युवकको हत्या आरोपमा १ जना पक्राउ- मधेस - कान्तिपुर समाचार

युवकको हत्या आरोपमा १ जना पक्राउ

शंकर आचार्य

पर्सा — ठोरी गाउँपालिका ५ ठूलो बाघमोर्चामा बस्ने २३ वर्षीय प्रवीण पाख्रिनको हत्यामा संलग्न भएको आशंकामा प्रहरीले एक जनालाई पक्राउ गरेको छ । पाख्रिनलाई शुक्रबार साँझ पौने ५ बजे ठोरी-५ स्थित बाघमोर्चा मन्दिरको छेउमा अज्ञात व्यक्तिहरूले ढुंगाले टाउको र अनुहारमा प्रहार गरी अचेत बनाएर फरार भएका थिए । 


उनको वीरगन्जस्थित एलएस न्युरो हस्पिटलमा आइतबार बिहान ११ बजे उपचारको क्रममा मृत्यु भएको थियो । उक्त घटनाको अनुसन्धानको क्रममा स्थानीय एक १७ वर्षीय किशोरलाई शनिबार नियन्त्रणमा लिई ज्यानसम्बन्धी कसूरमा अनुसन्धान भइरहेको जिल्ला प्रहरी कार्यालयले जनाएको छ ।

साथै उक्त घटनामा सलंग्न भएको भन्ने हालसम्मको अनुसन्धानबाट खुलेका अन्य ३ जना व्यक्तिहरू फरार रहेकाले उनीहरुको खोजतलास तदारुकताका साथ भइरहेको जिल्ला प्रहरी कार्यालयका प्रवक्ता डीएसपी ओमप्रकाश खनालले जानकारी दिए । घटनाबारे हालसम्मको अनुसन्धानले मृतक र आरोपीहरू सबै साथीभाइ रहेको र घटनाको दिन उनीहरट्ठबीच झैझगडा भएपछि तत्कालै आक्रोशमा पाख्रिनको हत्या गरिएको थियो ।

प्रकाशित : जेष्ठ ९, २०७९ १२:४१
प्रतिक्रिया
पठाउनुहोस्

विदेशी लगानीलाई निजी क्षेत्रले बाधक ठान्नु भएन : गभर्नर अधिकारी

'विदेशमा रहेका आफ्नै परिवारको नाममा कम्पनीको सेयर स्थानान्तरण गर्ने प्रवृति देखियो'
कान्तिपुर संवाददाता

काठमाडौँ — विदेशी लगानी सम्बन्धमा राज्य र निजी क्षेत्रको धारणा परिवर्तन गर्नुपर्ने राष्ट्र बैंकका गभर्नर महाप्रसाद अधिकारीले बताएका छन् । विदेशी लगानी आउँदा हामी कमजोर हुन्छौं भन्ने धारणा निजी क्षेत्रमा पनि रहेकाले उनीहरुले त्यसलाई समस्याका रुपमा हेर्ने गरेको उनले आरोप लगाए ।

'मेक इन नेपाल स्वदेशी समिट २०२२' को 'उत्पादन बढाउन विदेशी लगानीको अवसर' विषयक सत्रमा बोल्दै गभर्नर अधिकारीले सो कुरा बताएका हुन् । विदेशी लगानीलाई निजी क्षेत्रले बाधक नभए साधकका रुपमा लिनुपर्ने उनले बताए । विदेशी लगानीले पुँजीसँगै प्रविधि, व्यवस्थापकीय सीप, उत्कृष्ट कार्यशैली पनि आउने भएकाले स्वदेशी लगानीकर्ता र उत्पादनका लागि पनि लाभदायक हुने उनले बताए ।

विदेशी लगानी भित्रिएकै कारण नेपालका केही संस्थाहरु पहिले भन्दा धेरै प्रतिस्पर्धी भएको उदाहरण दिँदै उनले थपे, 'विदेशी लगानीमा उत्पादन भएका वस्तु तथा सेवाहरुको गुणस्तरमा राम्रो देखिन्छ ।'

नेपालमा नीतिगत अस्थिरता रहनु पनि अपेक्षित रुपमा विदेशी लगानी आउन नसक्नुको एक कारण भएको अधिकारीले बताए । 'विदेशी लगानीकर्ताले निश्चित समयका लागि योजना बनाएर लगानी गर्न चाहन्छन्,' उनले भने, 'पटक पटक नीति परिवर्तन हुँदा विदेशी लगानीकर्ताको कार्ययोजना नै प्रभावित हुन्छ ।'

विदेशी लगानीकर्ताका लागि नेपालमा थुप्रै प्रक्रियागत झन्झट रहेकाले त्यसमा राज्यस्तरबाट सहजीकरण गरिदिनुपर्ने उनले बताए । विदेशी लगानीको प्रवर्द्धन विशिष्टीकृत सेवा भएकाले सामान्य संस्थाले त्यो काम गर्न नसक्ने उनले बताए ।

विदेशी लगानीको नाममा केही विकृति भित्रिन थालेकाले त्यस्ता लगानी निरुत्साहित गर्नुपर्ने गभर्नर अधिकारीले बताए । 'नेपालकै वित्तीय स्रोतबाट स्थापना भइ राम्रोसँग सञ्चालन भइरहेका उद्योग व्यवसायको सेयर स्वामित्व विदेशमा रहेका आफ्नै परिवारको नाममा स्थानान्तरण गरेर विदेशी लगानी भित्र्याइएको देखाइने गरेको छ,' उनले भने, 'वास्तवमा त्यो विदेशी लगानी होइन । त्यो प्रक्रियामार्फत धेरै पुँजी बाहिरिएको छ ।' यसकारण त्यस्ता गतिविधि सबै मिलेर निरुत्साहित गर्नुपर्ने उनले बताए ।

प्रकाशित : जेष्ठ ९, २०७९ १२:४०
पूरा पढ्नुहोस्
प्रतिक्रिया
पठाउनुहोस्
x
×