वीरगन्जमा रगत अभाव- मधेस - कान्तिपुर समाचार

वीरगन्जमा रगत अभाव

शंकर आचार्य

पर्सा — वीरगन्जमा रगतको अभाव भएको छ । रक्त सञ्चार केन्द्र वीरगन्जमा शुक्रबार रगतको मौज्दात करिब सकिएको छ । केन्द्रका प्रमुख सौरभराज पाण्डेका अनुसार, शुक्रबार मध्यान्हसम्म केन्द्रमा ओ पोजेटिभ र ए पोजिटिभ रगतको केही पोका रहेकोमा त्यो पनि सकिएको छ ।

‘अब केन्द्रमा एक पोका पनि रगत छैन,’ उनले भने, ‘रगत खोज्दै आउनेहरुसँग शोधभर्नाबापत रगत लिएर रगत दिनुको विकल्प रहेन ।’

हालका दिनहरूमा वीरगन्जमा दैनिक ४० देखि ५० पोका रगतको माग रहेको र त्यो माग धान्न आफूहरुलाई धौधौ परेको उनले बताए । एक महिना यता स्थानीय तहको चुनावको माहोल तात्तिएसँगै पर्सा र बारा जिल्लामा रक्तदान हुने क्रम ह्वात्तै घटेपछि रगतको आपूर्ति र वितरणको तालमेल बिग्रिएको उनले बताए । ‘एकातिर गर्मी बढेपछि स्वाभाविक रुपमा रक्तदान कार्यक्रम कम हुन्छ, त्यसमाथि स्थानीय तहको निर्वाचन नजिकिएसँगै सामाजिक संघसंस्थाहरुले रक्तदान कार्यक्रम आयोजना गर्नै छोडेका छन्,’ पाण्डे भन्छन्, ‘समाजबाट रगत संकलन गर्ने मुख्य भूमिका सामाजिक संघसंस्था र दलका सक्रिय कार्यकर्ताहरु नै हुन्, उनीहरुनै निर्वाचनमा व्यस्त भएपछि रगतको मौज्दात घट्नु स्वाभाविक पनि हो ।’

यसअघि जेठ २ गते निजगढमा आयोजित रक्तदान कार्यक्रमबाट ४१ पोका र त्यसअघि वैशाख २४ गते वीरगन्ज कारागारमा भएको रक्तदान कार्यक्रमबाट २ सय ४६ पोका रगत संकलन भएको थियो । ‘२ सातामा २ पटक मात्र रक्तदान कार्यक्रम आयोजना हुन सक्यो, वीरगन्ज कारागारबाट संकलित रगतले धेरै भरथेग गरेको थियो,’ उनले भने, ‘उक्त रगतको मौज्दात पनि आज सक्कियो, अब हामी शोधभर्नामा रगत लिएर मात्र रगत उपलब्ध गराउन समर्थ छौं ।’

हाल अधिकांश स्थानीय तहको निर्वाचनको नतिजा आई सकेपनि रक्तदान कार्यक्रम आयोजन गर्ने तर्फ कसैको ध्यान नजादा थप केही दिन केन्द्रका लागि कष्टकर हुने उनले बताए । ‘निर्वाचनमा जितेकाहरु केही दिन खुसियाली मनाउन व्यस्त हुन्छन्, हारेकाहरु दु:ख मनाउन गरेर बस्छन्,’ उनले भने, ‘यसरी सबैको प्राथमिकतामा निर्वाचन मात्र परेको छ, सामाजिक र मानवीय काम पछि पर्‍यो, यस्तो अवस्थामा रक्तदान एउटा महान मानविय कार्य हो, यसले कसैको ज्यान बचाउँछ भन्ने कुरो धेरैले बिर्सिदिन्छन् ।’

प्रकाशित : जेष्ठ ६, २०७९ १६:२२
प्रतिक्रिया
पठाउनुहोस्

भारतबाट थप ३ चेली स्वदेश फर्काइए

शंकर आचार्य

पर्सा — भारतको २ वटा अर्केष्ट्राबाट तीन महिनाअघि उद्धार गरिएका १० नेपाली चेलीहरुमध्ये थप ३ चेलीलाई स्वदेश फिर्ता ल्याइएको छ । माइती नेपाल वीरगन्ज आवधिक गृह र पर्सा प्रहरीको संयुक्त टोली भारतको मोतिहारी पुगेर ३ चेलीहरुलाई बिहीबार साँझ वीरगन्ज फिर्ता ल्याएको हो ।

माइती नेपाल वीरगन्ज आवधिक गृहकी निमित्त प्रमुख गोमा पौडेलका अनुसार, बिहीबार फिर्ता ल्याइएका चेलीहरुमध्ये काभ्रेकी १४ वर्षीया, सिन्धुली र झापाका १८/१८ वर्षीया किशोरीहरु छन् ।

उनीहरुलाई आवश्यक प्रकृया पुरा गरेर अभिभावकको जिम्मा लगाइने पौडेलले बताइन् । उनीहरु मार्च १ देखि मोतिहारीस्थित बाल कल्याण समाजको गृहमा आश्रित थिए । तीन साता अघि पनि मोरङ र झापाका १९ वर्षीया २ चेलीहरुलाई यसरी नै स्वदेश फिर्ता ल्याइएको थियो ।

हाल फिर्ता ल्याइएका चेलीहरुलाई स्वदेश फिर्ता जान दिने मोतिहारी अदालतको आदेश पछि स्वदेश फिर्ता ल्याउने बाटो खुलेको हो । फेब्रुअरी १४ मा मोतिहारीको मुफसिलस्थित एक अर्केष्ट्राबाट नेपाल प्रहरी र भारतीय सुरक्षा फौज एसएसबीको संयुक्त टोलीले ५ नेपाली र १ बंगाली गरी आधा दर्जन चेलीको उद्धार गरेको थियो । नेपाली चेलीहरुमध्ये १ इलाम र ४ झापाका थिए । त्यसैगरी, मार्च १ मा बिहारकै पलनवास्थित २ वटा आर्केष्ट्राबाट ८ चेलीको उद्धार गरिएको थियो । तीमध्ये २ दोलखा, १/१ ओखलढुंगा र मोरङ, २/२ झापा र सिन्धुलीका थिए ।

२ फरक मितिमा उद्धार गरिएका कूल १३ नेपाली चेलीमध्ये ३ बालिग र १० नाबालिक थिए । बालिग चेलीहरु उद्धार लगत्तै स्वदेश फिर्ता ल्याइएका थिए । नाबालिकाहरु भने भारतीय कानून अनुसार सोझै नेपाललाई हस्तान्तरण गर्न नमिल्ने भएकाले उनीहरुलाई मोतिहारी अदालतको आदेशले मार्च २७ मा त्यहाको बाल कल्याण गृहको जिम्मा लगाइएको थियो ।

उद्धार गरिएका चेलीहरु ६ महिनाअघि पर्सा र बाराको ग्रामिण भेगको नाकाहरु भएर भारत पुगेका थिए । उनीहरुलाई अर्केष्ट्रा सञ्चालकहरुले आकर्षक तलब र सुविधा दिने प्रलोभन दिई आफैं नेपाल आएर आफूसँगै भारत लगेका थिए ।

यसरी अर्केष्ट्रामा पुग्ने नेपाली चेलीहरुलाई भारतकै विभिन्न स्थानमा पठाई उनीहरुको इच्छा विपरीत अशोभनीय पोशाकमा बिना पारिश्रमिक नाचगान गराई शारीरिक तथा मानसिक यातना दिएर श्रमशोषण र बेचबिखन गर्ने उद्देश्यले अन्यत्र पठाउने समेत गरिन्छ ।

अर्केष्ट्रा सञ्चालकहरूले सामाजिक सञ्जालबाट तथा प्रत्यक्ष रुपमै नेपाल आएर पनि नेपाली चेलीहरुलाई आकर्षित गर्ने काम गर्छन् । भारत पुगेपछि नेपाली चेलीहरुको मोबाइल खोस्ने, कहिले रात भरि, कहिले दिन भरि विभिन्न पार्टीहरुमा नचाउने, भने जति पारिश्रमिक नदिने गरिन्छ । उनीहरुले नेपालमा आफन्तसँग कुरा गर्न खोज्दा गर्न नदिने, स्वदेश फर्केर आउन समेत नदिने, कुटपिट गर्ने, घर जाने कुरा गरेमा ज्यान मार्ने धम्की समेत दिने गरेर बन्धक बनाएर राख्छन् ।

प्रकाशित : जेष्ठ ६, २०७९ १४:५३
पूरा पढ्नुहोस्
प्रतिक्रिया
पठाउनुहोस्
×