श्रीमतीको हत्या आरोपमा युवक पक्राउ- मधेस - कान्तिपुर समाचार

श्रीमतीको हत्या आरोपमा युवक पक्राउ

कान्तिपुर संवाददाता

काठमाडौँ — पर्साको बीरगञ्ज महानगरपालिका वडा नम्बर २३ इटियाही टोलस्थित आफ्नै श्रीमतीको हत्या आरोपमा एक युवक पक्राउ परेका छन् । इटियाही टोलमा २३ वर्षीया प्रतिमा कुमारी यादवको हत्या गरेको आरोपमा दिनेश प्रसाद यादव पक्राउ परेका हुन् ।

प्रहरीको प्रारम्भिक अनुसन्धान अनुसार आरोपित यादवले श्रीमती प्रतिमाको घाँटी थिचेर हत्या गरेको बुझिएको छ । घटनापछि वडा प्रहरी कार्यालय श्रीपुरको टोलीले घटनास्थल पुगेर दिनेश यादवलाई नियन्त्रणमा लिइ अनुसन्धान सुरु गरेको जनाएको छ ।

प्रहरीले २६ वर्षीय आरोपित यादवमाथि कर्तव्य ज्यान मुद्दामा अनुसन्धान गरिरहेको जनाएको छ ।

प्रकाशित : श्रावण २७, २०७९ १५:२८
प्रतिक्रिया
पठाउनुहोस्

ओलीसँगको भेटेपछि रेखा थापाले भनिन् - 'महिला उम्मेदवारीबारे छलफल भयो'

कान्तिपुर संवाददाता

काठमाडौँ — राष्ट्रिय प्रजातन्त्र पार्टी (राप्रपा) की केन्द्रीय सदस्य रेखा थापाले केपी ओलीसँगको भेटको क्रममा समसामयिक राजनीति र आगामी चुनावमा महिलालाई उम्मेदवार बनाउने सवालमा कुराकानी भएको बताएकी छन् । गत बुधबार थापा र राप्रपाकी महामन्त्री कुन्ती शाहीले बालकोट पुगेर एमाले अध्यक्ष ओलीसँग भेट गरेका थिए ।

यस क्रममा नेत्री थापाले आफू परिपक्व भइसकेको र राजनीतिमा सक्रिय रहेको बताएकी छन् । एमाले अध्यक्ष ओलीसँगको भेटबारे उठेका जिज्ञासाको जवाफ दिँदै उनले यस्तो प्रतिक्रिया दिएकी हुन् ।

हरेक दलहरूले महिलालाई कोटामै सीमित गरिरहेको सन्दर्भ निकाल्दै उनले एमालेका अध्यक्ष ओलीसँग पनि महिलालाई प्रत्यक्षतर्फ उठाउने कि भन्ने बारे छलफल गरेको बताइन् । थापाले भनेकी छन्, 'यो पटकको चुनावमा महिलालाई प्रतक्षतर्फ उठाउने कि भन्ने सवालमा उहाँसँग छलफल भएको हो । महिलाहरूलाई त्यसरी उठाउँदा उनीहरू सक्षम हुन्छन् ।'

अभिनेत्रीसमेत रहेकी थापा यसअघि माओवादी केन्द्रमा आवद्ध थिइन् । माओवादी केन्द्र परित्याग गर्दै उनी राप्रपाको एकता महाधिवेशनअघि राप्रपामा प्रवेश गरेकी हुन् । साथै उनी महामन्त्री पदमा कुन्ती शाहीसँग पराजित भएकी थिइन् ।

एमाले अध्यक्ष ओलीसँगको भेटबारे राप्रपाकी महामन्त्री कुन्ती शाहीले पनि राजनीति र समकालीन परिस्थितिबारे छलफल भएको बताइन् । तर कुनै खास एजेन्डामा भेट्न नगएको उनको भनाइ छ ।

प्रकाशित : श्रावण २७, २०७९ १५:१०
पूरा पढ्नुहोस्
प्रतिक्रिया
पठाउनुहोस्
×