गाउँपालिकाको ३४ लाख हिनामिना- मधेस - कान्तिपुर समाचार

गाउँपालिकाको ३४ लाख हिनामिना

रकम हिनामिना गर्न गाउँपालिका अध्यक्ष जागेश्वर यादवको समेत मिलेमतो
भरत जर्घा मगर

सिरहा — सिरहाको विष्णुपुर गाउँपालिकाका प्रशासन शाखाका कर्मचारीले ३४ लाख रुपैयाँभन्दा बढी राजस्व खातामा दाखिला नगरी हिनामिना गरेको पाइएको छ । गाउँपालिकाका प्रशासन शाखाका नायब सुब्बा महेन्द्रप्रसाद यादवले आर्थिक वर्ष २०७७/७८ मा गाउँपालिकाको लेखा शाखामा विभिन्न शीर्षकमा सेवाग्राहीबाट राजस्वबापत संकलित ५५ लाख २७ हजार ७७ रुपैयाँमध्ये ३४ लाख २३ हजार ७ सय ९० रुपैयाँ हिनामिना गरेका हुन् । रकम हिनामिना गर्न गाउँपालिका अध्यक्ष जागेश्वर यादवको समेत मिलेमतो देखिएको छ ।

प्रमुख प्रशासकीय अधिकृत दीपकुमार यादवले स्थानीय तह आय लेखांकन प्रणाली सफ्टवेयरमार्फत २०७७ साउन १ देखि २०७८ असार ३१ गतेसम्म एक वर्ष अवधिमा संकलन भएको रकम नायब सुब्बा बैंक दाखिला नगरी अन्यत्र चलाएको पाइएको जानकारी दिए । राजस्व रकम बैंक दाखिला गरेको नदेखिएपछि आर्थिक कार्यविधि तथा वित्तीय उत्तरदायित्व ऐन, २०७६ बमोजिम हिनामिना रकमको २५ प्रतिशतले हुन आउने ८ लाख ५५ हजार ९ सय ४७ रुपैयाँ ५० पैसा जरिवानासहित ४२ लाख ७९ हजार ३ सय ३७ रुपैयाँ ५० पैसा बैंकमा दाखिला गर्न १५ चैतमा पत्र काटिएको जानकारी दिए ।

राजस्वको रकम खातामा जम्मा गर्न ताकेतासहितको पत्र काटेको १४ दिन बितिसक्दा पनि खातामा अझै रकम जम्मा नभएको प्रमुख प्रशासकीय अधिकृत यादवले बताए । गाउँपालिकाले सम्पूर्ण आर्थिक कारोबार विष्णुपुरस्थित मेगा बैंकको शाखाबाट गर्दै आएको छ । नासु यादवले राजस्व रकम गाउँपालिकाको आन्तरिक राजस्व खातामा दाखिला नगरी गाउँपालिका अध्यक्ष जागेश्वर यादवले भनेअनुसार गर्दा गल्ती भएको स्विकारेका छन् ।

‘गाउँपालिका अध्यक्षले मुद्दामामिलामा खर्च चाहिएको छ, पछि मिलाउँला भनेपछि विश्वासमा परेर दिँदै गए, अहिले म अप्ठ्यारोमा परें,’ नासु यादवले भने, ‘कानुनी रूपले मेरो गल्ती देखिएकाले चैत मसान्तसम्म गाउँपालिकाको राजस्व खातामा जम्मा गर्छु ।’

विष्णुपुर गाउँपालिकाका अध्यक्ष यादवले राजस्व हिनामिना काण्डमा आफूलाई बदनाम गर्ने योजनासहित कर्मचारीहरूले मेरो नाम मुछेको बताएका छन् । राजस्व हिनामिनाको विषयमा तत्कालीन राजस्व प्रमुख नायब सुब्बा महेन्द्रप्रसाद यादवले मलाई बदनाम गर्ने नियतले नाम मुछेको उनको आरोप छ ।

अध्यक्ष यादवले तत्कालीन प्रमुख प्रशासकीय अधिकृत रवीन्द्रकुमार महत र राजस्व प्रमुख यादवले योजनाबद्ध तरिकाले मलाई बदनाम गरिरहेको बताए । ‘मैले नियमित रूपमा राजस्व रकम जम्मा नभएको जानकारी पाएदेखि नै ताकेता गर्न प्रशासकीय अधिकृत महतलाई निर्देशन दिए पनि उनले तत्परता देखाएनन्,’ उनले भने, ‘पछि महालेखाले समेत ताकेता गर्नुपर्ने अवस्था आयो, अहिले मलाई बदनाम गर्ने कोसिस भइरहेको छ ।’

महत २०७७ भदौ २४ देखि २०७८ फागुन २९ सम्म प्रमुख प्रशासकीय अधिकृतको जिम्मेवारीमा थिए । महतले यस अवधिमा एक पटक २०७८ भदौ ४ गते आन्तरिक राजस्व रकम बैंकमा दाखिला गर्न यादवको नाममा पत्र काटेका थिए । उनले सोही पालिकाको शिक्षा शाखा प्रमुखका रूपमा कार्यरत दीपकुमार यादवलाई २०७८ फागुन ३० गते प्रमुख प्रशासकीय अधिकृतको जिम्मेवारी दिएका थिए ।

गाउँपालिका यादवले नियमित राजस्व जम्मा नभएपछि पटकपटक प्रशासकीय अधिकृत महतलाई निर्देशन गरे पनि उनले एक पटकमात्र पत्र काटेको बताए । उनले भने, ‘मैले राजस्व नियमित जम्मा भइरहेको छैन भन्ने जानकारी पाउनासाथ जम्मा गर्न लगाउन पत्र लेख्न अनुरोध गरे, तर उनले धेरैपछि मात्र पत्र काटे ।’ उनले पछिल्लो पटक पनि १५ गते नयाँ प्रशासकीय अधिकृतलाई पत्र काट्न लगाइसकेको बताउँदै अब चैत मसानन्तसम्म रकम नबुझाए कानुनी प्रक्रियामा जाने बताए ।

प्रकाशित : वैशाख १, २०७९ १३:५५
प्रतिक्रिया
पठाउनुहोस्

टेन्डर नै नगरी सडक शिलान्यास

भरत जर्घा मगर

सिरहा — भौतिक पूर्वाधार तथा यातायातमन्त्री रेणु यादवले टेन्डर नै नभएका दुईवटा सडकको शिलान्यास गरेकी छन् । मन्त्री यादवले लगत इस्टिमेट मात्र तयार भएको चोहर्वा–सिरहा–माडर चार लेन र मिर्चैया–कल्याणपुर–सिरहा दुई लेन सडकको शुक्रबार शिलान्यास गरेकी हुन् । 

कार्यक्रममा जसपाका नेता, प्रतिनिधिसभा सदस्य र प्रदेशसभा सदस्यहरू पनि सहभागी थिए । मन्त्री यादवले दुवै सडकका लागि पहिलो चरणमा मन्त्रालयले ४०/४० करोड रुपैयाँ विनियोजन गरेको बताइन् । २२ मिटर चौडाइ रहने चोहर्वा–सिरहा–माडर चार लेन सडकखण्डमा विनियोजित रकमबाट पहिलो चरणमा साढे २ किलोमिटरको काम हुनेछ । यो सडकमा गाउँ क्षेत्रमा १४ मिटर र सहरी क्षेत्रमा १८ मिटर कालोपत्रे गर्ने योजना छ ।

यस्तै, मिर्चैया–कल्याणपुर–सिरहा सडकखण्डमा पहिलो चरणमा साढे ८ किमिको काम हुनेछ । दुई लेनको यो सडकको चौडाइ भने ११ मिटर हुनेछ । सडक निर्माण अवधि २ वर्ष तोकिएको छ । मन्त्री यादवले दुवै सडक निर्माण भए यहाँको विकासले गति लिने विश्वास व्यक्त गरिन् । उनले समयमै सडक बनाइसक्ने प्रतिबद्धतासमेत जनाइन् ।

तर, सडक डिभिजन कार्यालय लहानले मन्त्री यादवले शिलान्यास गरेको सडकको लगत इस्टिमेट मात्र तयार भएको र टेन्डर प्रक्रिया बाँकी नै रहेको जनाएको छ । कार्यालय प्रमुख इन्जिनियर रामकुमार देवले यस वर्ष टेन्डर प्रक्रियामात्र सुरु हुने जानकारी दिए । प्रायःजसो आयोजनाको टेन्डर प्रक्रिया सुरु भइसकेपछि मात्र शिलान्यास गरिन्छ । तर, टेन्डर नै नभईकन शिलान्यास गरिनु भनेको चुनावको मुखमा जनताको आँखामा छारो हाल्न र वाहवाही कमाउन गरिएको प्रपञ्च हो भन्छन्, नेपाल पत्रकार महासंघ सिरहाका पूर्वअध्यक्ष देवकुमार यादव ।

‘जुन सडकको टेन्डर भएको छैन, शिलान्यास गर्न हतारिनुको मतलब स्पष्ट छ, चुनावी एजेन्डा,’ उनले भने, ‘यस्ता कार्यले जनतालाई भ्रमित गराउने काम मात्र गर्छ ।’ सडक डिभिजन प्रमुख इन्जिनियर देवले शिलान्यास कार्यक्रम आयोजना आफूहरूले नगरेको बताए ।

चुनाव नजिकिँदै गर्दा स्थानीय सरकारका जनप्रतिनिधिहरू पनि चुनावी माहोल आफूतिर तान्न सक्रिय भएका छन् । लहान नगरपालिकाका प्रमुख मुनी साहले डीपीआर मात्रै तयार भएको नगरक्षेत्रभित्र ४२ किलोमिटर चक्रपथ निर्माणको सोमबार शिलान्यास गरे ।

चक्रपथको डीपीआर तयार भएको तर टेन्डर प्रक्रियाबारे आफूलाई जानकारी नभएको लहानका ओभरसियर राजीव बैठाले जानकारी दिए । ‘डीपीआर मैले नै तयार गरेको हुँ,’ उनले भने, ‘करिब ७० लाख रुपैयाँको तयार गरिएको छ, टेन्डर प्रक्रियाबारे मलाई जानकारी भएन ।’

प्रकाशित : चैत्र १९, २०७८ १०:५३
पूरा पढ्नुहोस्
प्रतिक्रिया
पठाउनुहोस्
x
×