गण्डक नहरमा यस वर्ष ढिला पानी आउने - मधेस - कान्तिपुर समाचार
कान्तिपुर वेबसाईट
AdvertisementAdvertisement

गण्डक नहरमा यस वर्ष ढिला पानी आउने 

शंकर आचार्य

पर्सा — नेपालतर्फ गण्डक नहरमा २ स्थानमा पुल निर्माणको काम जारी रहेकाले यस वर्ष नहरमा धानबालीका लागि नियमित तालिकाभन्दा ढिलो गरी पानी आउने भएको छ ।

निर्धारित समयमा नहरमा पानी नआउने भएपछि नहरमा आश्रित पर्सा र बाराका किसानले समयमै रोपाइँ गर्न नपाउने भएका छन् । भारतसँगको सम्झौता अनुसार बर्सेनि धान सिजनका लागि असार १५ र गहुँ सिजनका लागि पुस १० देखि नहरमा पानी आइसक्नु पर्छ ।

नारायणी सिंचाइ व्यवस्थापन कार्यालयका सूचना अधिकृत इन्जिनियर सुवोध कुशवाहाका अनुसार, नहरअन्तर्गत वीरगन्ज महानगरपालिका वडा नम्बर २७ मा २ वटा ‘फुट ब्रिज’ निर्माणाधीन रहेको र तीन वटाको काम सम्पन्न भएकाले यस वर्ष नहरमा नेपालतर्फ पानी आउन ढिला हुने भएको हो ।

‘सर्वसाधारणको आवागमनमा सहजताका लागि नहरमा हाल २ वटा फुट ब्रिज निर्माणाधीन छन्, तिनको काम सक्न अझै करिब एक साता लाग्ने अनुमान छ,’ उनले भने, ‘असार २० देखि मात्र नहरमा पानी आउने सम्भावना छ ।’

भारतीय पक्षले नहरको ‘जिरो आरडी’ सम्म पानी दिइसके पनि नेपाली भूिममै नहरमा निर्माण कार्य भई रहेकाले नहरमा पानी प्रवाह गर्न समस्या भएको उनले बताए । ‘जिरो आरडीमा हाल भारतले करिब ४ सय क्युसेक पानी दिइसकेको छ,’ उनले भने, ‘हाम्रो निर्माण कार्य सम्पन्न भइनसकेकाले नहरमा नेपालतर्फ पानी ल्याउन नसकिएको हो ।’

प्रकाशित : असार १३, २०७९ १६:१६
प्रतिक्रिया
पठाउनुहोस्

हैजा नियन्त्रणमा सरकार गम्भीर बन्नुपर्छ : सांसद लामा

कान्तिपुर संवाददाता

काठमाडौँ — नेकपा एमालेकी सांसद नवीना लामाले हैजा रोग न्यूनिकरण तथा नियन्त्रणका लागि सरकार गम्भीर बन्नुपर्ने बताएकी छन् ।

सोमबार शिक्षा तथा स्वास्थ्य समितिको बैठकमा सांसद लामाले अहिले काठमाडौंमा हैजाको समस्याले जनता त्रस्त भइरहेको भन्दै सरकार यसमा गम्भीर बन्नुपर्ने बताएकी हुन् ।

उनले काठमाडौंमा विशेषगरी बालबालिकाहरुमा हैजाको समस्या देखा परेको भन्दै महंगीको बेलामा सामान्य जनताको सुलभ उपचारको व्यवस्था मिलाउन सरकारसँग माग गरिन् ।

सांसद लामाले सरकारले हैजाको बारेमा मूल्यवृद्धिको चापमा परेका जनताको समस्यालाई बुझेर उपचार हुने व्यवस्था गर्नुपर्ने बताइन् । ‘अहिले विशेषगरी बच्चाहरुमा झाडापखाला, हैजा जस्ता रोग लागिरहेको छ । त्यो पनि काठमाडौंका बच्चाहरूमा धेरै देखिएको छ । यसको बारेमा सामान्य जनताले यस्तो महंगी र मूल्यवृद्धिको बेलामा चुलो बाल्न मुस्किल भएको बेलामा यस्तो रोग आउँदा उपचार पाउँछ कि पाउँदैन ? यस्तो त्रासमा जनता छन् । सरकारको योजना के छ ? त्यसको बारेमा गम्भीर बन्नुपर्छ,' सांसद लामाले भनिन् ।

प्रकाशित : असार १३, २०७९ १६:०४
पूरा पढ्नुहोस्
प्रतिक्रिया
पठाउनुहोस्
×