आश्वासन मात्रै थरिथरिका- मधेस - कान्तिपुर समाचार
कान्तिपुर वेबसाईट
AdvertisementAdvertisement

आश्वासन मात्रै थरिथरिका

सुनिता बराल

महोत्तरी — नेपाली कांग्रेसले जलेश्वर नगरपालिकामा दोहोरो कर जनताले तिरिरहेको भन्दै कर हटाउने कुरा आफ्नो घोषणा पत्रमा लखेको छ । जनतालाई मार पर्नेगरी घर र जग्गाको छुट्टाछुट्टै कर हाल जलेश्वर नगरपालिकाले लिइरहेको नेपाली कांग्रेसले बताएको छ । कांग्रेसबाट मेयर पदका उम्मेदवार शम्भु पाठक र उपमेयर पदका अनिता शर्माले घोषणा पत्र सार्वजनिक गर्दै जलेश्वरलाई सुन्दर र सफा सहर बनाउने बाचासँगै जनताको कर कटौती गर्ने उल्लेख गरेका छन् ।

जनतालाई खुशी पार्न नभएर वास्तविक मारमा परेका जनताको पक्षमा आफ्नो घोषणापत्र भएको नेपाली कांग्रेसका नेता बजरंग नेपालीले बताए ।

नेकपा एमालेले पनि जनतालाई जग्गाधनि पुर्जा दिने,स्मार्ट सिटी बनाउने, सहरलाई सफा र स्वच्छ बनाउने, दलित र विपन्नलाई आवासको व्यवस्था गर्ने आफ्नो घोषणापत्रमा राखेको छ । जलेश्वरका मेयर पदका उम्मेदवार रामआधार कापरले आफ्नो घोषणापत्रमा जलेश्वरको समग्र विकास गर्ने प्रतिबद्धता जनाएका छन् ।

माओवादी केन्द्रले पनि गरिब र विपन्नलाई व्यवस्थित भूमि नीतिबाट व्यवस्थित गरी लालपुर्जा वितरण गरिने, एक वडा एक योग ध्यान केन्द्र स्थापना गरिने लगायत विषय आफ्नो घोषणापत्रमा राखेको छ ।

बर्दिवास नगरपालिकाको मेयर पदका उम्मेदवार राजु खड्काले सार्वजनिक गरेका घोषणपत्रमा बर्दिवासलाई शैक्षिक सहर र सफा स्वच्छ सहर बनाउने प्राथामिकताका साथ राखेका छन् ।

जनता समाजवादी पार्टी, लोकतान्त्रिक समाजवादि पार्टी,राप्रपा,जनमत पार्टीले पनि जनतालाई खुशी बनाउने योजना नै आफ्नो घोषणापत्रमा राखेका छन् । गरिब तथा विपन्नलाई जग्गा दिने र आवास बनाइदिने सबै पार्टीले आफ्नो घोषणापत्रमा मुख्य योजना बनाएर अघि सारेका छन् ।

बस्तीमै रोजगारी दिने र सीसी क्यामेरा जोडिदिने प्रतिबद्धता

महोत्तरीको बर्दिवास १४ मा रहेको एकीकृत नमुना मुसहर बस्तीमा भने नेताले दिने आश्वासन भिन्न छ । घर जग्गा नभएका गरिब परिवारलाई घरजग्गाको व्यवस्था गरिदिने आश्वासन दिएका नेताहरु मुसहर बस्तिमा भने बस्तीभित्रै रोजगारिको अवस्था सिर्जना गर्ने बताइरहेका छन् ।

धुर्मुस सुन्तली फाउण्डेसनले ५ वर्षअघि घर बनाइदिएपछि बर्दिवासका मुसहरहरु बासको चिन्ताबाट मुक्त छन् । गरिब तथा दलित बस्तीमा भोट तान्न नेताले जग्गा दिएर घर बनाइदिने आश्वासन बाँडिरहेका बेला बर्दिवासमा भने उनीहरुको आश्वासन बद्लिएको छ ।

बस्तिकी सानु सदाले भनिन्, 'नेताहरु हामीलाई बस्तीमै सिप सिकाएर रोजगारी दिने कुरा गरिरहेका छन्', उनले भनिन्,'कति नेताले भोटकै लागि मलाई त चुनावमा उठाउने पनि कुरा गर्न भ्याए, तर चुनाव सकिएपछि फर्किएर नआउने नेताको पछि लाग्न मन नभएकोले म नउठ्ने भनिदिए ।'

बस्तीको समस्या सोध्न कहिल्यै नआउने नेता अहिले दिनमा ३ पटकसम्म आउने गरेका सुर्जि ऋषिदेवले बताइन् । बस्तीमा अहिले भएको घरजग्गामा ठूलो परिवारलाई बस्न समस्या भएकाले जग्गा थप जग्गा दिलाइदिन नेताहरुलाई आग्रह गरेको बताइन् । आफ्नो मागलाई पनि पूरा गर्ने नेताले बताएका उनले सुनाइन् । बस्तीमा हुने झैझगडा बन्द गर्नका लागि बस्तिमा सीसीटिभी जडान गरिदिने नेताले बताएका उनले सुनाइन् । बस्ती नजिक सामुदायिक भवन बनाइदिने आश्वासन नेताले दिएका उनले बताइन् ।

अहिले मुसहर बस्तिमा रातिको ९ बजेसम्म नेताहरु भोट यो छापमा लगाउनुस भन्दै नमुना मतपत्र लिएर सिकाइरहेका हुन्छन् । बस्तीको विकासका लागि चुनावका बेला नेताले धेरै सपना बाढेका भएपनि केही पूरा नभएका बस्तीका युवा मञ्जय सदाले बताए । यस वर्षको चुनावमा उठेका नेताले पनि बस्तीमा शिक्षाको लागि शिक्षकको व्यवस्था गरिदिने, रोजगारिको व्यवस्था मिलाइदिने, थप जग्गा उपलब्ध गराइदिने, महिलाहरुलाई सिपमूलक कार्यक्रम मिलाइदिने जस्ता आश्वासन बाढिरहेका मञ्जयले बताए ।

मुसहर बस्तीमा ५० घरपरिवार मुसहर छन् । बस्तीबाट निर्वाचनमा मत दिनेको संख्या लगभग सय छ । बस्तीका समस्या जे सुनाएपनि पूरा गर्ने प्रतिबद्धता अहिले नेताहरुले गरिरहेका छन् तर पहिले गरेका प्रतिबद्धता केही पूरा नगरेका उनीहरुको भनाइ छ ।

गएको स्थानीय चुनावमा मुसहर समुदायका बालबालिकालाई विद्यालयमा टिकाइ राख्ने कार्यक्रम ल्याउने, रोजगारिको व्यवस्था गर्ने र महिलाहरुलाई सिप सिकाइदिने प्रतिबद्धता नेताहरुले गरेका थिए । बस्तीमा अहिले प्रमुख राजनितिक दल नेपाली कांग्रेस, नेकपा एमाले, नेकपा माओवादी, राजपा, जसपा र राप्रपाका नेताहरु आफ्नो प्रतिबद्धता लिएर बस्तीमा आउने गरेका बस्ती रेखदेखको जिम्मा पाएका विल्टु सदाले बताए ।

प्रकाशित : वैशाख २६, २०७९ ११:४८
प्रतिक्रिया
पठाउनुहोस्

बागी उम्मेदवारको रहस्यमय मृत्यु

प्रदीप मेन्याङ्बो, सुम्निमा चाम्लिङ

सुनसरी — नेपाली कांग्रेसले वडाध्यक्ष पदका लागि टिकट नदिएपछि सुनसरीको रामधुनी–८ बाट वडाध्यक्षमा स्वतन्त्र उम्मेदवारी दिएका ६५ वर्षीय गणेश पौडेल शनिबार झुन्डिएको अवस्थामा फेला परेका छन् ।

रामधुनीको डुम्राहास्थित पौडेलचोकका पौडेल गत चुनावमा र यसपालि पनि टिकट नपाएपछि बागी बनेका थिए । चार दिनअघि मात्र घरबाट बेपत्ता भएका थिए । सुनसरीका प्रमुख जिल्ला अधिकारी इन्द्रदेव यादवले भने, ‘मोबाइल घरमा, मोटरसाइकल इनरुवामा छाडेर बेपत्ता भएपछि उजुरीका आधारमा खोजी हुँदा भोलिपल्ट सम्पर्कमा आएका थिए ।’

सम्पर्कमा आएका पौडेलले साथीको घरमा बसेको बताएका थिए । प्रहरीले अनुसन्धानका लागि भन्दै बोलाएको भोलीपल्ट शनिबार शव घर पछाडीको रुखमा झुन्डिएको अवस्थामा फेला परेको हो । शवसँगै प्रहरीले ‘सुसाइड नोट’ पनि बरामद गरेको प्रजिअ यादवले बताए । स्थानीय तहको चुनाव र आफ्नै पार्टीभित्रको विवादबीच पौडेलको मानसिक सन्तुलनमा केही गडबडी उत्पन्न भएकाले आत्महत्या गरेको हुन सक्ने प्रहरीको अनुमान छ । तर उनले मितिसहितको हस्ताक्षर गरेको सुसाइड नोट आफैंले लेखेको हो वा दबाबमा परेर लेखेको बारे भने अनुसन्धान भइरहेको प्रहरीले जनाएको छ ।

निर्वाचन कार्यालयमा स्वतन्त्र उम्मेदवारी दिएपछि पार्टीले फिर्ता लिन दबाब दिएको थियो । तर पौडेलले फिर्ता नलिएपछि कांग्रेसले उनलाई साधारण सदस्यसमेत नरहने गरी कारबाही गर्ने निर्णय गरेको थियो । प्रहरीले थप अनुसन्धान गरिरहेको जनाएको छ । पोस्टमार्टमका लागि उनको शव धरानस्थित बीपी कोइराला स्वास्थ्य विज्ञान प्रतिष्ठानमा लगिएको छ ।

विवादरहित उनी सरल र मिजासिलो व्यक्तिका रूपमा चिनिन्थे । सामाजिक क्षेत्रमा समेत उतिकै सक्रिय थिए । २०४१ सालमा महेन्द्र मोरङ क्याम्पस विराटनगरबाट नेवि संघमा आबद्ध भई विद्यार्थी राजनीति सुरु गरेका थिए । यसपल्टसमेत वडाध्यक्षका लागि उनको नाम कमिटीले सिफारिस गरिएको थियो । स्थानीयका अनुसार राम्रो छवि भएका कारण चुनावी माहोलसमेत राम्रो थियो । प्रचारप्रसारमा जुटिरहेका थिए । घटना रहस्यमय भएको स्थानीयले बताएका छन् । पौडेलका आमाबुबा, दुई छोरा र एक छोरी छन् ।

मृतकका साहिला भाइ सन्तोष पौडेलले भने, ‘दाजु दबाब नझेल्ने मान्छे पनि होइन तर बीचमा कसैले धम्की पो दियो कि ? आत्महत्या जस्तो देखिएको छ, तर यो नहुन पनि सक्छ ।’ चुनावी चहलपहल सुरु भएदेखि उनलाई दबाब दिँदै आएको परिवारजन बताउँछन् । प्रचारमा नलागी मौन बस्न उनलाई चर्को दबाब दिइएको सन्तोषले बताए ।

उनी सम्पर्कविहीन भएपछि परिवारजन जाहेरी दिन खोजे पनि प्रहरीले लिन नमानेको सन्तोषले बताए । भन्छन्, ‘चुनाव चिह्न पाउनुअघिसम्म पनि फिर्ता गर्नु भनेर भनेका वडाका कार्यकर्तामाथि जाहेरी दिन खोजेका थियौं तर प्रहरीले दिन मिल्दैन भन्यो ।’ जाहेरी लिन नमानेपछि खोजी गरिदिन भनेर निवेदन दिएका थियौं । सम्पर्कमा आएका पौडेललाई अनुसन्धानका लागि प्रहरी कार्यालय लगेर छाडिएको थियो । शुक्रबार अनुसन्धानका लागि प्रहरीले बोलाएपछि सन्तोष दाईसँगै पुगेका थिए । घर फर्केका उनलाई सुनसरी प्रहरी कार्यालयका डीएसपी नरेन्द्रकुमार कार्कीले पुनः बोलाए पछि पौडेल र सन्तोष प्रहरी कार्यालय पुगे ।

‘किन बोलाउनुभएको रहेछ भनेर सोध्दा दाजुले केही पनि खुलाउनु भएन,’ उनले भने । सुनसरी प्रहरी कार्यालयका डीएसपी कार्कीका अनुसार प्रारम्भिक अनुसन्धानका क्रममा उनी सरल स्वभावको व्यक्ति रहेको पाएँ । उनले भने, ‘पहिलेदेखि नै केही थियो कि ? घरपरिवारलाई थाहा होला ।’ विदेशमा रहेका छोरा आएपछि मात्र पोस्टमार्टम गर्ने परिवारजनले भनेको हुनाले शव धरानस्थित बीपी कोइराला स्वास्थ्य विज्ञान प्रतिष्ठानमा राखिएको सुनसरीको प्रहरी प्रमुख सञ्जयसिंह थापाले बताए । एक/दुई दिनभित्रमा छोरा आउने परिवारजनले जानकारी दिएको उनले बताए ।

प्रकाशित : वैशाख २६, २०७९ ११:३९
पूरा पढ्नुहोस्
प्रतिक्रिया
पठाउनुहोस्
×