भड्किलो प्रचारको होडबाजी- मधेस - कान्तिपुर समाचार
कान्तिपुर वेबसाईट
AdvertisementAdvertisement

भड्किलो प्रचारको होडबाजी

गाउँ–सहरको स्वरुप नै बिग्रने गरी फ्लेक्स, पोस्टर र ब्यानर
डिजे बाजा र लाउड स्पिकरमा भोजपुरी गीत घन्काउँदै घरदैलो
लक्ष्मी साह

बारा — वैशाख ३० मा हुने स्थानीय तह निर्वाचनमा मनोनयन दर्ता गरेर चुनाव चिन्ह प्राप्त गरेदेखि उम्मेदवारहरू प्रचारप्रसारका लागि घरदैलोमा छन् । जिल्लाका सबै स्थानीय तहमा मतदाता रिझाउन लागि परेका उम्मेदवारहरूबीच प्रचार शैलीलाई भने भड्किलो बनाउने होडबाजी नै चलेको छ । हरेकजसो चोक तथा गल्लीहरूमा स्वरुप नै बिग्रनेगरी फ्लेक्स, ठूलाठूला पोस्टर र ब्यानर टाँगिएका छन् ।

डिजे बाजा, लाउडस्पिकरमा चुनावी र भोजपुरी गीत घन्काउँदै घरदैलो र र्‍याली भइरहेको छ । जसका कारण गाउँ, सहर सबैतिर ‘कोलाहल’ कै वातावरण बनेको स्थानीयले गुनासो गरेका छन् ।

‘यतिसम्म कोलाहल मच्चिएको छ कि, कानै थुनेर बस्नु पर्ने स्थिति छ,’ कलैया बजारका इलेक्ट्रोनिक्स व्यवसायी मिथलेश स्वर्णकारले भने, ‘देखासिकीले सानादेखि ठूला पार्टीका उम्मेदवारसम्मले समूहमै भड्किलो र रंगीचंगी प्रचारशैली अपनाइरहेका छन् । चुनावी आचारसंहिताको न पालना भएको छ, न अनुगमन र नियमन नै छ ।’ टेम्पु र चारपांग्रे गाडीमा ब्यानर र झन्डा टाँगेर लाउडस्पिकरमा भोजपुरी गीत र सेर चर्को आवाजमा बजाउँदै प्रचार भइरहेको उनले सुनाए ।

भड्किलो प्रचार शैली नअपनाउन निर्वाचन आयोगले आचारसंहिता जारी गरे पनि उम्मेदवारहरूले त्यसको बेवास्ता गरिरहेका छन् । आचारसंहिताको बेवास्ता भइरहँदा त्यसको पालना गराउने नियामक अधिकारी भने मौन छन् । नियमन गर्न नागरिकस्तरबाट दबाब बढे पनि सरोकारवालाहरू मुकदर्शक भएर बसेको सर्वसाधारणको आरोप छ । जिल्लास्थित मुख्य निर्वाचन अधिकृतको कार्यालयले बुधबार बोलाएको सर्वपक्षीय बैठकमा समेत आचारसंहिता पालनामा कडाइ नगरिएको/नगराइएको भन्दै आलोचना भएको थियो ।

बैठकमा सुरक्षा निकायका अधिकारी, राजनीतिक दलका प्रतिनिधि, निर्वाचन अधिकारीहरू सहभागी थिए । त्यसमा साना दलका प्रतिनिधिले आचारसंहिता उल्लंघन भइरहेकोमा आक्रोश पोखेका थिए । नेपाल मजदुर किसान पार्टीका जिल्ला अध्यक्ष मुक्ति यादवले मुख्य निर्वाचन अधिकृतको कार्यालयको मुख्यद्वारमै ठूला पार्टीका उम्मेदवारले आचारसंहिता उल्लंघन हुनेगरी प्रचार शैली अपनाइरहेको भए पनि नियमन नभएको आरोप लगाए ।

गत वैशाख ११ र १२ मा मनोनयन दर्ताको क्रममा होस् या त्यसयताका चुनावी र्याली, आमसभा र घरदैलो कार्यक्रममा होस्, बालबालिकाहरूको प्रयोग बढ्दो छ । विद्यालय बिदा भएकाले बालबालिकाहरू दलको चुनाव चिह्न अंकित झन्डा लिएर दलका कार्यक्रममा सहभागी भएको देखिन्छ । चुनावी प्रचार, सभा, सम्मेलनमा बालबालिकाको प्रयोग गर्नु अवैधानिक भए पनि दलहरू त्यसप्रति सजग नदेखिएको बालअधिकारकर्मी बृजमोहन कुसवाहाले बताए ।

सहायक निर्वाचन अधिकृत इन्द्र योङहाङले मापदण्डभन्दा बाहिर गएर भड्किलो प्रचार शैली नअपनाउने भनेर दल र उम्मेदवारहरूले बुधबार सामूहिक प्रतिबद्धता जनाएको बताए । आचारसंहिता उल्लंघनमा अब कमी आउने उनले विश्वास व्यक्त गरे । ‘अति भयो भने कारबाहीतर्फ जान्छौं,’ उनले भने, ‘तर कारबाही गर्न लिखित उजुरी चाहिन्छ, उजुरीबिना नियमन र कारबाही गर्न सम्भव छैन ।’

प्रकाशित : वैशाख २३, २०७९ १२:००
प्रतिक्रिया
पठाउनुहोस्

चुनावबीच मतदातामा छैन उत्साह‚ विपन्नलाई छाक टार्नै पिरलो

अनिश तिवारी

सिन्धुपाल्चोक — आर्थिक अभावका कारण महँगो उपचार गर्न नसक्दा बाह्रबिसे-९ राम्चेका सुकुमान तामाङले तीन वर्षअघि तीन वर्षका छोरा वनकाइलालाई गुमाए । श्रीमती बोल्न शारीरिक रुपमा अशक्त छिन् । दुई छोरा र एक छोरी हुर्काउने जिम्मेवारी उनैमाथि थोपरिएको छ । पुर्ख्यौली गरिबीले सुकुमानले पढलेख गर्न सकेनन् । जीविकोपार्जनका लागि भारी बोक्न थाले । ६८ वर्षको उमेरमा पनि उनी जीवनयापन निर्वाह गर्नका लागि भारी बोक्न विवश छन् ।


चुनावी अभियानमा होमिएका नेपाली कांग्रेस, नेकपा एमाले र नेकपा माओवादी केन्द्रका नेता तथा कार्यकर्ता आफ्ना उम्मेदवारसहित चर्को स्वरमा नारा लगाउँदै चुनावी प्रचारमा हिँडिरहँदा उनमा भने कुनै उत्साह छैन । ‘हाम्रो पार्टीले विपन्नलाई सक्षम बनाउनेछ; यो मजदुरको पार्टी हो; कृषकका लागि खट्नेछ,’ यस्ता अनेकौं नारा सुनेपछि तामाङ झनै निराश देखिए ।

‘यी सबै झूट बोल्दैछन्, अघिल्लो चुनावमा यही भन्थे; अहिले पनि यही भन्छन् । के हाम्रो अवस्था केही बदलिएको देख्नहुन्छ ?,’ मजदुरी गर्दागर्दै फाटेको कपडा र नाम्लो देखाउँदै तामाङले प्रश्न गरे ।

बुढ्यौली शरीरमा उनिएका मैला‚ धुजाधुजा परेका कपडा लगाएका बाह्रबिसे नगर बजार टोलका ८५ वर्षे तुलसी श्रेष्ठ हिँड्दै चुनावी कार्यक्रमछेउ काम्दै आइपुगे । कोही आफन्त नभएका उनलाई तीन वर्षयता शरीरको दाहिनेपट्टीको भाग नचल्ने भएपछि मागेरै खान पनि कष्टदायी हुने गरेको उनी सुनाउँछन् । भूकम्प र पराकम्पनले पुर्ख्यौली घरजग्गा भास्सियो । बजारछेउको जग्गालाई भोटेकोसीले बगायो । त्यसपछि अन्यत्र जग्गा नभएकाले उनले अन्यत्र घर बनाउन सकेनन् । नौ वर्षअघि श्रीमती हेलमाया पनि बितिन्; त्यसपछि वृद्ध तुलसीको दुःखको अध्याय सुरु भयो । थोत्रो टहराबाट चुहिएर आएको पानीले कुहिन लागेका काठको फलेकमाथि पुराना तन्नाको ओछ्यानमा तुलसी आफ्नो बुढ्यौलीका दिन गनिरहेका छन् ।

बाख्राको बड्क्यौलाले दुर्गन्धित बनेको उनको टहराभित्रको अवस्थाले उनको दुःखलाई देखाउँछ । ‘खै ! यी सब नाटकी रैछ नाटकी; एक बोरा चामल र ब्ल्यांकेट दिएर सबै नेतासेता बेपत्ता भए । यहाँ छाक टार्नै मुस्किल भइरहेछ,’ उनले दुखेसो गरे । मजदुर जुंगे र अशक्त तुलसीजस्ता पात्र बाह्रबिसे नगरमा मात्रै दुई दर्जनभन्दा बढी छन् भने जिल्ला आयोजना कार्यान्वयन एकाई (अनुदान तथा पूर्वाधार )का अनुसार जिल्लाभर रहेका अशक्त वर्गका पीडितको संख्या १ हजार २ सय ८१ रहेको छ । जसमा मेलम्ची र चौतारा साँगाचोकगढी नगरपालिकामा मात्रै ४ सय ७ जना अशक्त पीडित छन् । मजदुर र अशक्तको अवस्थालाई देखेर अघिल्लो निर्वाचनमा मुख्य दलले विपन्नलाई आत्मनिर्भर बनाएर समृद्ध र अशक्त वृद्धवृद्धाको संरक्षणजस्ता अनेक एजेन्डा लिएका थिए । यस पटक पनि केहीबाहेक अधिकांशले पुरानै एजेन्डा दोहोर्‍याएको देखिन्छ । तर यिनीको अवस्था भने उही पुरानै छ ।

मतदातामा छैन उत्साह
अघिल्लो स्थानीय तह २०७४ मा झैं जिल्लाको तीन नगरदेखि नौ गाउँपालिकाभर दल र स्वतन्त्र उम्मेदवार आफ्नो समृद्ध एजेन्डा र कार्यक्रम बोकेर मत माग्दै घरदैलो अभियानमा लागिरहेका छन् । चार दलले आचरसंहिताविपरीत जिल्लाको बाह्रबिसे, मेलम्ची र चौतारा साँगाचोकगढी नगरको मुख्य गाउँदेखि बजाभर झन्डा, तोरणले सजाएका छन् ।

चर्को आवाजमा दललाई देवत्वकरण गरिने खालका गीत बजाउँदै नेता/कार्यकर्ताहरू सवारीसाधन कुदाइरहेका छन् । तर‚ पहिलेजस्तो उत्साह भने मतदाताबीच एकरत्ति पनि छैन । अघिल्लो निर्वाचनमा को, कस्तो उम्मेदवार ? कसले जित्ने ? कसरी ? जस्ता बहस चिया पसलदेखि बस्तीबजारसम्म चल्ने गर्थ्यो । अहिले कसैलाई केही वास्तै छैन ।

‘अघिल्लो निर्वाचनयता मतदाता निरासिएका छन्; समृद्ध घोषणापत्र र कुरा मात्रै ठूला, चुनावको बेला मात्रै सम्झने नेताको प्रवृत्तिले स्थानीय दिक्क भएका छन्,’ स्थानीय अगुवा चक्रध्वज तिवारीले भने । स्थानीय निर्वाचनका लागि २ हजार १ सय १४ उम्मेदवारले भव्य रौनका साथ मनोनयन दर्ता गरेका थिए ।

प्रकाशित : वैशाख २३, २०७९ ११:४८
पूरा पढ्नुहोस्
प्रतिक्रिया
पठाउनुहोस्
×