मल ल्याउन नसकिएको जानकारी दिए । बर्मलेका अनुसार भदौको पहिलो सातासम्ममा मल जिल्ला आइपुग्ने छ । उनले अभाव भएका बेला मलको कालाबजारी पनि बढेको जनाउँदै यसको नियमनमा स्थानीय तह लाग्नुपर्ने बताए ।

वीरगन्ज महानगरले छोड्यो ४ ट्रक मल

पर्सा– वीरगन्ज महानगरपालिका क्षेत्रका किसानलाई निर्धारित कोटाभन्दा तीन गुणा बढी युरिया मल दिने सहमति भएपछि महानगरको नियन्त्रणमा रहेको कृषि सामग्री कम्पनीका ४ ट्रक मल छाडिएको छ । सोमबार महानगरका प्रमुख प्रशासकीय अधिकृत लक्ष्मीप्रसाद पौडेल र कृषि सामग्री कम्पनी मधेस प्रादेशिक कार्यालय वीरगन्जका प्रमुख चन्द्रप्रसाद चौलागाईंबीच ४ बुँदे सहमति भएको हो । त्यसलगत्तै ट्रक छाडिएको कम्पनी प्रादेशिक कार्यालयका सूचना अधिकृत आलोक कुमारले जानकारी दिए । सहमतिअनुसार वीरगन्ज महानगरपालिकाले समन्वय गर्ने गरी यसअघि उपलब्ध गराइएको २ हजार ७ सय ७१ बोरा युरिया मलबाहेक थप ६ हजार बोरा मल यसै साताभित्र उपलब्ध गराइनेछ ।

प्रकाशित : श्रावण ३१, २०७९ ०८:२४
पूरा पढ्नुहोस्
प्रतिक्रिया
पठाउनुहोस्
×