माछा आयात बढ्यो- मधेस - कान्तिपुर समाचार
कान्तिपुर वेबसाईट
AdvertisementAdvertisement

माछा आयात बढ्यो

कान्तिपुर संवाददाता

पर्सा — वीरगन्ज नाकाबाट अघिल्लो आर्थिक वर्षको तुलनामा गत आवमा माछा आयात बढेको छ । पशु क्वारेन्टाइन कार्यालय पर्साका अनुसार गत आव २०७८/७९ मा वीरगन्ज नाका हुँदै ६ सय ४८ मेट्रिक टन माछा आयात भएको छ । अघिल्लो आव २०७७/७८ मा भने यो नाकाबाट ५० मेट्रिक टन माछा भित्रिएको थियो । 

नेपालमा विशेषगरी भारतबाट माछा आयात हुँदै आएको छ । स्वदेशमै संघ तथा प्रदेश सरकारले माछा जोन घोषणा गरेर किसानलाई माछापालनमा प्रोत्साहित गर्न अनुदानलगायत कार्यक्रम सञ्चालन गर्दै आएको छ । तर, सरकारको योजनाअनुसार माछा आयात भने कम हुन सकेको छैन ।

कार्यालयका अनुसार बोनलेस र एकोरियम माछाको आयात पनि बढेको छ । अघिल्लो आवमा यो नाका हुँदै भारतबाट २६ मेट्रिक टन बोनलेस माछा आयात भएको थियो । गत आवमा भने ५ सय ४६ मेटन आयात भएको छ । अघिल्लो आवमा ८ हजार ३ सय ५ वटा एकोरियम माछा आयात भएकोमा गत आवमा झन्डै ५ लाख १९ हजार ४ सय ९ वटा आयात गरिएको छ । घर तथा व्यावसायिक प्रतिष्ठानमा सजाउन पालिने यस्तो माछाका लागि भारतमै निर्भरता देखिन्छ ।

विगतमा भारतको आन्ध्र प्रदेशबाट आलो माछा ल्याइने गरेकोमा हाल भने कोलकाताबाट आयात भइरहेको छ । कोलकातामा भारतको क्वारेन्टाइन कार्यालय रहेकाले आयातकर्ताले त्यहाँबाट उत्पत्ति प्रमाणपत्र ल्याउन सहज हुन्छ । कार्यालय प्रमुख डा. हरेराम यादवका अनुसार अघिल्लो आवमा मासुमाछा आयात गर्दा भारतीय क्वारेन्टाइनको उत्पत्तिको सिफारिस र स्वास्थ्य प्रमाणपत्र अनिवार्य गरिएपछि आयात घटेको थियो ।

प्रकाशित : श्रावण १९, २०७९ ०७:४३
प्रतिक्रिया
पठाउनुहोस्

रुकुमबाट जडीबुटी निकासी बढ्यो

कान्तिपुर संवाददाता

रुकुम पश्चिम — जिल्लाबाट एक वर्षको अवधिमा ४५ हजार ९ सय १२ किलो जडीबुटी जिल्ला बाहिर गएको छ । गत आर्थिक वर्ष २०७८/७९ मा अघिल्लो आर्थिक वर्ष २०७७/७८ को तुलनामा १ हजार ३ सय ८४ किलो बढी जडीबुटी बाहिरिएको हो ।

डिभिजन वन कार्यालयका अनुसार गत आर्थिक वर्षमा जिल्लाबाट विभिन्न २६ प्रजातिका जडीबुटी बाहिर पठाइएको छ । एक वर्षको अवधिमा विभिन्न २८ प्रजातिका ५७ हजार ६ सय ७२ किलो जडीबुटी संकलन भए पनि असार मसान्तसम्ममा ४५ हजार ९ सय १२ किलोको छुटपुर्जी दिइएको कार्यालयका निमित्त प्रमुख महेश कुमाईले बताए । उनका अनुसार संकलन भएकोमध्ये ११ हजार ७ सय ६० किलो जडीबुटीको छुटपुर्जी काटिएको छैन । जिल्लामा सेतक चिनी, सोमलता, पदमचाल, साधारण च्याउ, दालचिनीको बोक्रा, अमला, अल्लो, पावन बोक्रा, पाखनबेद, रिठा, टिमुर, भिर मह, चिराइतो, लहरे गुर्जोलगायतका जडीबुटी पाइन्छन् ।

जडीबुटीबाट डिभिजन वन कार्यालयले गत आर्थिक वर्षमा ४ लाख ५६ हजार रुपैयाँ राजस्व संकलन गरेको छ । जिल्लाबाट दाङ, नेपालगन्ज, काठमाडौंमा जडीबुटी जाने गरेको कार्यालयका सूचना अधिकारी जीवराज महतले बताए । उनका अनुसार सबैभन्दा बढी जडीबुटी आठबीसकोट नगरपालिकाबाट संकलन हुने गरेको छ । ‘जडीबुटी संकलनबाट स्थानीयको आम्दानी बढिरहेको छ,’ उनले भने, ‘जिल्लाको आर्थिक कारोबार पनि बढिरहेको छ ।’

प्रकाशित : श्रावण १९, २०७९ ०७:४३
पूरा पढ्नुहोस्
प्रतिक्रिया
पठाउनुहोस्
×