शिलान्यासको १२ वर्षपछि पुल बन्दै- मधेस - कान्तिपुर समाचार
कान्तिपुर वेबसाईट
AdvertisementAdvertisement

शिलान्यासको १२ वर्षपछि पुल बन्दै

नदीले धार बदलेपछि रोकिएको काम दोस्रो ठेक्कापछि सुरू
५७ करोड ४० लाख लागतको नयाँ ठेक्का
शिव पुरी

रौतहट — नदीले धार परिवर्तन गरेपछि अलपत्र परेको दुर्गा भगवती गाउँपालिका–५ स्थित रौतहट–सर्लाही सीमा क्षेत्रमा पर्ने वाग्मती पुल निर्माण १२ वर्षपछि बल्ल थालिएको छ । हुलाकी राजमार्ग निर्देशनालयले दोस्रो पटक पुलको ठेक्का लगाएपछि निर्माण कम्पनीले काम सुरु गरेको हो ।

निर्देशनालयका निर्देशक धर्मेन्द्र झाले पुरानो ठेक्का रद्द गरेर नयाँ ठेक्कामार्फत काम सुरु गरेको बताए । उनका अनुसार अहिले वाग्मती नदीको पूर्वक्षेत्रमा माटोको काम भइरहेको छ । ‘पुलको भार थेग्न सक्ने/नसक्ने भन्ने डिजाइनका लागि कन्सल्टेन्टलाई जिम्मा दिएका छौं । ढिला भए पनि अब काम रोकिँदैन,’ उनले भने । २२४१ मिटर लम्बाइ नदी नियन्त्रणको कामसहित पुल

निर्माणका लागि महालक्ष्मी, विकास, वाईपी जेभीले ५७ करोड ४० लाख रुपैयाँमा ठेक्का सकारेको निर्देशनालयले जनायो । ठेकेदारले २०८१ कात्तिक १० मा काम सम्पन्न गर्ने गरी २०७९ वैशाख ११ मा सम्झौता गरेको हो । पुलको चौडाइ ६ मिटरबाट बढाई ७ बनाउने तयारीमा निर्देशनालयले कन्सल्टेन्टलाई भार थेग्न सक्ने/नसक्ने भन्ने यकिन गर्न जिम्मा दिएको छ ।

मधेसका सदरमुकामलाई जोड्ने महत्त्वाकांक्षी परियोजनाअन्तर्गत पुल बनाउन थालिएको थियो । निर्माणकै क्रममा पुलभन्दा ८ सय मिटर पूर्वबाट खोला बग्न थालेपछि काम रोकिएको निर्देशनालयले जनाएको छ । लामो समयसम्म निर्माण कम्पनी र निर्देशनालयबीच काम थाल्न छलफल भए पनि सहमति भएन । निर्माण कम्पनी लुम्बिनी बिल्डर्सका ठेकेदार लंक केसीले पुल निर्माण गर्ने समय सकिएको र लामो समयसम्म निर्देशनालयले साइट उपलब्ध गराउन नसकेकाले एकतर्फी ठेक्का तोडेको जानकारी गराए । तत्कालको अवस्थाभन्दा निर्माण सामानको भाउ अकासिएकाले पुरानै दरमा काम गर्न नसक्ने उनको भनाइ थियो ।

ठेकेदारले उच्च अदालत पाटनमा रिट निवेदन दायर गरेपछि अदालतले निर्माण कम्पनीले काम गरेको भुक्तानी दिन आदेश दिएको थियो । ठेकेदार कम्पनीले लुम्बिनीले त्यतिबेला ३५ करोड ८९ लाख रुपैयाँमा ठेक्का सकारेको थियो । लुम्बिनीले ठेक्का सकारे पनि पप्पु कन्स्ट्रक्सनले निर्माण थालेको थियो । ठेक्का सकार गर्ने बेला पप्पुको कम्पनी कालोसूचीमा परेको थियो । लुम्बिनी बिल्डर्सले २०६७ जेठ ३१ मा सम्झौता गर्दै २०७० जेठ ३० काम सक्ने जनाएको थियो । सम्झौतापछि तत्कालीन प्रधानमन्त्री माधवकुमार नेपालले पुलको शिलान्यास गरेका थिए । पुलको लम्बाइ ६३४ मिटर र चौडाइ डबल लेन्थको छ । पुलमा १७ स्पानसहितको सम्झौता भएको थियो । लुम्बिनीले १७ वटै स्पानको काम सकेको थियो ।

रौतहटका बतसपुर, बडहर्वा, राजदेवीलगायत स्थानका स्थानीय डुंगा चढेर पारी खेतमा काम गर्न जान्छन् । वाग्मती नदीले कटानमा पारेपछि केहीको खेत पारि सर्लाहीतिर परेको छ । बर्खामा जोखिम मोलेर डुंगामा वारपार गर्दै आएको स्थानीय रामेश्वर साहले बताए । ‘समयमा पुल बनेको भए दुवै जिल्लाका स्थानीयलाई वारपार गर्न सहज हुन्थ्यो,’ उनले भने, ‘अहिले डुंगा चढेर आउजाउ गर्नुपर्छ ।’

प्रकाशित : श्रावण २९, २०७९ ०९:२०
प्रतिक्रिया
पठाउनुहोस्

विरोधबीच तिलावे पुल उद्घाटन

कान्तिपुर संवाददाता

पर्सा — काम नसकिएको भन्दै विरोध भए पनि हुलाकी राजमार्गअन्तर्गत वीरगन्ज–ठोरी सडक खण्डको तिलावे नदीको पुल शनिबार उद्घाटन गरिएको छ । भौतिक पूर्वाधार तथा यातायातमन्त्री मोहम्मद इस्तियाक राई र वन तथा वातावरण मन्त्री प्रदीप यादवले पुलको संयुक्त उद्घाटन गरेका हुन् ।

पुल तयार भए पनि त्यससँगैको करिब १ सय मिटर एप्रोच सडक र नदी नियन्त्रणको काम पूरा भएको छैन । ठेक्का लागेको ७ वर्षपछि पुल निर्माण भएको हो । पप्पु/लुम्बिनी जेभीले १ सय मिटर लामो र ७ मिटर चौडा पुल निर्माण गरेको छ । ७ करोड ७१ लाख रुपैयाँ (भ्याटबाहेक) मा पुल निर्माणको सम्झौता २०७२ जेठ २५ मा भई पहिलो पटक काम सम्पन्न गर्नुपर्ने म्याद २०७५ जेठ २४ मा थियो । तर ठेकेदार कम्पनीले पटकपटक म्याद थप गराउँदै आएका थिए ।

हतारमा पुलको उद्घाटन गरेर एप्रोच सडक र नदी तटबन्धको काम ठेकेदार कम्पनीले नगर्ने आशंका स्थानीयलाई छ । त्यसपछि उनीहरूले विरोध जनाउँदै आएका हुन् । तिलावे पुल निर्माण दबाब समूहका प्रतिनिधि राकेश यादवले हतारमा पुलको मात्र उद्घाटन गरेर जनभावनाविपरीत काम गरिएको बताए । ‘काम पूर्णरूपले सम्पन्न गरेर भव्य उद्घाटन गरिएको भए हाम्रो आपत्ति थिएन,’ उनले भने, ‘तर किन र के कति कारण पुलको उद्घाटन गर्न ठेकेदारलाई हतारो भयो बुझ्न सकिएन, अहिले उद्घाटन कार्यक्रममा सहभागी भएका मन्त्री र नेताले भोलि काम सम्पन्न नगरी ठेकेदार कम्पनी हिँडे त्यसको जिम्मेवारी पनि लिनुपर्छ ।’

मन्त्री मोहम्मद इस्तियाक राईले नेता बनेर काम नगर्ने ठेकेदारलाई कारबाही गर्ने चेतावनी दिए । ‘नेता बनेर काम नगर्ने प्रवृत्ति बढेको छ, वडाध्यक्षदेखि सांसदसम्म ठेकेदार छन्,’ उनले भने, ‘जनताप्रति उत्तरदायी नहुने नेतालाई ‘नमस्कार’ गर्नु ठीक हुन्छ, जिम्मेवारी लिएर काम नगर्ने ठेकेदारलाई कारबाही गर्छौं ।’ मन्त्री राईले विकासमा अवरोध सृजना गर्नेलाई जनताले चिन्नुपर्ने बताए । उनले आफूले मन्त्रालयको जिम्मेवारी सम्हालेपछि ८२ पुल अलपत्र रहेकामा त्यसलाई झारेर ३४ मा ल्याएको दाबी गरे । मन्त्री राईले वीरगन्जस्थित पदमरोडको ३ किलोमिटर खण्डमा ११ मिटर कालोपत्र गर्ने गरी ठेक्का लगाउने बताए ।

वन तथा वातावरणमन्त्री प्रदीप यादवले वर्षौंदेखि ठेक्का लिएर बस्ने काम नगर्ने ठेकेदारको ठेक्का रद्द र लाइसेन्स खारेजीसम्मको कारबाही हुनुपर्ने बताए । ‘१५ वर्षदेखि पुलको ठेक्का लिएर बसेका छन्, एक जना मान्छे पुल बनाउन खटिएको हुन्छ,’ उनले भने, ‘अब कालोसूचीमा राखेर नहुने रहेछ, एउटा कालोसूचीमा राख्यो अर्को कम्पनी दर्ता गरेर आउँछ, अब समयमा काम नगर्ने ठेकेदारको ठेक्का रद्द गर्ने र लाइसेन्स खारेज नै गर्नुपर्छ ।’ उनले हुलाकी राजमार्गअन्तर्गत वीरगन्ज–ठोरी र ठोरी–माडी खण्डमा वनका कारण उत्पन्न समस्या समाधान गर्न आफूले सक्दो प्रयास गर्ने पनि बताए ।

प्रकाशित : श्रावण २९, २०७९ ०९:२०
पूरा पढ्नुहोस्
प्रतिक्रिया
पठाउनुहोस्
x
×