विरोधबीच तिलावे पुल उद्घाटन- मधेस - कान्तिपुर समाचार
कान्तिपुर वेबसाईट
AdvertisementAdvertisement

विरोधबीच तिलावे पुल उद्घाटन

कान्तिपुर संवाददाता

पर्सा — काम नसकिएको भन्दै विरोध भए पनि हुलाकी राजमार्गअन्तर्गत वीरगन्ज–ठोरी सडक खण्डको तिलावे नदीको पुल शनिबार उद्घाटन गरिएको छ । भौतिक पूर्वाधार तथा यातायातमन्त्री मोहम्मद इस्तियाक राई र वन तथा वातावरण मन्त्री प्रदीप यादवले पुलको संयुक्त उद्घाटन गरेका हुन् ।

पुल तयार भए पनि त्यससँगैको करिब १ सय मिटर एप्रोच सडक र नदी नियन्त्रणको काम पूरा भएको छैन । ठेक्का लागेको ७ वर्षपछि पुल निर्माण भएको हो । पप्पु/लुम्बिनी जेभीले १ सय मिटर लामो र ७ मिटर चौडा पुल निर्माण गरेको छ । ७ करोड ७१ लाख रुपैयाँ (भ्याटबाहेक) मा पुल निर्माणको सम्झौता २०७२ जेठ २५ मा भई पहिलो पटक काम सम्पन्न गर्नुपर्ने म्याद २०७५ जेठ २४ मा थियो । तर ठेकेदार कम्पनीले पटकपटक म्याद थप गराउँदै आएका थिए ।

हतारमा पुलको उद्घाटन गरेर एप्रोच सडक र नदी तटबन्धको काम ठेकेदार कम्पनीले नगर्ने आशंका स्थानीयलाई छ । त्यसपछि उनीहरूले विरोध जनाउँदै आएका हुन् । तिलावे पुल निर्माण दबाब समूहका प्रतिनिधि राकेश यादवले हतारमा पुलको मात्र उद्घाटन गरेर जनभावनाविपरीत काम गरिएको बताए । ‘काम पूर्णरूपले सम्पन्न गरेर भव्य उद्घाटन गरिएको भए हाम्रो आपत्ति थिएन,’ उनले भने, ‘तर किन र के कति कारण पुलको उद्घाटन गर्न ठेकेदारलाई हतारो भयो बुझ्न सकिएन, अहिले उद्घाटन कार्यक्रममा सहभागी भएका मन्त्री र नेताले भोलि काम सम्पन्न नगरी ठेकेदार कम्पनी हिँडे त्यसको जिम्मेवारी पनि लिनुपर्छ ।’

मन्त्री मोहम्मद इस्तियाक राईले नेता बनेर काम नगर्ने ठेकेदारलाई कारबाही गर्ने चेतावनी दिए । ‘नेता बनेर काम नगर्ने प्रवृत्ति बढेको छ, वडाध्यक्षदेखि सांसदसम्म ठेकेदार छन्,’ उनले भने, ‘जनताप्रति उत्तरदायी नहुने नेतालाई ‘नमस्कार’ गर्नु ठीक हुन्छ, जिम्मेवारी लिएर काम नगर्ने ठेकेदारलाई कारबाही गर्छौं ।’ मन्त्री राईले विकासमा अवरोध सृजना गर्नेलाई जनताले चिन्नुपर्ने बताए । उनले आफूले मन्त्रालयको जिम्मेवारी सम्हालेपछि ८२ पुल अलपत्र रहेकामा त्यसलाई झारेर ३४ मा ल्याएको दाबी गरे । मन्त्री राईले वीरगन्जस्थित पदमरोडको ३ किलोमिटर खण्डमा ११ मिटर कालोपत्र गर्ने गरी ठेक्का लगाउने बताए ।

वन तथा वातावरणमन्त्री प्रदीप यादवले वर्षौंदेखि ठेक्का लिएर बस्ने काम नगर्ने ठेकेदारको ठेक्का रद्द र लाइसेन्स खारेजीसम्मको कारबाही हुनुपर्ने बताए । ‘१५ वर्षदेखि पुलको ठेक्का लिएर बसेका छन्, एक जना मान्छे पुल बनाउन खटिएको हुन्छ,’ उनले भने, ‘अब कालोसूचीमा राखेर नहुने रहेछ, एउटा कालोसूचीमा राख्यो अर्को कम्पनी दर्ता गरेर आउँछ, अब समयमा काम नगर्ने ठेकेदारको ठेक्का रद्द गर्ने र लाइसेन्स खारेज नै गर्नुपर्छ ।’ उनले हुलाकी राजमार्गअन्तर्गत वीरगन्ज–ठोरी र ठोरी–माडी खण्डमा वनका कारण उत्पन्न समस्या समाधान गर्न आफूले सक्दो प्रयास गर्ने पनि बताए ।

प्रकाशित : श्रावण २९, २०७९ ०९:२०
प्रतिक्रिया
पठाउनुहोस्

बोल्नसक्ने भए रुस्दी, भेन्टिलेटरबाट बाहिर निकालियो

कान्तिपुर संवाददाता

काठमाडौँ — आक्रमणपछि उपचाररत प्रसिद्ध लेखक सलमान रुस्दीलाई अहिले भेन्टिलेटरबाट बाहिर निकालेर उपचार जारी रहेको र उनी बोल्न सक्ने भएको बताइएको छ ।

शनिबार न्युयोर्कस्थित एक कार्यक्रममा बोल्नका लागि मञ्चमा उभिरहँदा रुस्दीमाथि सांघातिक आक्रमण भएको थियो ।

आक्रमणपछि उनलाई अस्पतालमा राखेर उपचार गरिएको छ । रुस्दीका एजेन्ट एन्ड्र्यु वाइलले अमेरिकी मिडियासँग रुस्दीको उपचारको क्रममा उनले आँखा गुमाउन सक्ने प्रतिक्रिया दिएका थिए । साथै उनको कलेजोमा पनि क्षति पुगेको वाइलले बताएका थिए ।

७५ वर्षीय रुस्दीले यसअघि नै आफ्नो लोकप्रिय कृति 'द सटानिक भर्सेस'का कारण ज्यान मार्ने धम्कीको सामना गरिसकेका छन् । मुस्लिम समूहहरूबाट उनले इश्वरको अनादर गरेको भन्दै ज्यान मार्ने धम्की आएको हो ।

न्युयोर्कस्थित शनिबारको कार्यक्रममा रुस्दीमाथि आक्रमण गर्ने व्यक्तिलाई नियन्त्रणमा लिएर अहिले हिरासतमा राखिएको छ । यस घटनामा २४ वर्षीय हादी माटर नामका व्यक्तिमाथि ज्यान मार्ने प्रयास गरेको आरोप लागेको छ । अमेरिकी मिडियाका अनुसार ती व्यक्तिले स्टेजमा उक्लिएर रुस्दीको अनुहार, घाँटी र पेटमा कम्तीमा १० पटक चक्कु प्रहार गरेका थिए ।

यद्यपि रुस्दीको पछिल्लो स्वास्थ्य अवस्था चिकित्सकले सार्वजनिक गरेका छैनन् । तर कतिपय लेखक र उनका साथीहरूले रुस्दी बोल्न सक्ने भएको भन्दै स्वास्थ्यलाभको कामना गरेका छन् । यस्तै रुस्दी वक्ता रहेको कार्यक्रम आयोजक संस्थाका अध्यक्ष माइकल हिलले पनि रुस्दीलाई अहिले भेन्टिलेटरबाट बाहिर निकालेर उपचार भइरहेको भन्दै ट्विट गरेका छन् । र उनले रुस्दी बोल्न सक्ने भएको जानकारी दिएका छन् ।

रुस्दीमाथि आक्रमण भएपछि त्यहाँको सुरक्षा व्यवस्थालाई लिएर उनी वक्ता रहेको कार्यक्रम आयोजकमाथि प्रश्न उठाइएको छ । १९८८ मा 'द सटानिक भर्सेस' लेखेपछि धम्कीका कारण रुस्दी १० वर्षसम्म भूमिगत बनेका थिए ।

लेखनको मूल्य चुकाउँदै रुस्दी

प्रकाशित : श्रावण २९, २०७९ ०९:२०
पूरा पढ्नुहोस्
प्रतिक्रिया
पठाउनुहोस्
x
×